އަހަރުތަކެއްގެ މެދުކެނޑުމަކަށްފަހު ހީލަރސް ޝޯވ މިއަންނަ ހުކުރު ދުވަހުގެރޭ ބާއްވަނީ !

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ، ފެކަލްޓީ އޮފް ހެލްތް ސައިންސަސްގައި ގާއިމުކޮށްފައިވާ ގޮފި ހީލަރސްގެ ފަރާތުން ސިލްސިލާކޮށް ބާއްވަމުން އަންނަ ހީލަރސް ޝޯވ އަހަރުތަކެއްގެ މެދުކެނޑުމަކަށްފަހު މިއަންނަ ހުކުރު ދުވަހުގެ ރޭ ބޭއްވުމަށް ނިންމައިފިއެވެ.

ހީލަރސްގެ ފަރާތުން އެންމެ ފަހުން މި ޝޯވ ބާއްވާފައިވަނީ 2019 ވަނަ އަހަރެވެ. އޭގެ ފަހުން ކޮވިޑާ ގުޅިގެން 2 އަހަރު ދުވަހުގެ މެދުކެނޑުމަކަށްފަހު މިމަހުގެ 30 ވަނަ ދުވަހު ޝޯވ ބޭއްވުމަށް ހަމަޖެހިފައިވަނީ އެފް.އެޗް.އެސް ކޮންފަރެންސް ހޯލުގައެވެ.

ހީލަރސް ޝޯވ ބޭއްވުމުގެ މައިގަނޑު މަގުސަދަކީ ދަރިވަރުންގެ ހުނަރުތައް ދައްކާލުމަށް ފުރުސަތު ދިނުމާއި އެކުވެރި މަޖާ މާހައުލެއްގެ ތެރެއިން ދަރިވަރުންގެ ގުޅުން ބަދަހިކުރުމެވެ. މިޝޯވގައި އެފް.އެޗް.އެސްގެ ދަރިވަރުންގެ އިތުރުން އެހެން ފެކަލްޓީގެ ދަރިވަރުންނަށްވެސް ތަފާތު އައިޓަމްތައް ހުށަހެޅުމުގެ ފުރުސަތުވަނީ ހުޅުވާލެވިފައެވެ. ކޮންމެ އަހަރަކުވެސް މި ޝޯވ އަށް ތީމެއް ކަނޑައަޅައެވެ. އެގޮތުން މިއަހަރުގެ ތީމަކީ ”ބެކް ޓު ނައިންޓީސް“ އެވެ.

މި ޝޯވ ބަލާލުމަށް ވަނުމުގެ ފުރުސަތު ޔުނިވަރސިޓީގެ ހުރިހާ ދަރިވަރުންނަށް ވަނީ ހުޅުވާލާފައެވެ. އަދި މިފަދަ ޝޯވތަކަށް އަބަދުވެސް ދަރިވަރުންގެ ތަރުހީބު ލިބެއެވެ.

ހީލަރސް ޝޯވ އަކީ މުޅި އެފް.އެޗް.އެސްގައި ވެސް ބޭއްވޭ އެންމެ ފޯރިގަދަ ހަރަކާތެވެ.