މިއަހަރުގެ ދުނިޔޭގެ ސިއްހަތު ދުވަސް، މެޑިކޯސް، ނިއަރެސް އަދި ހީލަރސް ގުޅިގެން ކުލަގަދަކޮށް ފާހަގަ ކުރުމަށް ނިންމައިފިއެވެ. މި ނިންމުން ނިންމާފައިވަނީ 3 ގޮފީގެ ހިންގާ ކޮމިޓީއިން ބޭއްވި ބައްދަލުވުމެއްގައެެވެ.
އެގޮތުން ހީލަރސް އިން އިސްނަގައިގެން، ”އެމް.އެން.ޔޫ.އެސް.ޔޫ ހީލާރސް ރަން“ މިއަހަރުވެސް ބޭއްވުމަށް ވަނީ ހަމަޖެހިފައެވެ. މި ހަރަކާތް ބޭއްވުމަށް ހަމަޖެހިފައިވަނީ އޭޕްރިލް 26 ން 28 އަށެވެ.
ދުނިޔޭގެ ސިއްހަތު ދުވަހުގެ ހަރަކާތްތަކުގެ ތެރެއިން މެޑިކޯސްގެ ފަރާތުން ބާއްވާ ”މެޑިކޯސް ހެލްތް އެންޑް ފަން“ ހަވީރު މިއަހަރުވެސް ބޭއްވުމަށް ވަނީ ހަމަޖެހިފައެވެ. މި ހަރަކާތް ބޭއްވުމަށް ހަމަޖެހިފައިވަނީ އޭޕްރީލް 28 ވާ ހުކުރު ދުވަހުގެ ހަވީރު 16:00 އިން 18:00 އަށެވެ. މިހަރަކާތުގެ ތެރެއިން ހެލްތު ސްކްރީނިންގ ޕްރޮގްރާމްގެ އިތުރުން ކުޑަކުދިންނަށް ޚާއްސަ މަޖާ ސްޓޯލްތަކެއް ކުރިޔަށް ގެންދިޔުމަށް ވަނީ ހަމަޖެހިފައެވެ.
ހަމަ އެއާއެކު ސްކޫލް އޮފް ނާރސިންގެ ގޮފި ނިއަރެސްގެ ފަރާތުން އިންތިޒާމްކުރާ “ބެޓްލް އޮފް ބްރެއިން“ ސުވާލު މުބާރާތް 27 އޭޕްރީލް ވާ ބުރާސްފަތި ދުވަހު ސީ.އޭ އޮޑިޓޯރިއަމްގައި ކުރިއަށް ގެންދިއުމަށް ރޭވިފައިވާއިރު، މި މުބާރާތުގައި ބައިވެރިވުމުގެ ފުރުސަތު މިހާރުވަނީ ހުޅުވާލައިފައެވެ. މިސުވާލު މުބާރާތުގައި ހިމެނޭނީ މިއަހަރުގެ ސިއްހަތު ދުވަހުގެ ޝިޢާރާ ގުޅޭ ސުވާލުތަކާއި، ސިއްހަތާ ގުޅޭ އާއްމު މައުލޫމާތުގެ ސުވާލުތަކެވެ. މި މުބާރާތް ކުރިއަށްގެންދިއުމަށް ހަމަޖެހިފައިވަނީ އިންޓަ ފެކަލްޓީ މުބާރާތެއްގެ ގޮތުގައިކަމުން، ކޮންމެ ފެކަލްޓީ އަކުންވެސް ބައިވެރި ކުރެވޭނީ 5 ކުދިންގެ އެއް ގުރޫޕެވެ. ޖުމުލަ 5 ބުރަކަށް ބަހާލައިގެން ކުރިއަށް ގެންދާ މިސުވާލު މުބާރާތުގައި ބައިވެރިވާ ޓީމްތަކަށް ސެޓްފިކެޓް ދެވޭނެއެވެ.
މީގެއިތުރުން އާންމުން ހޭލުންތެރި ކުރުމަށްޓަކައި މިއަހަރުގެ ދުނިޔޭގެ ސިއްހަތު ދުވަހުގެ ޝިޢާރު ކަމުގައިވާ “ހެލްތް ފޯރ އޯލް“ އާ ގުޅޭގޮތުން ތަފާތު މައުލޫމާތުތައް ހިމެނޭ ޕޯސްޓާރސް ކޮންމެ ގޮތްޕެއްގެވެސް ފޭސްބުކް ޕޭޖުން އާއްމުކުރެވިގެންދާނެއެވެ.
ދުނިޔޭގެ ސިއްހަތުދުވަހުގެ މުނާސަބަތާ ގުޅުވައިގެން ކުރިއަށް ގެންދާ ހަރަކާތްތަކުގައި ވީހާވެސް ގިނަ ދަރިވަރުން ބައިވެރިވުމަކީ މެޑިކޯސް، ނިއަރެސް އަދި ހީލާރސްގެ ވަރަށް ބޮޑު އެދުމެކެވެ.
ސިއްހަތު ދުވަހާ ގުޅިގެން ބާއްވާ ހާއްސަ ޖަލްސާ އާއި ދުވަހާ ގުޅިގެން ކުރިއަށްގެންދެވުނު އެކިއެކި ހަރަކާތްތަކުގެ ނަތީޖާ ފާޅުކުރުން 29 އޭޕްރީލް ވާ ހޮނިހިރު ދުވަހުގެ ރޭ ބޭއްވުމަށް ވަނީ ހަމަޖެހިފައެވެ.
މިއީ ސިއްހީ ދާއިރާއާ ގުޅުންހުރި 3 ގޮފި ގުޅިގެން ދުނިޔޭގެ ސިއްހަތު ދުވަސް ފާހަގަކުރާ 3 ވަނަ ފަހަރެވެ. އެންމެ ފުރަތަމަ މިފަދަ ގޮތަކަށް މިދުވަސް ފާހަގަ ކޮށްފައިވަނީ 2021 ވަނަ އަހަރުއެވެ.
