ޤައުމީ ދުވަހުގެ މުނާސަބަތުގައި ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުންގެ ޔޫނިއަން އަދި ސްކޫލް އޮފް މެޑިސިންގެ ގޮފި މެޑިކޯސް ގުޅިގެން އިންތިޒާމުކުރި ޚާއްސަ ތަޤުރީރު ކާމިޔާބުކަމާއެކު ނިންމާލައިފިއެވެ.
”ބޮޑު ތަކުރުފާނުގެ ފަނޑުވުމެއް ނެތް ޤައުމީ ޒިކުރާ“ މި މަޢޫޟޫޢުއަށް ތަޤުރީރު ކުރައްވާފައިވަނީ ދިވެހި ބަހާއި އަދަބިއްޔާތުގެ ދާއިރާއިން ވާހަކަ ދެއްކުމުގެ ފަންނު ކުރިއެރުވުމުގެ ރޮނގުން ހިތްވަރުދިނުމުގެ ޤައުމީ އިނާމް ހާސިލް ކުރައްވަވާފައިވާ ވާހަކަ ދެއްކުމުގެ ފަންނުގައި ފުންނާބު އުސް ބޭފުޅެއް ކަމުގައިވާ އަލްފާޟިލް މުޙައްމަދު ޝިފާންއެވެ
މި ތަޤުރީރުގައި އަލްފާޟިލް މުޙައްމަދު ޝިފާން ވަނީ ބައިވެރިންނަށް ގިނަގުނަ އިބްރަތްތެރި އަދި އަގުހުރި ވާހަކަފުޅުތަކެއް ހިއްސާކުރައްވާފައެވެ. މިގޮތުން ބޮޑު ތަކުރުފާނު ޕޯޗުގީޒުންގެ ކިބައިން ދިވެހި ގައުމު މިނިވަންކުރުމަށްޓަކައި ކުރެއްވި މުހިންމު މަސައްކަތްތަކަށާއި މިއަދުގެ މުޖްތަމައުއާއި އަދުގެ ޖީލުގެ ކިޔަވާ ކުދިން ހާސިލްކުރަންވީ އިބްރަތްތަކަށް އެބޭފުޅާ ވަނީ އަލިއަޅުއްވާލާފައެވެ. މީގެ އިތުރުން މިހާރުގެ މުޖުތަމަޢުގައި ބޮޑެތިވަމުން އަންނަ ކުދިންނަށް މިފަދަ ތާރީޚީ މުހިންމު މައުލޫމާތުތައް ލިބިފައިވާ މިންވަރުގެ ކުޑަކަން ޝިފާން ވަނީ ފާހަގަ ކުރައްވާފައެވެ. ހަމައެއާއެކު ބޮޑުތަކުރުފާނުގެ ކިބައިން ނަމޫނާއެއްގެ ގޮތުގައި ބަލަންޖެހޭ ގިނަ ސިފަތަކަކަށް ޝިފާން ވަނީ ވާހަކަފުޅު ދައްކަވާފައެވެ.
މި ސެޝަންގައި ޤައުމީ ޔުނިވާސިޓިގެ ބައެއް ލެކްޗަރާއިންނާއި، ދަރިވަރުންގެ ޔޫނިއަންގެ ހިންގާ ކޮމިޓީ އަދި ގޮފިތަކުގެ ހިންގާ ކޮމިޓީތަކުގެ މެމްބަރުންނާއި، އެކިއެކި ފެކަލްޓީ ތަކުގެ ދަރިވަރުންގެ އިތުރުން އަޙްމަދިއްޔާ އިންޓަރނޭޝަނަލް ސްކޫލާއި، ސެންޓަރ ފޯ ހަޔަރ ސެކްންޑްރީ އެޑިއުކޭޝަން ގެ އިތުރުން ވިލާ އިންޓަރނެޝަނަލް ހައިސްކޫލްގެ ދަރިވަރުން ވަނީ ބައިވެރިވެފައިވެއެވެ.
މެޑިކޯސް އިން ދަނީ އަބަދުވެސް ގައުމީ އެކި އެކި މުނާސަބަތު ތަކާއި ގުޅުވައި އެކިއެކި ހަރަކާތްތަށް ހިންގަމުންނެވެ. އަދި މެޑިކޯސްގެ އަމާޒަކީ މިފަދަ ޤައުމީ މުނާސަބަތުތަކާ ގުޅުވައިގެން ކުރިއަށް އޮތްތަނުގައިވެސް މިފަދަ އިލްމީ ހަރަކާތްތައް ރާވާ އިންތިޒާމުކުރުމެވެ.
