ފެކަލްޓީ އޮފް ހެލްތް ސައިންސަސް (އެފް.އެޗް.އެސް)ގައި މިއަހަރުގެ ދުނިޔޭގެ ފިޒިއޮތެރަޕީ ދުވަސް ވަރަށް ކުލަގަދަކޮށް ފާހަގަކޮށްފިއެވެ.
ދުނިޔޭގެ ފިޒިއޮތެރަޕީ ދުވަހަކީ ސެޕްޓެންބަރު 8 ވަނަ ދުވަހެވެ. މިއީ ފިޒިއޮތެރަޕީގެ ދާއިރާގައި މަސައްކަތް ކުރައްވާ ޚިދުމަތްތެރީންގެ އަގުވަޒަންކުރުމަށާއި، ދުޅަހެޔޮ މުޖުތަމައެއް ބިނާ ކުރުމުގައި ފިޒިއޮތެރަޕީގެ ދައުރާ މެދު އާންމުން ހޭލުންތެރިކުރުމަށް ވޯލްޑް ޕިޒިއޮތެރަޕީ އިން ބައިނަލްއަޤުވާމީ ގޮތެއްގައި ފާހަގަކުރާ ދުވަހެކެވެ.
އެފް.އެޗް.އެސް ގައި ބެޗްލަރސް އޮފް ފިޒިއޮތެރަޕީ ކިޔަވަމުންދާ ދަރިވަރުން އިސްނަގައިގެން މިދުވަސް ފާހަގަކުރުމަށް ސެޕްޓެންބަރު 8 ވަނަ ދުވަހާއި 9 ވަނަ ދުވަހު ވަނީ ގިނަ އަދަދެއްގެ ހަރަކާތްތަކެއް ކުރިއަށް ގެންގޮސްފައެވެ. މިހަރަކާތްތަކުގައި، ރާއްޖޭގައި ހުރި ހަމައެކަނި ފިޒިއޮތެރަޕީއަށް ޚާއްސަ ސެންޓަރު ކަމަށްވާ ފިޒިއޯ ސޮލިއުޝަންސްގެ އިތުރުން ހީލަރސްގެ ފަރާތުންވެސް ވަނީ ބައިވެރިވެފައެވެ. މިއަހަރުގެ ފިޒިއޮތެރަޕީ ދުވަހުގެ ޝިއާރަކީ ”އޮސްޓިއޯއަރތުރައިޓިސް“ ނުވަތަ މަޑު ކަށި ގޭނޭ ބައްޔެވެ.
ފިޒިއޮތެރަޕީ ދުވަހުގެ ހަރަކާތްތައް ފެށުމުގެ ގޮތުން ބޭއްވި ހާއްސަ ޖަލްސާ ބޭއްވުނީ ސެޕްޓެންބަރު 8 ވީ ބުރާސްފަތި ދުވަހު އެފް.އެޗް.އެސް ކޮންފަރެންސް ހޯލްގައެވެ. މިރަސްމިއްޔާތު ޝަރަފްވެރިކޮށްދެއްވީ ދިވެހިރާއްޖޭގެ ފަސްޓް ލޭޑީ މެޑަމް ފަޒްނާއެވެ. މީގެ އިތުރުން މި ރަސްމިއްޔާތުގައި ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލާ ޑރ. މުހައްމަދު ޝަރީފާއި، އެފް.އެޗް.އެސް ގެ ޑީން ޑޜ. އައިޝަތު ޝަނޫރާ އާއި، ޔުނިވަރސިޓީގެ މެނޭޖްމެންޓުގެ ގިނަ އަދަދެއްގެ ބޭފުޅުން ބައިވެރިވަޑައިގެންނެވިއެވެ. އަދި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ބޭފުޅުންނާއި، ހީލަރސްގެ ހިންގާ ކޮމެޓީގެ މެމްބަރުންގެ އިތުރުން ދައުވަތު ދެވިގެން ވަޑައިގެން ތިއްބެވި ގިނަ އަދަދެއްގެ ބޭފުޅުން ވެސް ވަނީ މި ރަސްމިއްޔާތުގައި ބައިވެރިވަޑައިގަންނަވާފައެވެ.
ފިޒިއޮތެރަޕީ ދުވަހުގެ ހަރަކާތްތައް ރަސްމީކޮށް އިފްތިތާހް ކޮށްދެއްވުމަށްފަހު ފަސްޓް ލޭޑީ ވަނީ، ދުވަހުގެ މުނާސަބަތުގައި ތައްޔާރު ކުރެވިފައި ހުރި ސްޓޯލްތައް ބައްލަވާލައްވާފައެވެ.
