ނިއަރެސްގެ ހިންގާ ކޮމިޓީ މެމްބަރުންނާއި އެސް.އެންގެ ޑީން ބައްދަލުކުރައްވައިފި

ނިއަރެސްގެ ހިންގާ ކޮމިިޓީ މެމްބަރުންނާއި ސްކޫލް އޮފް ނަރސިންގެ (އެސް.އެން) ގެ ޑީން އަލްފާޟިލާ އާސިޔާ އިބްރާހިމް ބައްދަލުކުރައްވައިފިއެވެ. ނިއަރެސް އަކީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އިން ސްކޫލް އޮފް ނާރސިންގ ގައި ޤާއިމުކޮށްފައިވާ ގޮތްޕެވެ.

މި ބައްދަލުވުން ބާއްވާފައިވަނީ 13 ސެޕްޓެމްބަރ 2021 ވަނަ ދުވަހު ޑީން ގެ މީޓިންގް ރޫމްގައެވެ. މިއީ މިއަހަރު ނިއަރެސް އާއި ޑީން ބައްދަލުކުރި ދެވަނަ ފަހަރެވެ. ކޮވިޑްގެ ޙާލަތާއި އެކު އޮންލައިން މީޓިންގ އެއް މީގެ ކުރިންވެސް ބާއްވާފައިވެއެވެ. އެހެންކަމުން މި ބައްދަލުވުމުގައި ފުރަތަމަ ކަމަކަށް އަލިއަޅުވާލާފައިވަނީ ކުރީގެ ބައްދަލުވުމުގައި ނިއަރެސް އިން ފާހަގަކޮށްފައިވާ 2 ކަމަކާއި ބެހޭގޮތުންނެވެ.

ފުރަތަމަ ކަމަކަށް ފާހަގަކޮށްފައިވަނީ ނިއަރެސްގެ މަސައްކަތްތައް ކުރުމަށް އޮފީހެއް ހޯދައިދިނުމަށް އެދިފައިވާތީ އެކަމާއި ބެހޭގޮތުންނެވެ. އެގޮތުން ކުރިޔަށް އޮތް 2 ހަފްތާއެއްހާ ދުވަސް ތެރޭގައި އެކަން ހަމަޖެހިގެންދާނެކަމަށް ޑީން ވިދާޅުވެފައިވެއެވެ. ދެވަނަ ކަމަކަށް ޖަވާބުދެއްވީ ކްލިނިކަލްސް އަށް އައި.ޖީ.އެމް.އެޗް އަށް ދާއިރު ބޭނުންވާ ކާރޑް ހެދުމާއި ބެހޭގޮތުންނެވެ. އެކަމަށް އައި.ޖީ.އެމް.އެޗް ގެ ބޭފުޅުންނާއި ބައްދަލުކުރައްވާފައިވާ ކަމަށާއި މަޝްވަރާތަކެއް ކުރެވެމުންދާކަމަށް ވިދާޅުވެފައިވެއެވެ.

މި ބައްދަލުވުމުގައިި ސްކޫލް އޮފް ނަރސިންގ ގައި އަލަށް ޑިޕާރޓްމަންޓެއް އުފެދިފައިވާ ވާހަކަ ހިއްސާކޮށްފައިވެއެވެ. 2021 ވަނަ އަހަރުގެ މެއި މަހު އުފެދުނު ”ޑިޕާރޓްމަންޓް އޮފް ނަރސިންގ ސްޕެޝިއަލިޓީ“ ގެ ހެޑް އަކީ އަލްފާޟިލާ ޒީނާޒް ފަހުމީއެވެ. މީގެ އިތުރުން އެ ޑިޕާރޓްމަންޓްގެ ކުރު ތަޢާރަފެއް ޙިއްސާކޮށްފައިވެއެވެ.

ފަހު ކަމަކަށް ޑީން ފާހަގަކޮށްފައިވަނީ ނިމިގެންދިޔަ ފުރަތަމަ ސެމިސްޓަރ ގެ ފައިނަލް ޓެސްޓްގައި ގިނަ ދަރިވަރުންގެ ފަރާތުން އެކި ޝަކުވާތައް އައިސްފައިވާކަމަށާއި އެގްޒަމިނޭޝަން ގައިޑްލައިން އާއި ޚިލާފަށް ޢަމަލުކޮށްފައިވާ ދަރިވަރުން މާއްދާ ރިޕީޓްކުރަން ޖެހިފައިވާކަމަށެވެ. މިއާއިއެކު ސްޓޫޑެންޓް ސަޕޯޓް އިން ބާއްވަމުން އަންނަ ރިފަރެންސް ސެޝަން، އެގްޒަމިނޭޝަން ރޫލްސް ސެޝަން އަދި އެސައިންމަންޓް ހުށަހެޅުން ފަދަ މަޢުލޫމާތު ދިނުމުގެ ޕްރޮގްރާމްތަކުގައި ދަރިވަރުން ބައިވެރިވުމަށް ހިތްވަރުދިނުމަށް ނިއަރެސް މެމްބަރުންގެ ފަރާތުން ޑީން އެދިލައްވާފައިވެއެވެ.

ނިއަރެސް ގެ ފަރާތުން މި ބައްދަލުވުމުގައި ފާހަގަކޮށްފައިވާ ކަންތައްތަކުގެ ތެރޭގައި، ވޭތުވެ ދިޔަ ރަމަޟާން މަހު އެމް.އެން.ޔޫ.އެސް.ޔޫ އާއި ގުޅިގެން އެކި ފެކަލްޓީތަކުން ހިންގި މުބާރާތްތަކުން އެސް.އެން އިން ހޯދި ކާމިޔާބީތަކުގެ ވާހަކަ ހިއްސާކޮށްފައިވެއެވެ. އަދި މި ސެމިސްޓަރ ގައި އެސް.އެން އާއި އަލަށް ގުޅުނު ކުދިން ހިމެނޭގޮތަށް ވެލްކަމް ނައިޓެއް ބޭއްވުމަށް ރާވަމުންދާކަމަށް ޑީންއަށް ހުށަހަޅާފައިވެއެވެ. އަދި ކުރިޔަށް އޮތް ވޮލީމުބާރާތަށް އެސް.އެން ގެ އަންހެން އަދި ފިރިހެން ޓީމް ތައްޔާރުވަމުން އަންނަކަމާއި އޭގެއިތުރުން ވެސް އެމް.އެން.ޔޫ.އެސް.ޔޫ ގެ އިތުރު މުބާރާތްތައް ހުރިކަމަށް ފާހަގަކޮށްފައިވެއެވެ. ހަމައެއާއެކު ނިއަރެސް އިން ރާވާފައިވާ އެހެނިހެން ޙަރަކާތްތަކުގެ މަޢުލޫމާތު ޑީންއާއި ޙިއްސާކޮށްފައިވެއެވެ.

މި ބައްދަލުވުމުގައި ޑީން ގެ އިތުރުން ލެކްޗަރަރ ޝުހުރަތު ޙަސަން އަދި ނިއަރެސް ހިންގާ ކޮމިޓީގެ 6 މެންބަރުން ބައިވެރިވެފައިވެއެވެ.