އިންޓަރފެކަލްޓީ ވޮލީ މުބާރާތް 1 މާރޗް ވާ އާދިއްތަ ދުވަހު ފެށޭއިރު، ސްކޫލް އޮފް ނާރސިންގްގެ އަންހެން އަދި ފިރިހެން ވޮލީ ޓީމް މިވަނީ އެންމެ ފުރިހަމައަށް ތައްޔާރުވެފައެވެ.
ކުރީ އަހަރެކޭ އެއް ފަދައިން، މި އަހަރުވެސް ދެޓީމަށް ކޯޗްކަން ކޮށްދެނީ ޝުއައިބް އަހުމަދެވެ. ޤައުމީ ވޮލީ ޓީމަށްވެސް ކޯޗުކަން ކޮށްދީފައިވާ މި ކޯޗުގެ ކޯޗު ކަމުގެ ދަށުން 2019 ވަނަ އަހަރުގެ އިންޓަރފެކަލްޓީ ވޮލީ މުބާރާތުގެ ސެމީ ފައިނަލަށް އަންހެން އަދި ފިރިހެން ޓީމުވެސް ދަތުރުކުރިއެވެ. ދެ ޓީމުގެވެސް މި ފަހަރުގެ އަމާޒަކީ ސެމީ ފައިނަލްއިން މޮޅުވެ ފައިނަލްގައި ވާދަކޮށް މުބާރާތުގެ ތަށި ނެގުމެވެ.
ތިރީހަށްވުރެ ގިނަ ކުދިންނާއެކު ޕްރެކްޓިސްތައް ފެށި ނިއަރެސްގެ އަންހެން ވޮލީ ޓީމަށް މިހާރު ވަނީ ފައިނަލް 12 ކުޅުންތެރިން ހޮވާފައެވެ. ހަމަ މިއާއެކު، ނިއަރެސްގެ ފިރިހެން ޓީމަށްވެސް ވަނީ 12 ކުޅުންތެރިން ހޮވާ ޓީމް ފައިނަލްކޮށްފައެވެ. މި ދެޓީމްގެ އެންމެ ފަހުގެ ތައްޔާރީތައް ވަމުން ދަނީ ނުހަނު ފޯރީގައެވެ.
އިންޓަރފެކަލްޓީ ވޮލީ މުބާރާތުގެ އަންހެން ޑިވިޜަންގައި އެންމެ ފުރަތަމަ ކުޅުމަށް ހަމަޖެހިފައިވާ މެޗުގައި ވާދަކުރަނީ ސްކޫލް އޮފް ނަރސިންގ (ނިއަރެސް) އާއި ފެކަލްޓީ އޮފް އެޑިޔުކޭޝަން (ފެސާ) އެވެ. ނިއަރެސް ފިރިހެން ވޮލީ ޓީމްގެ ފުރަތަމަ މެޗް އޮތީ 4 މާރޗް ވާ ބުދަ ދުވަހު އެމް. އެން. ޔޫ ބިޒްނަސް ސްކޫލް (ބީއެސްއެސްއޭ) އާ ދެކޮޅަށެވެ. ދެ ޓީމުގެވެސް އަމާޒަކީ ހުރިހާ މެޗަކުން މޮޅުވެ، މުބާރާތުގެ ޗެންޕިއަންކަން ހޯދާ ތަށި އުފުލާލުމެވެ.
ލިޔުނީ: މަރިޔަމް މަލަކާ މާހިރު
މީޑިއާ ކޯޑިނޭޓަރ، ނިއަރެސް