ފިޒިއޮތެރަޕީ ދުވަސް ފާހަގަކުރުމަށް ޖުމުލަ 7 ސްޓޯލެއް ވަނީ ބެހެއްޓިފައެވެ. މީގެ ތެރޭގައި ހެލްތު ސްކްރީނިން ސްޓޯލްތަކާއި، މައުލޫމާތު ދޭ ސްޓޯލްތަކާއި، ގޭމް ސްޓޯލްތައް ހިމެނެއެވެ. މިސްޓޯލްތަކުގައި ބައިވެރިވުމަށް އެދުވަހު ހެނދުނު 10 ން ހަވީރު 4 ށް ވަނީ އެމް.އެން.ޔޫގެ ހުރިހާ ދަރިވަރުންނާއި މުއައްޒަފުންނަށް ހުޅުވާލާފައެވެ. ދުވަހާ ގުޅިގެން ކުރިއަށް ގެންދެވުނު ދެވަނަ ހަރަކާތް ކުރިއަށްގެންދެވުނީ 9 ސެޕްޓެންބަރު ވީ ހުކުރު ދުވަހު ހަވީރު ސޯޝަލް ސެންޓަރުގައެވެ. މިހަރަކާތުގެ މައިގަނޑު މަގުސަދަކީ ދުވަހުގެ ޝިއާރާ ގުޅޭގޮތުން ފިޒިއޮތެރަޕީގެ ދައުރާމެދު އާންމުން ހޭލުންތެރިކުރުމެވެ. މިހަރަކާތުގައި ވަނީ 8 ސްޓޯލެއް ބެހެއްޓިފައެވެ. އެމް.އެން.ޔޫގެ އެފް.އެޗް.އެސްގައި ފިޒިއޮތެރަޕީ ކިޔަވާ ދަރިވަރުންގެ ރޭވުންތެރިކަމާއި، ހިންގުންތެރިކަމާއެކު ކުރިއަށްގެންދެވުނު މި ހަރަކާތަށްވަނީ އާންމުންގެ ބޮޑު ތަރުހީބެއް ލިބިފައެވެ.
މިއީ މިއަހަރު އެފް.އެޗް.އެސް.ގައި މިހާ ކުލަގަދަކޮށް ފާހަގަކުރެވުނު ފުރަތަމަ ދުވަހެވެ. ނަމަވެސް ފާރމަސީ ދުވަހާއި، މެންޓަލް ހެލްތު ދުވަސް ފާހަގަކުރުމަށް މިހާރު ވެސް އަންނަނީ ތައްޔާރީތައް ވަމުންނެވެ.
ފާއިތުވި އަހަރުވެސް އެފް.އެޗް،އެސްގައި ފިޒިއޮތެރަޕީ ކިޔަވާ ދަރިވަރުން ވަނީ ވަރަށް ފޯރިއާއެކު ދުނިޔޭގެ ފިޒިއޮތެރަޕީ ދުވަސް ފާހަގަކޮށްފައެވެ. އަދި އަހަރަކަށް ވުރެ އަހަރެއް މިފަދަ ދުވަސްތައް ފާހަގަ ކުރުމަށް ހިންގޭ ހަރަކާތްތަކުގެ އިންތިޒާމްތަކާއި ފެންވަރު ރަނގަޅުވަމުން އަންނަކަން ފާހަގަކޮށްލަން ޖެހެއެވެ. މިކަމުގެ ފަހަތުގައި ވަނީ ތަނަވަސް ހިޔާލުތަކެއްގެ ވެރި ކެރޭ، ހީވާގި ދަރިވަރުންނާއި، އެކުދިންގެ އާރުކާޓީން ކަމުގައިވާ ލެކްޗަރާއިންކަން ޔަގީނެވެ. އަދި މިފަދަ ދުވަސްތައް ފާހަގަ ކުރުމަށާއި، ދަރިވަރުންގެ ހަރަކާތްތަކަށް އެމް.އެން.ޔޫގެ މެނޭޖްމެންޓާއި، އެމް.އެން.ޔޫ.އެސް.ޔޫގެ ފަރާތުން ދެއްވަމުންގެންދަވާ އެއްބާރުލުމާއި، އެހީތެރިކަން އަބަދުވެސް ދަރިވަރުން ބަލައިގަންނަނީ ޝުކުރުވެރިކަމާއެކުގައެވެ.
