އެމް.އެން.ޔޫ.އެސް.ޔޫ-މެޑިކޯސް ޗެސް ފެސްޓިވަލް 2024ގެ ގުރުނެގުމުގެ ރަސްމިއްޔާތު ބާއްވައިފިއެވެ.
އެމް.އެން.ޔޫ ސެންޓްރަލްގެ ބީ1-18 ކިލާހުގައި ކުރިއަށްދިޔަ މިބައްދަލުވުމުގައި މުބާރާތުގެ އާބިޓަރުންނާއި، ހިންގާ ކޮމިޓީގެ މެމްބަރުންގެ އިތުރުން މުބާރާތުގެ ބައިވެރިންނާއި ޓީމުތަކުގެ މެނޭޖަރުންވަނީ ބައިވެރިވެފައެވެ. މީގެ އިތުރުން ދަރިވަރުންގެ ޔޫނިއަންގެ ހިންގާ ކޮމިޓީގެ މެމްބަރުން ވެސް ވަނީ މިބައްދަލުވުމުގައި ބައިވެރިވެފައެވެ.
މިބައްދަލުވުމުގައި މުބާރާތާއި ގުޅުންހުރި މުހިންމު އުސޫލުތަކާއި ގަވާއިދުތައް ވަނީ މުބާރާތުގެ ބައިވެރިންނަށް ކިޔައިދެވިފައެވެ. އަދި މީގެ އިތުރުން ބައިވެރިންގެ ސުވާލުތަކަށް އާބިޓަރުން ވަނީ ޖަވާބުދެއްވާފައެވެ. މިއަށްފަހު މުބާރާތުގެ އިންޑިވިޖުއަލް ކެޓަގަރީގެ ގުރުނެގުންވެސް ވަނީ ކުރިޔަށް ގެންގޮސްފައެވެ.
މިމުބާރާތުގެ އިންޑިވިޖުއަލް ކެޓަގަރީގައި 28 ދަރިވަރުން ބައިވެރިވެފައިވާއިރު، ޓީމް ކެޓަގަރީގައި 5 ޓީމަކުން ވަނީ ބައިވެރިވެފައެވެ. މިއާއެކު މުބާރާތުގައި ޖުމްލަ 52 ބައިވެރިޔަކު ވާދަކުރާނެއެވެ. މިމުބާރާތް މިއަދުގެ މެންދުރުފަހު ފެށުމަށް ހަމަޖެހިފައިވާއިރު މުބާރާތުގައި އެންމެ ފުރަތަމަ ކުރިޔަށްދާނީ ޓީމްތަކުގެ މެޗުތަކެވެ. އެއަށްފަހު އިންޑިވިޖުއަލް ކެޓަގަރީ ފެށުމަށް ހަމަޖެހިފައިވަނީ ހޮނިހިރު ދުވަހުއެވެ.
މެޑިކޯސް އިން އިސްނަގައިގެން އެމް.އެން.ޔޫ.އެސް.ޔޫއާއި ގުޅިގެން ޗެސް މުބާރާތް ކުރިޔަށް ގެންދެވޭ މިއީ ދެވަނަ ފަހަރެވެ. މިމުބާރާތް އެންމެ ފުރަތަމަ ބޭއްވިފައިވަނީ 2022 ވަނަ އަހަރުއެވެ. އެއަހަރުގެ މުބާރާތުގައި 30އަށް ވުރެ ގިނަ ދަރިވަރުން ވަނީ ވާދަކޮށްފައެވެ.
