ފެކަލްޓީ އޮފް ހެލްތް ސައިންސަސްގެ ދެވަނަ ސެމިސްޓާރގެ އޮރިއެންޓޭޝަން ބާއްވައިފި

ފެކަލްޓީ އޮފް ހެލްތް ސައިންސަސް (އެފް.އެޗް.އެސް)އަށް ދެވަނަ ސެމިސްޓަރގައި އަލަށް ގުޅުނު ދަރިވަރުންނަށް އަމާޒުކޮށްގެން އޮރިއެންޓޭޝަން ބާއްވައިފިއެވެ.

26 އޮގަސްޓް ވީ ހޯމަ ދުވަހު އެފް.އެޗް.އެސް އޮޑިޓޯރިއަމްގައި ބޭއްވި މި އޮރިއެންޓޭޝަންގައި، އެފް.އެޗް.އެސްގެ ޑީން ޑރ. އައިޝަތު ޝަނޫރާ އާއި ލެކްޗަރާއިންގެ އިތުރުން ހީލާރސްގެ ހިންގާ ކޮމެޓީގެ މެމްބަރުން ވަނީ  ބައިވެރިވެފައެވެ. މި ސެމިސްޓަރގައި އަލަށް މި ފެކަލްޓީއަށް ގުޅުނު ގިނަ ދަރިވަރުން ބައިވެރިވި މި އޮރިއެންޓޭޝަންގައި އޮންލައިންކޮށް ވެސް ބައެއް ދަރިވަރުން ވަނީ ބައިވެރިވެފައެވެ.

މިއޮރިއެންޓޭޝަންގައި ފެކަލްޓީގެ ޑީން އައިޝަތް ޝަނޫރާ ދަރިވަރުންނާ މުޙާތަބުކުރައްވާ ދެއްކެވި ވާހަކަ ފުޅުގައިވަނީ ތައުލީމީ ހަޔާތުގައި ކިޔެވުމުގެ އިތުރުން އިތުރު ހަރަކާތްތަކުގައި އުޅުމުގެ މުހިންމުކަން ފާހަގަކުރެއްވިއެވެ. ހަމަ އެހެންމެ އާ ރައްޓެހިން ހޯދައި، ކަންކަމުގައި އިސްނަގައި ލީޑާޝިޕް ހުނަރުތަރައްގީ ކުރަންވާނެކަމަށް ޑީން ވިދާޅުވިއެވެ. މި އޮރިއެންޓޭޝަންގައި  އެފް.އެޗް.އެސްގެ އެކި ޑިޕާރޓްމަންޓުތަކުގެ ތައާރަފަކަށް ފަހު، ހީލާރސް އިންވަނީ ސްޓޫޑަންޓް ޔޫނިއަން އަދި ހީލާރސް އާއި ގުޅޭ މުހިންމު މައުޟޫމާތުތައް ހިއްސާކޮށްފައެވެ.

ހީލާރސްގެ ފަރާތުން ވަނީ މީގެ ކުރިން ހީލާރސް އިން ކުރިއަށްގެންދެވުނު ބައެއް ހަރަކާތްތަކާއި ކުރިއަށް ރޭވިފައި ހުރި ހަރަކާތްތަކަށް އަލިއަޅުވާލާފައެވެ. އަދި ހީލަރސް އިން އެންމެ އަވަހަށް ބޭއްވުމަށް ހަމަޖެހިފައިވާ ”ވެލްކަމް ނައިޓަށް“ ހުރިހާ ދަރިވަރުންނަށް ހީލާރސްގެ ފަރާތުން ދައުވަތު އެރުވިއެވެ.

އެފް.އެޗް.އެސްގެ އޮރިއެންޓޭޝަނަކީ އަބަދުވެސް ހީލާރސްގެ ފަރާތުން ބައިވެރިވަމުން އަންނަ ހަރަކާތެކެވެ.