އެމް.އެން.ޔޫ.އެސް.ޔޫ-މެޑިކޯސް ޗެސް ފެސްޓިވަލް 2024ގެ ޓީމް އިވެންޓުގެ ޗެމްޕިއަންކަން އެމް.އެން.ޔޫ ބިޒްނަސް ސްކޫލުގެ ޓީމުން ކާމިޔާބުކޮށްފިއެވެ.
ބިޒްނަސް ސްކޫލުން މުބާރާތުގެ ތަށި އުފުލާފައިވަނީ އާދިއްތަ ދުވަހުގެ ހަވީރު، އެފް.އީ އޮޑިޓޯރިއަމްގައި ބޭއްވުނު މުބާރާތުގެ ނިންމުމުގެ ރަސްމިއްޔާތުގައެވެ.
އެމް.އެން.ޔޫގެ ޑީން އޮފް ސްޓޫޑަންޓްސް އަލްފާޟިލާ އާޝިޔާ ލީލާ އަހްމަދު ޝަރަފުވެރިކޮށްދެއްވި މިރަސްމިއްޔާތުގައި ސްކޫލް އޮފް މެޑިސިންގެ ޑީން، ޑރ.ޝީޒާ ޢަލީގެ އިތުރުން، ދަރިވަރުންގެ ޔޫނިއަންގެ ހިންގާ ކޮމިޓީގެ މެމްބަރުންނާއި، ގޮފިތަކުގެ ހިންގާ ކޮމިޓީތަކުގެ މެމްބަރުންގެ އިތުރުން މުބާރާތުގައި ވާދަކުރި ދަރިވަރުން ވަނީ ބައިވެރިވެފައެވެ.
މިރަސްމިއްޔާތުގައި މުބާރާތުގައި ބައިވެރިވި ހުރިހާ ދަރިވަރުންނަށާއި، ފެކަލްޓީތަކަށް ވަނީ ހަނދާނީ ލިޔުން ހަވާލުކުރެވިފައެވެ. މީގެ އިތުރުން ޓީމް އިވެންޓް އަދި އިންޑިވިޖުއަލް އިވެންޓުގެ ވަނަވަނައަށް އައި ފަރާތްތަކަށް ވަނީ އިނާމާއި ހަނދާނީ ލިޔުން ހަވާލުކުރެވިފައެވެ.
މިގޮތުން ޓީމް އިވެންޓުގެ އެއްވަނަ އެމް.އެން.ޔޫ ބިޒްނަސް ސްކޫލުން ކާމިޔާބުކޮށްފައިވާއިރު، ދެވަނަ ޓީމަކަށް ހޮވިފައިވަނީ ސްކޫލް އޮފް މެޑިސިންގެ ޓީމެވެ. އަދި ތިންވަނަ ހާސިލްކޮށްފައިވަނީ ފެކަލްޓީ އޮފް އާރޓްސްގެ ޓީމުންނެވެ. ވަނަވަނައަށް ދިޔަ ޓީމުތަކަށް އިނާމު ހަވާލުކޮށްދެއްވީ ސްކޫލް އޮފް މެޑިސިންގެ ޑީން ޑރ.ޝީޒާ ޢަލީއެވެ.
މުބާރާތުގެ އިންޑިވިޖުއަލް ކެޓަގަރީގައިވެސް ގިނަ އަދަދެއްގެ ދަރިވަރުން ވަނީ ވާދަކޮށްފައެވެ. އެގޮތުން މި ކެޓަގަރީގެ އެއްވަނަ ހާސިލްކުރީ ސްކޫލް އޮފް ނާސިންގެ ދަރިވަރު އިބްރާހިމް ސާމިންއެވެ. އަދި ދެވަނަ އެމް.އެން.ޔޫ.ބީ.އެސްގެ ޖަސޫރް އަފްޒަލް ހާސިލްކުރިއިރު، ތިންވަނަ ހާސިލްކޮށްފައިވަނީ ފެކަލްޓީ އޮފް ހެލްތު ސައިންސަސްގެ ދަރިވަރު އައިކް ޢަބްދުﷲ ރިފާއުއެވެ.
މިރަސްމިއްޔާތުގެ ޝަރަފުވެރި މެހެމާން ޑީން އޮފް ސްޓޫޑެންޓްސް، ލީލާ މިސްވަނީ ހާޒިރީންނަށް މުޚާތަބުކޮށް ވާހަކަފުޅުދައްކަވާފައެވެ. ލީލާ މިސްގެ ވާހަކަފުޅުގައި މިފަދަ މުބާރާތެއްގައި ބައިވެރިވެ، ދަރިވަރުން ދެއްކި ހިތްވަރަށް ވަނީ ތަޢުރީފުކުރައްވާފައެވެ. އަދި ކުރިޔަށް އޮތް ތަނުގައި މިއަށްވުރެން ފުޅާކޮށް މިމުބާރާތް ކުރިޔަށް ގެންދިޔުމަށް، މެޑިކޯސްގެ ޓީމަށް ވަނީ ހިތްވަރު ދެއްވާފައެވެ.
މީގެ އިތުރުން ދަރިވަރުންގެ ޔޫނިއަންގެ ފަރާތުން މީޑިއާ ކޯޑިނޭޓަރ ހަސްނާ ވިޝާމް އަދި މެޑިކޯސްގެ ރައީސް މުޙައްމަދު ޢަޔާޝް ޢަލީ ވެސް ވަނީ ޖަލްސާގެ ބައިވެރިންނާ މުޚާތަބުކުރައްވާފައެވެ.
މިމުބާރާތަކީ މެޑިކޯސްއިން އިސްނަގައިގެން ބޭއްވުނު ދެވަނަ ޗެސް މުބާރާތެވެ. އެންމެ ފުރަތަމަ މިމުބާރާތް ބާއްވާފައިވަނީ 2022 ވަނަ އަހަރުއެވެ. މިއަހަރުގެ މުބާރާތުގައި މުޅިން އަލަށް ތަޢާރަފުކުރެވުނު ޓީމު އިވެންޓުގައި ފަސް ފެކަލްޓީއަކުން ބައިވެރިވެފާ ވާއިރު، އިންޑިވިޖުއަލް ކެޓަގަރީގައި އެކިއެކި ފެކަލްޓީތަކުން 28 ދަރިވަރަކު ވަނީ ވާދަކޮށްފައެވެ.
