ފެކަލްޓީ އޮފް ހެލްތް ސައިންސްގެ ގޮފި ހީލާރސްއިން މިއަހަރުގެ ފުރަތަމަ ސެމިސްޓާރގެ ލީޑާރސް ޓްރިޕް ބާއްވައިފިއެވެ.
މި ސެމިސްޓާގެ ދަތުރު ގޮސްފައިވަނީ 17 މާރިޗް ވީ ހުކުރު ދުވަހު ހެނދުނު 7:00 އިން 11:00 އަށް ވިލިނގިލި ވޯޓާރ ސްޕޯޓްސް ބީޗަށެވެ. މި ޓާމުގައި ހީލާރސް އަށް އަލަށް ގުޅުނު އިސްވާރުންނަށް އަމާޒުކޮށްގެން ދެވުނު މި ދަތުރުގައި ޖުމްލަ 26 އިސްވާރުން ވަނީ ބައިވެރިވެފައެވެ. އޭގެ އިތުރުން ހީލާރސްގެ ފަރާތުން ދެވިގެންދިޔަ ހާއްސަ ދައުވަތެއް ގަބޫލުކޮށް ސިއާ ( ސްޓޫޑަންޓް ޔޫނިއަންގެ ފެކަލްޓީ އޮފް އާޓްސް ގެ ގޮފި) އިންވެސް ވަނީ މި ދަތުރުގައި ބައިވެރިވެފައެވެ.
މިދަތުރުގެ މައިގަނޑު މަގުސަދަކީ އައު އިސްވާރުންނާއި ކުރީގެ އިސްވާރުންގެ މެދުގައި އެކުވެރިކަން އުފެއްދުމެވެ. އަދި ހަމަ އެހެންމެ އިސްވާރުންނާއި ހީލާރސްގެ ހިންގާ ކޮމެޓީގެ މެންބަރުންގެ މެދުގައި އޮތް ގުޅުންވެސް އިތުރަށް ވަރުގަދަކޮށް، މަޖާ މާހައުލެއްގެ ތެރެއިން، އެކިއެކި ކުޅިވަރުތައް ކުރިއަށް ގެންދިއުމެވެ. މި ކުޅިވަރުތަކުގެ ތެރެއިން ތަފާތު މިޒާޖުގެ މީހުންނާ ގުޅިގެން މަސައްކަތް ކުރަން ކުދިންނަށް ދަސްވެގެން ދިޔައެވެ.
ހެނދުނުގެ ނާސްތާއަށްފަހު ދެން ކުރިއަށް ގެންދެވުނީ ހީލާރސް އިން މިއަހަރު ކުރިއަށް ގެންދަން ހަމަޖެހިފައި ހުރި ބައެއް ހަރަކާތްތަކާ ބެހޭގޮތުން އިސްވާރުންގެ ހިޔާލުފާޅުކުރުމެވެ. އަދި ހަމަ މިވަގުތުގައި ހީލާރސްގެ ހިންގާ ކޮމެޓީއިންވަނީ އެންމެ އަވަހަށް ކުރިއަށް ގެންދަން ހަމަޖެހިފައިވާ ”ހީލާރސް މާހެފުމަށް“ ހުރިހާ އިސްވާރުންނަށް ދައުވަތު އަރުވާފައެވެ.
މި ދަތުރުގައި ކުޅެވިގެން ދިޔަ ފޯރިގަދަ ކުޅިވަރުތަކުގެ ތެރެއިން ”ރަތް ކުކުޅު“ މި ކުޅިވަރަށް ވަރަށް ތަރުހީބު ލިބިގެން ދިޔައެވެ. މިފަދަ އެތައް ހަރަކާތްތަކަކާއެކު ނިންމާލެވުނު މި ދަތުރަކީ ހުރިހާ ބައިވެރީންނަށްވެސް ހަނދާނުން ފިލައިގެން ނުދާނޭ ދަތުރަކަށް ވެގެން ދާނެކަމަށް އުންމީދުކުރަމެވެ.
ހީލާރސް އިން ކުރިއަށް ގެންދާ މިފަދަ ހަރަކާތްތަކަށް ހީލާރސްގެ އިސްވާރުންގެ ފުރިހަމަ އެއްބާރުލުން އަބަދުވެސް ލިބިގެންދެއެވެ.
