ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮތްޕެއް ކަމަށްވާ ’މެޑިކޯސް‘ އާއި މޯލްޑިވްސް ބްލަޑް ސާރވިސެސްއާއި ގުޅިގެން ބޭއްވި ލޭ ހަދިޔާ ކުރުމުގެ ކެމްޕެއިން ވަރަށް ކާމިޔާބު ކަމާއެކު ނިންމާލައިފިއެވެ.
19 މާރިޗު 2022 ވީ ހޮނިހިރު ދުވަހުގެ ހެނދުނު 10:00 ން ހަވީރު 16:00 އަށް މޯލްޑިވްސް ބްލަޑް ސާރވިސްގައި ބޭއްވި މި ކެމްޕެއިނަކީ މެޑިކޯސް ވުޖޫދަށް އައުމަށްފަހު ބޭއްވުނު ފުރަތަމަ ލޭ ހަދިޔާ ކުރުމުގެ ކެމްޕެއިނެވެ.
’ރޯލް އަޕް ޔުއަރ ސްލީވްސް، ސޭވް އަ ލައިފް‘ މި ޝިއާރުގެ ދަށުން ފެށި މި ހަރަކާތް މިފަހަރު އަމާޒުކޮށްފައިވަނީ ސްކޫލް އޮފް މެޑިސިން ގެ ދަރިވަރުންނާއި ލެކްޗަރަރއިންނާއި މުއައްޒަފުންނާއި ދިވެހިރާއްޖޭގެ ޤައުމީ ޔުނިވާސިޓީގެ އެހެނިހެން ފެކަލްޓީތަކު ދަރިވަރުންގެ ތެރެއިން ލޭ ހަދިޔާ ކުރުމަށް ޝަރުތު ހަމަވާ ފަރާތްތަކަށެވެ.
މެޑިކޯސް އިން ހިންގި މި ހަރަކާތަކީ ލޭ ލިބުމުގެ ދަތިކަމަށް ހައްލު ހޯދައިދިނުމުގެ އަމާޒުގައި ހިންގުނު ހަރަކާތެކެވެ. އެގޮތުން އަހަރަކު 4 ފަހަރު މީގެ ’ބްލަޑް ޑްރައިވް‘ ބާއްވަން ވަނީ ނިންމާފައެވެ. އެގޮތުން ’ބްލަޑް ޑްރައިވް‘ ބޭއްވިގެންދާނީ ކޮންމެ 3 މަހަކުން އެއް މަހުގައެވެ. އެއީ އިންސާނާގެ ހަށިގަނޑުގައި ލޭ އުފެއްދުމަށް 120 ދުވަސް (3 މަސް) ބޭނުންވާތީއެވެ. މިކަމުގެ ސަބަބުން ލޭ ހަދިޔާ ކުރަން ބޭނުން ފަރާތްތަކަށް ދާއިމީ ގޮތެއްގައި ލޭ ހަދިޔާ ކުރެވޭނެ ފަސޭހަ ނިޒާމެއް އެކުލެވިގެން ދާނެއެވެ. އަދި ލޭ ހަދިޔާ ކުރުމަށް ގިނަބަޔަކަށް ހިތްވަރު ދިނުމާއި ކުރިން ލޭ ހަދިޔާ ނުކުރާ މީހުން ލޭ ހަދިޔާ ކުރަން ޝައުގުވެރިކޮށް ލޭ ހަދިޔާ ކުރުމުގެ މަގު ފަހިކޮށްދިނުމަކީވެސް މެޑިކޯސްގެ މި ކެމްޕެއިންގެ ބޮޑު އަމާޒެކެވެ.
މި ހަރަކާތުގައި ސްކޫލް އޮފް މެޑިސިން ގެ ދަރިވަރުންނާއި ލެކްޗަރަރ އިން ލޭ ހަދިޔާ ކުރިއިރު، ލޭ ހަދިޔާ ކުރަން ބޭނުން ނަމަވެސް އެކި ސަބަބު ތަކާހެދި ލޭ ހަދިޔާ ނުކުރެވޭ ކުދިން ތިބިކަން މި ހަރަކާތުގެ ސަބަބުން ހާމަވެގެން ދިޔައެވެ. ދިވެހިރާއްޖޭގައި ލޭ ލިބުމުގެ ދަތިކަން އިންތިހާއަށް ބޮޑު ވެފައިވާ މި ދަނޑިވަޅުގައި މެޑިކޯސްއިން ފެށި މި ހަރަކާތުގެ ސަބަބުން ލޭ ލިބުމުގެ ދަތިކަމަށް ކޮންމެވެސް ވަރެއްގެ ހައްލެއް ލިބޭނެކަމަށް ޤަބޫލުކުރެވެއެވެ. އަދި މި އަންނަ ޖޫން މަހު ބޭއްވޭ ބްލަޑް ޑްރައިވް ގައި ގިނަ އަދަދެއްގެ ފަރާތްތަކުން ބައިވެރިވާނެ ކަމުގެ އުންމީދުވެސް ވަރަށް ބޮޑެވެ.
