ޔޫ.އެން.- މައިގްރޭޝަންގެ ”އިންޓަރނޭޝަނަލް އޯރގަނައިޒޭޝަން ފޯރ މައިގްރޭޝަން“- އައި.އޯ.އެމް އިން ބޭއްވި ހެލްތް ސްކްރީނިންގ އިވެންޓުގައި، މިޝަން ފޯރ މައިގްރޭންޓް ވޯރކާސް- ’އެމް.އެމް.ޑަބްލިޔު.އެމް‘ ގެ ފަރާތުން މެޑިކޯސްގެ ވޮލަންޓިއަރުން ބައިވެރިވެއްޖެއެވެ.
މިހަރަކާތަކީ ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނަށް އަމާޒުކޮށްގެން ބޭއްވުނު ހަރަކާތެކެވެ. ހުޅުމާލޭ ސެންޓްރަލް ޕާރކުގައި އޮތް މިހަރަކާތުގައި ހެލްތް ސްކްރީނީންގ ހަރަކާތްތަކުގެ އިތުރުން ބިދޭސީންނަށް މުނިފޫހި ފިލުވުމުގެ ހަރަކާތްތައް ވެސް ވަނީ ބާއްވާފައެވެ.
ސްކޫލް އޮފް މެޑިސިންގައި ކިޔަވަމުންދާ 16 ދަރިވަރަކު އެމް.އެމް.ޑަބްލިޔު.އެމް ގެ ފަރާތުން މިހަރަކާތުގައި ވޮލަންޓިއަރ ކޮށްފައި ވެއެވެ. މިދަރިވަރުން ވަނީ މިހަރަކާތަށް ތަން ތައްޔާރު ކުރުމާއި، ހަރަކާތް ރާވާ ހިންގުމުގައި ހަރަކާތްތެރިވެފައެވެ. އަދި ހަރަކާތުގެ ތެރެއިން ބިދޭސީ މަސައްކަތްތެރީންގެ ރެޖިސްޓްރޭޝަނާއި، ބަރުދަން ބެލުމާއި، ލޭގެ ޕްރޭޝަރ އަދި ހަކުރު ހުރި މިންވަރު ބެލުން ފަދަ ކަންކަމުގައި ދަރިވަރުން ވަނީ ޢަމަލީ ގޮތުން ބައިވެރިވެފައެވެ. މި ހަރަކާތުގައި ޑޮކްޓަރަށް ދެއްކުމާއި ބޭސް ދޫކުރުމުގެ އިންތިޒާމް ހަމަޖެހިފައިވާކަންވެސް ފާހަގަކޮށްލަމެވެ.
މިހަރަކާތުގައި ’އެމް.އެމް.ޑަބްލިޔު.އެމް‘ ގެ އިތުރުން ’ސޮސައިޓީ ފޯރ ހެލްތް އެޑިއުކޭޝަން‘ -ޝީ، ’ޕީއައިއެލްސީ‘ އަދި ހިއުމަން ރައިޓްސް ކޮމިޝަނުންވެސް ބައިވެރިވެފައި ވެއެވެ.
މިހަރަކާތުގެ ތެރެއިން މެޑިކޯސްގެ ވޮލަންޓިއަރުންގެ އެހީތެރިކަމާއިއެކު ’އެމް.އެމް.ޑަބްލިޔު.އެމް‘ އިން ވަނީ 2 ގަޑިއިރުގެ ތެރޭގައި 140 އަށް ވުރެށް ގިނަ ބިދޭސީން ސްކްރީންކޮށްފައެވެ. މިފަދަ ގިނަ ހަރަކާތްތަކެއްގައި އެޖަމިއްޔާއާއެކު، މިދިޔަ އަހަރުން ފެށިގެން މެޑިކޯސްއިން އަންނަނީ ބައިވެރިވަމުންނެވެ.
