ދިވެހިރާއްޖޭގެ ޤައުމީ ޔުނިވާރސިޓީގެ ދަރިވަރުންގެ ޔޫނިއަން އިން ސްކޫލް އޮފް މެޑިސިންގައި ޤާއިމުކޮށްފައިވާ ގޮފި ”މެޑިކޯސް“ އިން ޗެސް މުބާރާތެއް ބާއްވައިފިއެވެ. މި މުބާރާތް ބާއްވާފައިވަނީ ދިވެހިރާއްޖޭގެ ޗެސް އެސޯސިއޭޝަނާ ގުޅިގެންނެވެ. މި ޗެސް މުބާރާތަކީ ދަރިވަރުންގެ ޔޫނިއަންގެ ތާރީޚުގައި ބޭއްވި ފުރަތަމަ ޗެސް މުބާރާތެވެ.
މެޑިކޯސްއަކީ ބޮޑަށް އިލްމީ ގޮތުން ފާހަގަ ކޮށްލެވޭ ބަޔަކަށް ވާއިރު މިއީ މެޑިކޯސް އިން އިންތިޒާމްކުރި ފުރަތަމަ ކުޅިވަރު ހަރަކާތެވެ. 3 ދުވަހަށް ބަހާލައިގެން މިމަހު 22ން 24އަށް މުބާރާތް ކުރިއަށް ގެންދިޔައިރު މުބާރާތަށް ވަރަށް ބޮޑު ތަރުހީބެއް ލިބުނެވެ. އެގޮތުން 32 ދަރިވަރުން ޔުނިވާރސިޓީގެ އެކި ފެކަލްޓީތަކުން މުބާރާތުގައި ބައިވެރިވިއެވެ. ބައިވެރިންގެ ތެރެއިން 1ވަނަ، 2ވަނަ އަދި 3ވަނަ ހޮވުމުގެ އިތުރުން މުޅި މުބާރާތުން އެންމެ މޮޅު ފެކަލްޓީވެސް ހޮވާފައިވެއެވެ.
މުޅި މުބާރާތުގެ ފަޚުރުވެރި އެއްވަނަ ހޯދާފައިވަނީ ސެންޓަރ ފޯރ ފައުންޑޭޝަން ސްޓަޑީސްގެ ދަރިވަރު ޖަސޫރް އަފްޒަލެވެ. އަދި ދެވަނަ އެމް.އެން.ޔޫ ބިޒްނަސް ސްކޫލްގެ ދަރިވަރު އަހުމަދު އިފްލާހް ސަލީމް ހޯދާފައިވާއިރު ތިންވަނަ ހޯދާފައިވަނީ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޑަޑީޒްގެ ދަރިވަރު އަދި އެމް.އެން.ޔޫ.އެސް.ޔޫގެ ރައީސް ހުސައިން ޒައިދެވެ.
މުޅި މުބާރާތުގެ އެންމެ މޮޅު ފެކަލްޓީ އަކަށް ހޮވިގެންދިޔައީ ސެންޓަރ ފޯރ ފައުންޑޭޝަން ސްޓަޑީސްއެވެ.
މުބާރާތް ކުރިއަށް ގެންގޮސްފައިވަނީ ސުވިސް ފޯމެޓަށެވެ. މިއީ ދަރިވަރުންނަށް އިތުރު ފުރުސަތުތައް ހޯދައިދީ، ކުދިންގެ މެދުގައި ޗެސްގެ ރޫހު ދިރުވުމުގެ ބޭނުމުގައި އިންތިޒާމުކުރެވުނު ހަރަކާތެކެވެ. އެގޮތުން މޯލްޑިވްސް ޗެސް އެސޯސިއޭޝަނުން މުބާރާތުގައި ބައިވެރިވި ހުނަރުވެރި ކުޅުންތެރިން ފާހަގަކޮށް އެކުދިންނަށް ހިތްވަރުދީ ޤައުމީ ފެންވަރުގައި ކުޅެން ފުރުސަތު ހުޅުވާލާފައިވާކަން ފާހަގަކޮށްލެވެއެވެ. މި މުބާރާތް ސްޕޮންސަރ ކޮއްފައިވަނީ ޕާރޓްސް ބައި ދަ މެކޭނިޒަމް އަދި ޑަންކް މޯލްޑިވްސް އިންނެވެ.
