ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ގޮފިތައް ކަމަށްވާ މެޑިކޯސް، ހީލާރސް އަދި ނިޔަރެސް އިން ދުނިޔޭގެ ސިއްހަތުގެ ދުވަސް ކުލަގަދަކޮށް ފާހަގަކޮށްފިއެވެ.
މި ދުވަސް ފާހަގަ ކޮށްފައިވަނީ 7 އޭޕްރިލް 2022 ވީ ބުރާސްފަތި ދުވަހުން ފެށިގެން 9 އޭޕްރިލް 2022 ވީ ހޮނިހިރު ދުވަހާ ހަމައަށް ސިއްހަތާއި ގުޅޭ އެކިއެކި ހަރަކާތްތައް ބާއްވައިގެންނެވެ.
އެގޮތުން ހީލާރސްއިން މިދިޔަ އަހަރެކޭވެސް އެއްފަދައިން ”ހީލާރސް ރަން“ މިއަހަރުވެސް ބާއްވާފައިވެއެވެ. މިދުވުމުގައި ބައިވެރިވުމުގެ ފުރުސަތު ޤައުމީ ޔުނިވާރސިޓީގެ ހުރިހާ ދަރިވަރުންނާއި، ލެކްޗަރާއިން އަދި މުއައްޒަފުންނަށް ހުޅުވާލެވުނުއިރު, ދުވުން ނިންމި ފުރަތަމަ 5 ބައިވެރިންނަށް މެޑަލް ދިނުމުގެ އިތުރުން މި ދުވުމުގައި ބައިވެރިވި އެންމެހާ ދުވުންތެރިންނަށް ސެޓްފިކެޓްވެސް ހަވާލުކޮށްފައިވެއެވެ. އަދި މިދިޔަ އަހަރާއި އަޅާ ބަލާއިރު މިއަހަރު މި ހަރަކާތުގައި ބައިވެރިވެފައިވާ ފަރާތްތައް އިތުރުވެފައިވާކަމަށް ހީލާރސް އިން ފާހަގަކުރިއެވެ.
މީގެ އިތުރުން 8 އޭޕްރީލް 2022 ވީ ހުކުރު ދުވަހު ހަވީރު, މެޑިކޯސް އިން ”ހެލްތް އެން ފަން“ ގެ ނަމުގައި ހެލްތް ސްކްރީނިންގ އާއި ކުޑަކުދިންގެ ހަރަކާތްތަކެއް ސޯޝަލް ސެންޓަރގައި ކުރިއަށްގެންދިޔައެވެ. މިހަރަކާތުގައި ހަކުރު ބެލުމާއި، ލޭގެ ޕްރެޝާރ ބެލުމާއި، ބަރުދަނާއި އިސްކޮޅު އަދި ނަފްސާނީ ދުޅަހެޔޮކަން ބެލުމަށް ހާއްސަ ސްޓޯލްތަކެއް ހިންގާފައިވެއެވެ. އަދި މި ހަވީރުގާ ކުޑަކުދިންނަށް އަމާޒުކޮށް ކުލަޖެއްސުމާއި ކުޅިވަރުތަކެއްވެސް ކުރިއަށް ގެންގޮސްފައިވެއެވެ. މިހަރަކާތަކީ އާއްމުންނަށް ހުޅުވާލައިގެން ކުރިއަށްގެންދެވުނު ހަރަކާތެއް ނަމަވެސް, ހެލްތް ސްކްރީން މައިގަނޑު ގޮތެއްގައި އަމާޒުކޮށްފައިވަނީ އުމުރުން 30 އަހަރުން މަތީގެ ބޭފުޅުންނަށެވެ. އެއީ އެ އުމުރަކީ ދިގު މުއްދަތަކަށް ބޭސްކުރާ ބަލިތައް ދެނެގަނެވޭނެ އެންމެ އަވަސް އުމުރަށް ވުމާއެކު މިކަހަލަ ހަރަކާތެއްގެ ތެރެއިން ބަލި އަވަހަށް ދެނެގަނެ ލަސްނުކޮށް ފަރުވާ ފެށުމުގެ ފުރުސަތު ފަހިވެގެންދާނެތީއެވެ.
ސްކޫލް އޮފް ނާރސިންގެ ގޮފި ނިއަރެސްގެ ފަރާތުން އިންތިޒާމްކުރި “ދަ ރައިޓް ގެސް“ ސުވާލު މުބާރާތް ފެކަލްޓީތަކަށް އަމާޒުކޮށްގެން 09 އޭޕްރީލް ވީ ހޮނިހިރު ދުވަހު ސެންޓްރަލް އޮޑިޓޯރިއަމްގައި ކުރިއަށް ގެންދެވުނުއިރު، މި މުބާރާތުގައި އެމް.އެން.ޔޫގެ 4 ފެކަލްޓީއަކުން ޓީމުތައް ބައިވެރިވެފައިވެއެވެ. މި ސުވާލު މުބާރާތުގައި ހިމެނުނީ މިއަހަރުގެ ސިއްހަތު ދުވަހުގެ ޝިޢާރާ ގުޅޭ ސުވާލުތަކާއި، ސިއްހަތާ ގުޅޭ އާއްމު މައުލޫމާތުގެ ސުވާލުތަކެވެ. މި މުބާރާތުން މޮޅުވީ ސްކޫލް އޮފް މެޑިސިންގެ ޓީމް – މެޑިކޯސް އެވެ. މުބާރާތުން މޮޅުވި ފަރާތަށް އިނާމެއްގެ ގޮތުން ގިފްޓް ހެމްޕަރއެއް ހަދިޔާ ކޮށްފައިވެއެވެ. އަދި މި މުބާރާތުގައި ބައިވެރިވި ހުރިހާ ފަރާތްތަކަށް ސެޓްފިކެޓު ހަވާލުކޮށްފައިވެއެވެ.
ދުނިޔޭގެ ސިއްހަތު ދުވަސް ފާހަގަކޮށް ނިންމުމުގެ ރަސްމިއްޔާތު ބާއްވާފައިވަނީ 9 އޭޕްރީލް 2022 ވީ ހޮނިހިރު ދުވަހެގެ ރޭ ސެންޓްރަލް އޮޑިޓޯރިއަމްގައެވެ. މި ރަސްމިއްޔާތުގައި އެމް.އެން.ޔޫގެ އިސްވެރިންނާއި އެމް.އެން.ޔޫ.އެސް.ޔޫގެ ހިންގާ ކޮމިޓީގެ ބޭފުޅުން ބައިވެރިވެފައިވެއެވެ. އަދި މިދުވަސް ނިންމާލުމުގެ ގޮތުން އެކިއެކި ހަރަކާތްތަކުގައި ބައިވެރިވި ފަރާތްތަކުގެ އަގު ވަޒަން ކުރުމަށް ސެޓްފިކެޓާއި އިނާމް ހަވާލުކޮއްފައިވެއެވެ.
