ދިވެހިރާއްޖޭގެ ޤައުމީ ޔުނިވަރސިޓީގެ މާލޭ ކެމްޕަހުގެ ހުރިހާ ދަރިވަރުންނަށް އަމާޒުކޮށްގެން ސުކޫލް އޮފް ނާރސިންގ ގެ ވިންގް ނިއަރެސް ގެ ފަރާތުން ”މޫވީ ނައިޓެއް“ ބާއްވައިފިއެވެ. މި މޫވީ ނައިޓަކީ ނިއަރެސްގޮފީގެ ފަރާތުން އަންނަ އަހަރު ހިންގުމަށް ރާވާފައިވާ ހަރަކާތްތަށް ކުރިއަށް ގެންދިޔުމަށްޓަކައި އަދި މާލީގޮތުން ގޮފި ވަރުގަދަ ކުރުމަށް ހިންގުނު “ފަންޑް ރެއިޒިންގ” ޙަރަކާތެކެވެ.
4 އޮކްޓޯބަރ ވީ ބުރާސްފަތި ދުވަހުގެ ރޭ 8:00 ގައި ބޭވުނު މި ހަރަކާތުގެ ތެރެއިން ނިއަރެސްގެ ލޯގޯ ހެދުމުގެ މުބާރާތުގައި ބައިވެރިވި ކުދިންނަށް ހަނދަނީ ލިޔުން ދިނުމާއި، ލޯގޯ މުބާރާތުން މޮޅުވި ދަރިވަރަށް އިނާމާ ހަނދާނީ ލިޔުން ދިނުން އަދި ނިއަރެސްގެ ލޯގޯ ވަނީ އިފްތިތާޙްކޮށްދެއްވާފައެވެ. ލޯގޯ ހެދުމުގެ މުބާރާތުން މޮޅުވި ދަރިވަރަކީ ބެޗެލާރސ އޮފް ނާރސިންގ ކިޔަވަމުންދާ ދަރިވަރެއް ކަމަށްވާ މަރިޔަމް އިނާޝާ އަފީފް އެވެ. ދަރިވަރަށް އިނާމާ ހަނދާނީ ލިޔުން ހަވާލް ކުރުން އަދި ލޯގޯ އިފްތިތާޙް ކޮށްދެއްވީ ސުކޫލް އޮފް ނާރސިންގެ ޑީން އާސިޔާ އިބްރާޙިމް އެވެ.
މޫވީ ނައިޓުގައި އަޅުވާފައިވަނީ “އެނަބެލް-ރިކްރިއޭޝަން” ކިޔާ އިނގިރޭސި، ބިރުވެރި ފިލްމެކެވެ. މި އިވެންޓް ތެރެއިން ޕޮޕް ކޯން އަދި ބުލޫބެރީ ޑުރިންކްސް ވިއްކުނުއިރު، މި އިވެންޓް ވެގެން ދިޔައީ ނިއަރެސް ގޮފީގެ ތަޢާރަފެއް ސުކޫލް އޮފް ނާރސިންގގައި އުޅޭ ދަރިވަރުންނަށް ލިބިގެން ދިޔަ ޙަރަކާތެއްގޮތަށެވެ.
