2026 ވަނަ އަހަރުގެ ދުނިޔޭގެ ސިއްހަތު ދުވަސް ފާހަގަކުރުމުގެ ގޮތުން ދިވެހިރާއްޖޭގެ ޤައުމީ ޔުނިވަރސިޓީގެ ތިނަދޫ ކެމްޕަސްގެ ސްކޫލް އޮފް ނަރސިންގ އަދި ދަރިވަރުންގެ ޔޫނިއަންގެ ގޮފި ނޭކައިން ކުރިއަށް ގެންދިޔަ “ހެލްތު ޑޭ ކުއިޒް” ކާމިޔާބު ކަމާއެކު ނިންމާލައިފިއެވެ.
9 އެޕްރީލް 2026 ވީ ބުރާސްފަތި ދުވަހު ތިނަދޫ ކެމްޕަހުގައި ބޭއްވި މި ކުއިޒްގައި 5 ޓީމަކުން ވަނީ ބައިވެރިވެފައެވެ. މިއިން ކޮންމެ ޓީމެއް އެކުލެވިފައިވަނީ 5 މެންބަރުންގެ މައްޗަށެވެ. އަދި މި ޓީމުތަކުގެ މެދުގައި ޖުމްލަ 3 ބުރަކަށް ބަހާލައިގެން ކުއިޒްގެ ސުވާލުތައް ކުރިއަށް ގެންދެވިފައި ވެއެވެ.
ކުއިޒްގެ ފުރަތަމަ ބުރުގައި ގުރުއަތުން ނެގޭ ނަންބަރުގެ ތެރެއިން ޓީމުތަކަށް ހިއްސާކޮށްފައިވާ ސުވާލު ގަނޑުން ސުވާލު ކުރެވިފައިވެއެވެ. އަދި ދެވަނަ ބުރުގައި ކޮންމެ ޓީމަކަށްވެސް އަވަސް ސުވާލުތަކެއް ކުރެވި ފޯރިގަދަ އަވަސް ބުރެއް ގެންގޮސްފައިވެއެވެ. 3 ވަނަ ބުރުގައި ކޮންމެ ޓީމަކަށްވެސް ވަނީ ސަޕްރައިޒް ސުވާލުތަކެއް ކުރިމަތިކޮށްފައެވެ.
ފޯރިގަދަ މި ކުއިޒްގެ އެންމެ މޮޅު ޓީމަކަށް ހޮވިފައިވަނީ “ވައިޓަލް ކޯރ” ޓީމެވެ. މީގެ އިތުރުން، މި ކުއިޒްގައި ބައިވެރިވި ޓީމްތަކާއި ޓީމްތަކުގެ މެންބަރުންނަށް ވަނީ ބައިވެރިވިިކަމުގެ ސެޓްފިކެޓް ހަވާލުކޮށްފައެވެ. މިފަދަ ފުރިހަމަ ކުއިޒް އެއް ބޭއްވުމުގައި ތިނަދޫ ކެމްޕަސްގައި ކިޔަވައިދެއްވާ ސްކޫލް އޮފް ނަރސިންގެ ލެކްޗަރަރ ޝަަރުވަތު މިސް އަދި ކެމްޕަސް ޓީމުގެ ބައިވެރިވުން ނޭކައިގެ ފަރާތުން ޝުކުރުވެރިކަމާއެކު ފާހަގަކުރެއެވެ.
