އެމް.އެން.ޔޫ.އެސް.ޔޫ އިންޓަރ ފެކަލްޓީ ބެޑްމިންޓަން ޓޯނަމެންޓް 2024ގައި ވާދަކުރާ ސްކޫލް އޮފް މެޑިސިންގެ ޓީމަށް ޖާޒީ ހަވާލުކުރުމުގެ ރަސްމިއްޔާތު ބާއްވައިފިއެވެ.
އާދިއްތަ ދުވަހުގެ ހަވީރު އެފް.އީ އޮޑިޓޯރިއަމްގައި ބޭއްވި މިރަސްމިއްޔާތުގައި ކުޅުންތެރިންނަށް ޖާޒީ ހަވާލުކޮށްދެއްވާފައިވަނީ ޓީމުގެ ކޯޗު، ޝަމީޒް އަހްމަދެވެ. މިރަސްމިއްޔާތުގައި ޓީމުގެ ކުޅުންތެރިންނާއި އޮފިޝަލުންގެ އިތުރުން މެޑިކޯސްގެ ހިންގާ ކޮމިޓީގެ މެމްބަރުންވަނީ ބައިވެރިވެފައެވެ.
ރަސްމިއްޔާތުގައި ކުޅުންތެރިންނަށް ޖާޒީ ހަވާލުކުރުމަށްފަހު ކޯޗު ވަނީ ކުޅުންތެރިންނާ މުޚާތަބުކޮށް ހިތްވަރުދެއްވާފައެވެ. އަދި މީގެ އިތުރުން މެޑިކޯސްގެ ރައީސް މުޙައްމަދު ޢަޔާޝް ޢަލީއާއި، ޓީމުގެ މެނޭޖަރ މަރިޔަމް އަރީން އީސާ ވެސް ވަނީ ކުޅުންތެރިންނާ މުޚާތަބުކޮށް ވާހަކަދައްކަވާފައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ބެޑްމިންޓަން ޓޯނަމެންޓް ވޭތުވެދިޔަ 2023ވަނަ އަހަރު ބާއްވަން ފެށުނު އިރު، ފުރަތަމަ މުބާރާތުގައިވެސް ވަނީ ސްކޫލް އޮފް މެޑިސިންގެ ޓީމެއް ބައިވެރިވެފައެވެ. އެމުބާރާތުގައި އެސް.އެމްގެ ޓީމުންވަނީ ސެމީ ފައިނަލާ ހަމަޔަށް ދަތުރުކޮށްފައެވެ. މިއަހަރުވެސް މެޑިކޯސްގެ އަމާޒަކީ މުބާރާތުގައި ރަނގަޅު ކާމިޔާބީއެއް ހޯދުމެވެ.
