ސްކޫލް އޮފް މެޑިސިންގެ ގޮފި މެޑިކޯސް އިން އިސްނަގައިގެން ”ދި ސައިންސް އޮފް ޑްރަގް ޔޫސް ޑިސްއޯޑާސް“ ގެ ނަމުގައި ކުރިއަށް ގެންދިޔަ ޑްރަގް އެވެއާނެސް ސެޝަން ކާމިޔާބުކަމާއެކު ނިންމާލައިފިއެވެ.
މިދިޔަ އަންގާރަ ދުވަހުގެ ރޭ 20:00 އިން 22:00 އަށް އެމް.އެން.ޔޫ ސެންޓްރަލް އޮޑިޓޯރިއަމްގައި ކުރިއަށްގެންދިޔަ މި ސެޝަންގައި އެމްއެންޔޫގެ އެކި ފެކަލްޓީ ތަކުގެ ދަރިވަރުންގެ އިތުރުން ވިލާ ކޮލެޖްގެ ސައިކޮލޮޖީ އެސޯސިއޭޝަންގެ ދަރިވަރުންވެސް ބައިވެރިވެފައިވެއެވެ. މި ސެޝަން ނަގައިދެއްވަވާފައިވަނީ އެޑިކްޝަން ޕްރޮފެޝަނަލް އަދި ޑްރަގް ޑިމާންޑް ރިޑަކްޝަން މާސްޓާ ޓްރެއިނާ، އަލީ އަދީބްއެވެ. އަލީ އަދީބް އަކީ މި ދާއިރާގައި 20 އަހަރުގެ ތަޖުރިބާ އާއެކު ގައުމީ އަދި ބައިނަލްއަގުވާމީ ފެންވަރުގައި އެކި އެކި މަސައްކަތްތައް ކުރައްވަމުން ގެންދަވާ ބޭފުޅެކެވެ. މިގޮތުން ރާއްޖޭގައި ޖަރނީ އެން.ޖީ.އޯގެ އިތުރުން ކޮލަމްބޯ ޕްލޭން ޑްރަގް އެޑްވައިސޮރީ ޕްރޮގްރާމް، އިންޓަނެޝަނަލް ސޮސައިޓީ ފޯ ސަބްސްޓެންސް ޔޫސް ޕްރޮފެޝަނަލްސް އަދި ޔު.އެން.އޯ.ސީގައި އެބޭފުޅާ ވަނީ ހަރަކާތްތެރިވެފައެވެ.
މި ސެޝަންގައި ބައިވެރިންނަށްވަނީ މި މައުޟޫއާ ގުޅުންހުރި ގިނަގުނަ މައުލޫމާތު ފޯރުކޮށްދެވިފައެވެ. މިގޮތުން އެންމެ ގިނައިން ބޭނުން ކުރެވެމުންދާ މަސްތުވާތަކެއްޗަކީ ކޮބައިކަމާއި އެތަކެތިން ކުރާ ނޭދެވޭ އަސަރުތަކަކީ ކޮބައިކަމާއި، ޑްރަގް ބޭނުންކުރުމުގެ ނުރައްކާތަކަކީ ކޮބައިތޯއާއި، ޑްރަގް ބޭނުންކުރުމުގެ ސަބަބުން ކުރިމަތިވާ ބަލިތަކަކީ ކޮބައިތޯއާއި، އެޑިކްޓްވުމާބެހޭ އިތުރު މައުލޫމާތާއި މި ކަންކަމުން ދުރުހެލިވުމަށް އެޅިދާނެ ފިޔަވަޅުތަކާ ބެހޭ ތަފްސީލް އަލީ އަދީބް ވަނީ ބައިވެރިންނަށް ފޯރުކޮށްދެއްވާފައެވެ. މީގެ އިތުރުން އެބޭފުޅާގެ އަމިއްލަ ތަޖުރިބާގެ އަގުހުރި އެތައް ފިލާވަޅުތަކާއި ވާހަކަތައްވެސް އަލީ އަދީބް ވަނީ ސެޝަންގެ ބައިވެރިންނާ ހިއްސާ ކުރައްވާފައެވެ.
މި ހަރަކާތަކީ މި ވަގުތު ގައުމަށް ދިމާވެފައިވާ އެންމެބޮޑު އިޖުތިމާއީ އެއް މައްސަލަ ކަމުގައިވާ މަސްތުވާތަކެތީގެ ވަބާގައި ޒުވާނުން ޖެހިގެން ދިޔުމާއި ބެހޭ ގޮތުން ދަރިވަރުންގެ މެދުގައި ހޭލުންތެރިކަން އިތުރުކުރުމުގެ އަމާޒުގައި މެޑިކޯސް އިން އިސްނަގައި ހިންގި ހަރަކާތެކެވެ. މިފަދަ ބޮޑެތި އިޖްތިމާއީ މައްސަލަތަކާއި މެދު ޒުވާނުންގެ މެދުގައި ހޭލުންތެރިކަން އިތުރުކުމަށްޓަކައި މެޑިކޯސްއިން ދަނީ މިފަދަ އެކި އެކި ހަރަކާތްތަށް ހިންގަމުންނެވެ.
