ހާލުގައި ޖެހިފައިވާ ފަލަސްޠީނުގެ ރައްޔިތުންނަށް އެހީތެރިވުމުގެ ގޮތުން މެޑިކޯސް އިން އިސްނަގައިގެން ކުރިޔަށް ގެންދާ ’މެޑިކޯސް ވިތު ފަލަސްޠީން‘ ކެމްޕޭނުގެ ތެރެއިން ބާއްވާ މޫވީ ނައިޓް މިރޭ ބާއްވަން ނިންމައިފިއެވެ. މި މޫވީ ނައިޓް ބޭއްވުމަށް ހަމަޖެހިފައިވަނީ މިރޭ 20:00 ގައި ގައުމީ ޔުނިވާސިޓީގެ ފެކަލްޓީ އޮފް އެޑިއުކޭޝަންގެ އޮޑިޓޯރިއަމްގައެވެ.
މި ހަރަކާތުގައި ދެއްކުމަށް ހަމަޖެހިފައިވަނީ 2021 ވަނަ އަހަރު އުފައްދާފައިވާ ”ފަރްހާ“ ނަމަކަށް ކިޔާ ފިލްމެކެވެ. މި ފިލްމަކީ ފަލަސްޠީނުގެ އަންހެން ކުއްޖަކު ތަޢުލީމު ހާސިލްކުރުމަށް ކުރަމުން ގެންދިޔަ މަސައްކަތާއި، އެގައުމުގައި ހިނގަން ފެށި ހަމަނުޖެހުންތަކުގެ ސަބަބުން، ތަނެއްގެ ތެރޭގައި ތަޅުލެވިގެން އޮންނަން ޖެހި، ދިމާވި އުނދަގޫ ހާދިސާތަށް ދައްކުވައިދޭ ފިލްމެކެވެ. މި ފިލްމު އެޅުވުމަށް މެޑިކޯސްއިން ނިންމާފައިވަނީ މިއަދުގެ ހާލަތާ ގުޅޭގޮތުން ހޭލުންތެރިކަން އިތުރުކުރުމަށެވެ.
މިރޭގެ ’މޫވީ ނައިޓަށް‘ ބޮޑު ތަރުހީބެއް ލިބި، ގިނަ ޓިކެޓްތަކެއް ދަނީ ވިކެމުންނެވެ. އަދި މިހާރުވެސް ޓިކެޓް ގަތުމުގެ ފުރުސަތުވަނީ ހުޅުވާލެވިފައެވެ. ޓިކެޓް ގަތުމަށް ވައިބާ ކުރާނީ 7900510 މި ނަންބަރަށެވެ. އަދި އޮންލައިން ޓްރާންސެކްޝަންތައް ހެދުމަށް ފައިސާ ފޮނުވުމަށް ހަމަޖެހިފައިވަނީ (7730000547904) މި އެކައުންޓަށެވެ. ޓިކެޓް ވިއްކުމަށް ހަމަޖެހިފައިވާ އަގަކީ 15ރ އެވެ.
މިރޭގެ ހަރަކާތް ހިނގާ ވަގުތު އޮޑިޓޯރިއަމްގެ ބޭރުން ބައެއް ކަހަލަ ލުއިކާނާ ގަންނަން ލިބެން ހުންނާނެއެވެ. އަދި ”މެޑިކޯސް ވިތު ފަލަސްޠީން“ ކެމްޕޭނުގެ ފަންޑު ފޮއްޓެއްވެސް އެސަރަހައްދުގައި ބެހެއްޓޭނެއެވެ. ވީހާ ވެސް ގިނަ ދަރިވަރުން މިހަރަކާތުގައި ބައިވެރިވުމަކީ މެޑިކޯސްގެ ވަރަށް ބޮޑު އެދުމެކެވެ.
