ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން އިންތިޒާމްކޮށްގެން ބާއްވަމުން އަންނަ އިންޓަރ ފެކަލްޓީ ވޮލީބޯޅަ މުބާރާތައް ތައްޔާރުވުމުގެ ގޮތުން، ސެޕްޓެމްބަރ 02 ވަނަ ދުވަހު ސްކޫލް އޮފް ނަރސިންގ ގެ ދަރިވަރުން ފަރިތަކުރުންތައް ފަށައިފިއެވެ.
ފުންނާބު އުސް ވޮލީ ކޯޗް، ޝުއައިބް އަހުމަދު ގެ އިރުޝާދުގެ ދަށުން އަންހެން އަދި ފިރިހެން ޓީމް ފަރިތަކުރުންތައް ފަށައިފައިވަނީ ގައުމީ ޔުނިވަރސިޓީގެ ޕީ.އީ ހޯލްގައެވެ. މުބާރާތް އިއުލާންކުރުމާއި އެކު ސްކޫލް އޮފް ނަރސިންގ ގައި ކިޔަވާ ދަރިވަރުންގެ ތެރެއިން ވޮލީކުޅުމަށް ޝައުގުވެރިވާ ދަރިވަރުން ނަންނޯޓްކުރުމަށް ހުޅުވާލި ފުރުސަތުގައި 25 އަންހެން ދަރިވަރުންނާއި 12 ފިރިހެން ދަރިވަރުން ޝައުގުވެރިކަން ފާޅުކޮށްފައިވެއެވެ.
2019 ވަނަ އަހަރު ޝުއައިބް ކޯޗްގެ އިރުޝާދުގެ ދަށުން މުބާރާތުގެ އަންހެން ޑިވިޝަނުގެ ޗެމްޕިއަންކަން ސްކޫލް އޮފް ނަރސިންގ ގެ ޓީމް ހޯދާފައިވާއިރު، މިއަހަރުގެ އެންމެ ބޮޑު އަމާޒަކީ އަންހެން ޑިވިޝަނުގެ ތަށި ދިފާޢުކުރުމެވެ. އަދި ފިރިހެންޓީމް ވެސް މި މުބާރާތުގައި ރަނގަޅު ކާމިޔާބެއް ހޯދުމަށް ވަރަށް ރަނގަޅަށް ތައްޔާރުވާން ފަށާފައިވެއެވެ. މުބާރާތް އޮންނާނީ ސެޕްޓެމްބަރ 23ން ސެޕްޓެމްބަރ 26ށް ގައުމީ ޔުނިވަރސިޓީގެ ޕީ.އީ ހޯލްގައެވެ.
