އެސް.އެން އާއި އަލަށް ގުޅުނު ދަރިވަރުންނަށް އޮރިއެންޓޭޝަން ޕްރޮގްރާމް ހިންގައިފި.

ދިވެހިރާއްޖޭގެ ޤައުމީ ޔުނިވަރސިޓީގެ ސްކޫލް އޮފް ނާރސިންގ (އެސް.އެން) އަށް 2021 ވަނަ އަހަރު ދެވަނަ ސެމިސްޓަރ ގައި އަލަށް ގުޅުނު ދަރިވަރުންނަށް އޮރިއެންޓޭޝަން ޕްރޮގްރާމް ހިންގާފައިވަނީ ސެޕްޓެމްބަރ 14 އަދި ސެޕްޓެމްބަރ 15 ވަނަ ދުވަހުއެވެ.

02 ދުވަހަށް ބަހާލައިގެން ކުރިޔަށް ގެންދިޔަ އޮރިއެންޓޭޝަން ޕްރޮގްރާމް ފެށުމުގެ ގޮތުން ފެކަލްޓީ އޮޑިޓޯރިއަމްގައި ސެޕްޓެމްބަރ 14 ވަނަ ދުވަހު ޖަލްސާއެއް ބާއްވާފައިވެއެވެ. ކީރިތި ޤުރުއާންގެ ބަރަކާތުން ޖަލްސާ ފައްޓަވައިދެއްވީ އެސް.އެން ގެ ދަރިވަރު ޙުސައިން އިބްރާހިމެވެ.

މި ޖަލްސާގައި އެސް.އެން ގެ ޑީން އަލްފާޟިލާ އާސިޔާ އިބްރާހިމް ދެއްކެވި ވާހަކަފުޅުގައި ފުރަތަމަ ކަމަކަށް މިއަހަރު އަލަށް ގުޅުނު ދަރިވަރުންނަށް މަރްޙަބާ ކިޔާފައިވެއެވެ. މީގެ އިތުރުން ނަރުސްކަން ކިޔެވުމަށް ހުރި މަތީ ފުރުޞަތުތަކާއި ނަރުސްކަން ކިޔެވުމުން ކުރިޔަށް ދެވެންހުރި ދާއިރާތަކަށް އަލިއަޅުވާލާފައިވެއެވެ. އަދި ނަރުހުންނަކީ މުޖުތަމައުއަށް ވަރަށް މުހިއްމު ބައެއްކަމާއި ކޮވިޑްގެ އެންމެ އުނދަގޫ ޙާލަތުގައިވެސް އެސް.އެން ގެ ދަރިވަރުންގެ ބޭނުން ހިފަންޖެހުނުކަމާއި އެ ދަރިވަރުން ޤައުމަށް ކޮށްދެއްވި އަގުހުރި ޚިދުމަތްތަށް ފާހަގަކޮށްފައިވެއެވެ. ހަމައެއާއެކު ނާރސިންގ އަކީ ހަމައެކަނި ހޮސްޕިޓަލެއްގެ އެތެރޭގައި ބަލިމީހުންނަށް ފަރުވާދިނުމަށް ތިބޭ ބައެއް ނޫންކަމާއި އެއަށްވުރެ ފުޅާކޮށް މަސައްކަތްކުރެވޭނެ ދާއިރާއެއްކަމަށާއި ކިޔެވުމަށް ލިބިފައިވާ ފުރުޞަތުގެ ބޭނުން ހެޔޮގޮތުގައި ހިފައި ކިޔަވައި ނިންމާ ނާރސިންގ ގެ ދާއިރާއިން ފެންނާނެކަމަށް އުންމީދުކުރާކަމަށް ވިދާޅުވެފައިވެއެވެ.

ޑީންގެ ބަސްކޮޅަށްފަހު އެސް.އެން ގައި ކިޔަވާދެއްވާ ލެކްޗަރަރ އިންގެ ކުރު ތަޢާރަފެއް ދެއްވީ ލެކްޗަރަރ އަލްފާޟިލާ ޝުހުރަތު ޙަސަން އެވެ. އަދި ކިޔެވުމާއި ގުޅުންހުރި އެހެނިހެން މަޢުލޫމާތު ދަރިވަރުނަށް ހިއްސާކޮށްދެއްވީ ކްލިނިކަލްސް އެޑް އަލްފާޟިލާ އާމިނަތު ޝާފިޔާ އެވެ. މީގެ އިތުރުން ދަރިވަރުންގެ އަމިއްލަ ޞިއްޙަތާއި ބެހޭ މުހިއްމު ވާހަކަތަކެއް ހިމެނޭގޮތަށް ދަރިވަރުންނަށް ސެޝަންއެއް ކުރިޔަށް ގެންގޮސްފައިވެއެވެ. މި ސެޝަން ނަންގަވައިދެއްވީ ލެކްޗަރަރ އަލްފާޟިލާ ސަލްމާ ޙަސަންއެވެ.

މި ޕްރޮގްރާމްގެ 02 ވަނަ ސެޝަން ކުރިޔަށް ގެންގޮސްފައިވަނީ ސެޕްޓެމްބަރ 15 ދުވަހު ފެކަލްޓީގެ ހޯލުގައެވެ. މި ސެޝަންގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އިން ސްކޫލް އޮފް ނާރސިންގައި ޤާއިމުކޮށްފައިވާ ގޮފި ނިއަރެސް އަކީ ކޮބައިކަމާއި ހިންގާ ކޮމިޓީ މެމްބަރުންގެ ކުރު ތަޢާރަފެއް ދަރިވަރުންނާއި ޙިއްސާކޮށްދެއްވީ ނިއަރެސްގެ ރައީސް އިނާސް ރަޝީދެވެ. އެއަށްފަހު ސެލްފް ސަރވިސް އަދި މޫޑްލް ބޭނުންކުރާނެގޮތް ދަރިވަރުންނަށް އޮޅުންފިލުވާދެއްވީ ލެކްޗަރަރ އަލްފާޟިލާ ޝިޒްނާ މުޙައްމަދެވެ.

އޮރިއެންޓޭޝަން ޕްރޮގްރާމަކީ އަލަށް ކޯސްތަކަށް ވަންނަ ދަރުވަރުންނަށް ހިންގޭ ޙަރާކާތްތަކެއް ކަމަށްވާތީ މި ޕްރޮގްރާމްގެ ޒަރީއާއިން ދަރިވަރުންނަށް ވަރަށް މުހިއްމު މަޢުލޫމާތުތަކެއް ލިބިގެންދާކަން ފާހަގަކުރެވިފައިވެއެވެ.