އެމް.އެން.ޔޫ.އެސް.ޔޫ- މެޑިކޯސް ހިދާޔަތު ދަރުސް ޕްރޮގްރާމްގެ ދެވަނަ ދަރުސް 22 މާރިޗް ވީ ހުކުރު ދުވަހު އެމް.އެން.ޔޫ ބިޒްނަސް ސްކޫލްގެ އޮޑިޓޯރިއަމްގައި ބާއްވައިފިއެވެ.
މި ދަރުސްގެ މައުޟޫޢަށް އިންސާފުކޮށްދެއްވާފައިވަނީ އައްޝައިޚް އާޒިމް ޚާލިދެވެ. ދަރުސްގެ މައުޟޫޢުއަކީ ”ހޮވާލެވިގެންވާ ހަތް ބައެއް“ މި މައުޟޫޢެވެ.
މި ދަރުހުގައި ޝައިޚް އާޒިމް ޚާލިދް ވަނީ ކީރިތި ރަސޫލާގެ ހަދީޘް ބަސްފުޅެއްގެ ތަފްސީލް އޮޅުންފިލުވައި ދެއްވާފައެވެ. މިގޮތުން ޤިޔާމަތް ދުވަހުން މާތް ﷲގެ އަރުޝީގެ ހިޔާވަހިކަން ލިބިގެންދާ ހަތް ފަރާތަކީ ކޮބާކަމާއި އެ ފަރާތްތަކާބެހޭ ތަފްސީލަށް އަލިއަޅުއްވައި ޝެއިޚް އާޒިމް ޚާލިދް ވަނީ ވާހަކަފުޅުދައްކަވާފައެވެ. މީގެއިތުރުން ފުރިހަމަ މުސްލިމަކަށް ވުމަށްޓަކައި މި ރަމަޟާންމަހު ފަސޭހަކަމާއެކު ކޮށްލެވިދާނެ ބައެއް ކަންކަމަށްވެސް ޝެއިޚް އަލިއަޅުއްވާލައްވާފައިވެއެވެ.
ދަރުސް ނިންމާލުމަށްފަހު ޝައިޚް ވަނީ އޯޑިއެންސްގެ ބައިވެރިންނަށް ސުވާލުކުރުމުގެ ފުރުސަތުދެއްވާ، ބައިވެރިންގެ ސުވާލުތަކަށް ޖަވާބުދެއްވާފައެވެ.
އެމް.އެން.ޔޫ.އެސް.ޔޫ-މެޑިކޯސް ހިދާޔަތު ދަރުސް ޕްރޮގްރާމަކީ މިއަހަރު މުޅިން އަލަށް މިރަމަޟާންމަހާ ދިމާކޮށް މެޑިކޯސްއިން ކުރިޔަށް ގެންދާ ހަރަކާތެކެވެ. މިހަރަކާތުގެ މައިގަނޑު މަޤްސަދަކީ ދަރިވަރުންގެ މެދުގައި ދީނީ ރޫޙް އާލާކޮށް، ދީނީ ޝިޢާރުތައް ދިރުވާ އާލާކުރުމެވެ.
މި ޕްރޮގްރާމްގެ ތެރެއިން ރަމަޟާންމަހުގެ ކޮންމެ ހަފްތާއަކުވެސް އެއް ދަރުސް ބޭއްވުމަށް ވަނީ ހަމަޖެހިފައެވެ. މިގޮތުން މިދިޔަ ހުކުރު ދުވަހުގެރޭ ވަނީ މިޕްރޮގްރާމުގެ ފުރަތަމަ ދަރުސް ބާއްވާފައެވެ. އަދި މި ދަރުހަށް ވަނީ ގިނަ ދަރިވަރުންތަކަކާއި އާންމުންގެ ތަރުހީބު ލިބިފައެވެ.
އެމް.އެން.ޔޫ.އެސް.ޔޫ-މެޑިކޯސް ހިދާޔަތު ދަރުސް ޕްރޮގްރާމުގެ ދަށުން ކުރިއަށްގެންދާ ދަރުސް އަޑުއައްސަވާލެއްވުމަށް ވަޑައިގެންނެވުމުގެ ފުރުސަތު ވަނީ އެމް.އެން.ޔޫގެ ހުރިހާ ދަރިވަރުންނާއި މުވައްޒަފުންގެ އިތުރުން އާންމުންނަށްވެސް ހުޅުވާލެވިފައެވެ.
