މެޑިކޯސްގެ ވޮލީ ޓީމުތަކަށް ޖަރޒީ ހަވާލުކުރުމުގެ ރަސްމިއްޔާތު ބާއްވައިފި

”އެމް.އެން.ޔޫ.އެސް.ޔޫ އިންޓަރ–ފެކަލްޓީ ވޮލީބޯލް ޓޯރނަމެންޓް 2023″ ގައި ސްކޫލް އޮފް މެޑިސިންގެ ފަރާތުން ވާދަކުރާ ޓީމުތަކަށް ޖާރޒީ ހަވާލުކުރުމުގެ ރަސްމިއްޔާތު ހޯމަ ދުވަހު ބާއްވައިފިއެވެ.

މިރަސްމިއްޔާތު ބޭއްވިފައިވަނީ ހޯމަ ދުވަހުގެ ހަވީރު ދަރުމަވަންތަ ހޮސްޕިޓަލުގެ 14 ވަނަ ފަންގިފިލާގައެވެ.

މިރަސްމިއްޔާތުގައި ޓީމުގެ ކުޅުންތެރިންނާއި އޮފިޝަލުންގެ އިތުރުން، މެޑިކޯސްގެ ހިންގާ ކޮމިޓީގެ މެންބަރުން ވަނީ ބައިވެރިވެފައެވެ. މިގޮތުން މިރަސްމިއްޔާތުގައި ކުޅުންތެރިންނާއި އޮފިޝަލުންނަށް ޖާރޒީ ހަވާލުކޮށްދެއްވާފައިވަނީ، މެޑިކޯސްގެ މިދައުރުގެ ނައިބު ރައީސާ (އިތުރު ހަރަކާތް)، އާއިޝަތު ޒާރާއެވެ.

މިރަސްމިއްޔާތުގައި ކުޅުންތެރިންނާ މުޚާތަބުކޮށް، ފިރިހެން ޓީމުގެ ކެޕްޓަން ހަސަން ޝާމް، އަދި އަންހެން ޓީމުގެ ކެޕްޓަން ރަނާ މުހައްމަދު ސައީދުގެ އިތުރުން މެޑިކޯސްގެ ރައީސާ ފާޠިމަތު މާޙާ ވަނީ ވާހަކަ ދައްކާފައެވެ. އެގޮތުން، ކުޅުންތެރިންނަށް ހިތްވަރުދީ، މޮޅު ޑިސިޕްލިން ކުޅުމެއް ދެއްކުމަށް އެބޭފުޅުންގެ ވާހަކައިގައި އަލިއަޅުވާލާފައި ވެއެވެ.

މިހިނގާ މެއި މަހުގެ 15 ވަނަ ދުވަހު ފެށުނު މުބާރާތުގައި އެމް.އެން.ޔޫގެ 8 ފެކަލްޓީއަކުން ޓީމުތައް ބައިވެރިވެފައިވެއެވެ. މިގޮތުން މެޑިކޯސްގެ އަންހެން އަދި ފިރިހެން ޓީމު ބައިވެރިވާއިރު، ކޮންމެ ޓީމެއްގައި 12 ކުޅުންތެރިންނާ އެކު އޮފިޝަލުން ހިމެނެއެވެ. މިއީ އެމް.އެން.ޔޫ.އެސް.ޔޫ އިންޓަރ–ފެކަލްޓީ ވޮލީބޯލް ޓޯރނަމެންޓްގައި މެޑިކޯސް އިން ފިރިހެން ޓީމެއް ނެރޭ ފުރަތަމަ ފަހަރެވެ. އަދި މިއާއެކު އަންހެން އަދި ފިރިހެން ޓީމު ނިކުންނަ ފުރަތަމަ ފަހަރުވެސް މެއެވެ. މިމުބާރާތުގައި މެޑިކޯސްގެ އަންހެން ޓީމެއް ފުރަތަމަ ވާދަކުރީ 2022 ވަނަ އަހަރުއެވެ.