”މެޑިކޯސް ވިތު ފަލަސްޠީން“ ފަންޑްރައިސަރ އަށް ލިބުނު ފައިސާ ދިވެހި ރެޑް ކްރެސެންޓުގެ ފަލަސްޠީން ރިލީފް ފަންޑަށް ހަދިޔާ ކޮށްފިއެވެ. މި ފައިސާ ދިވެހި ރެޑް ކްރެސެންޓާ ހަވާލުކޮށްފައިވަނީ ނޮވެމްބަރ މަހުގެ 12 ވީ އާދިއްތަ ދުވަހުއެވެ.
”މެޑިކޯސް ވިތު ފަލަސްޠީން“ ފަންޑްރައިސަރ އަށް ވަނީ ބޮޑު ތަރުހީބެއް ލިބިފައެވެ. އެގޮތުން މިހަރަކާތަށް ޖުމްލަ -/16300 (ސޯޅަ ހާސް ތިން ސަތޭކަ) ދިވެހި ރުފިޔާ ލިބިފައި ވާއިރު، މިފައިސާ ވަނީ ދިވެހި ރެޑްކްރެސެންޓްގެ ފަލަސްޠީން ރިލީފް ފަންޑަށް މެޑިކޯސްގެ ފަރާތުން ހަދިޔާ ކޮށްފައެވެ.
މިހަރަކާތަކީ ފަލަސްޠީނުގެ ރައްޔިތުންނަށް އެހީވުމަށްޓަކާ އޮކްޓޯބަރ މަހުގެ 22 ވަނަ ދުވަހު ފެށުނު ހަރަކާތެކެވެ. މިހަރަކާތުގެ ތެރެއިން ދަރުމަވަންތަ ހަސްފަތާލުގެ 8 އަދި 14 ވަނަ ފަންގިފިލާގެ އިތުރުން، އެކި ދުވަސް މަތިން ގައުމީ ޔުނިވާސިޓީގެ ގޯތިތެރޭގައާއި، ދަރިވަރުންގެ ޔޫނިއަންގެ އޮފީހުގެ ތެރޭގައި ފަންޑު ފޮށިތައް ބެހެއްޓިފައިވެއެވެ. އަދި އޮންލައިން ޓްރާންސްފަރ މެދުވެރިކޮށްވެސް ފައިސާ ފޮނުވުމުގެ ފުރުސަތު ވަނީ ހުޅުވާލެވިގެން ގޮސްފައެވެ. މީގެ އިތުރުން މި ފަންޑަށް ފައިސާ ހޯދުމުގެ ގޮތުން މޫވީ ނައިޓެއްވެސް ބޭއްވިފައިވެއެވެ.
މިހަރަކާތް ކާމިޔާބު ކަމާއެކު ނިންމާލެވުނީ ސްކޫލް އޮފް މެޑިސިންގެ ދަރިވަރުންނާއި މުވައްޒަފުން އަދި އެހެން ފެކަލްޓީތަކުގެ ވެސް ވަރަށް ފުރިހަމަ އެހީތެރިކަމާއެކުއެވެ. ވަކިން ޚާއްސަކޮށް އެމްއެންޔޫ ބިސްނަސް ސްކޫލުގެ ދަރިވަރުންނާއި، ބީއެސްއެސްއޭ ގެ ފަރާތުން މިހަރަކާތަށް ލިބުނު ފުރިހަމަ އެއްބާރުލުން ފާހަގަކޮށް، މެޑިކޯސްގެ ފަރާތުންވަނީ އެފަރާތަށް ޚާއްސަ ޝުކުރެއް އަދާކޮށްފައެވެ. މެޑިކޯސްގެ އަމާޒަކީ އިންސާނިއްޔަތަށްޓަކާ ކުރެވޭ މިފަދަ މުހިންމު މަސައްކަތްތަކުގައި ކުރިޔަށް އޮތް ތާނގައިވެސް ބައިވެރިވުމެވެ.
