ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އިން އިންތިޒާމްކޮށްގެން ސެޕްޓެމްބަރ 24ން ސެޕްޓެމްބަރ 27ށް ބޭއްވުމަށް ހަމަޖެހިފައިވާ އިންޓަރ ފެކަލްޓީ ވޮލީބޯޅަ މުބާރާތުގައި ބައިވެރިވާ ސްކޫލް އޮފް ނަރސިންގ (އެސް.އެން) ގެ ޓީމުގެ ކޯޗުކަމަށް ޝުއައިބް އަޙްމަދު ހަމަޖައްސައިފިއެވެ.
މީގެ 20 އަހަރުކުރިން ކޯޗިންގެ ދާއިރާއަށް ނުކުތް ޝުއައިބް އަޙްމަދަކީ މިހާރު ވޮލީ ބޯލް އެސޯސިއޭޝަން އޮފް މޯލްޑިވްސްގެ ކޯޗާސް ކޮމިޝަންގެ ޗެއަރމަން އެވެ. މަޖީދިއްޔާ ސްކޫލްގައި ތަޢުލީމް ހާޞިލްކުރަމުން ދިޔައިރު ވޮލީ ކުޅެން ފެށި ޝުއައިބް ކޯޗިން ދާއިރާއަށް ނުކުތީ 2001 ވަނަ އަހަރު ބޭއްވި ވޮލީ ކޯޗިން ކޭމްޕެއްގެ ތެރެއިންނެވެ. އޭގެފަހުން މިއަދާ ހަމައަށްވެސް މަސައްކަތްކުރަމުންދަނީ ވޮލީގެ ޑިވަލޮޕްމަންޓް ފަޅީގައިކަމަށް ކޯޗުވަނީ ބުނެފައެވެ. އަބަދުވެސް ކުޅުންތެރިން އުފެއްދުމަށް ޝައުޤުވެރިވާތީ ގިނަފަހަރު ފެންނަނީ ޒުވާން ޓީމުތަކާއި އެކު މަސައްކަތްކުރާތަނެވެ. އެގޮތުން މާލޭގެ ސްކޫލް އަދި ޔުނިވަރސިޓީ މުބާރާތްތަކުން ލިބޭ ފުރުޞަތުތައް އަބަދުވެސް ބޭނުންކުރާކަމަށާއި، މާލެ ފިޔަވައި އެހެން ރަށްތަކުގެ ސްކޫލްތަކުގެ ޓީމްތަކުން ލިބޭ ފުރުޞަތުތައް އަބަދުވެސް ބަލައިގަންނަކަމަށް ބުނެފައިވެއެވެ. މިފަދަ މުބާރާތްތަކުގައި އެއްކޮށް މަސައްކަތްކޮށްފައި ތިބި ކުދިން ޤައުމީ ޓީމަށް ވެސް ނަގާފައިވާކަން އުފަލާއެކު ފާހަގަކުރާކަމަށް ޤައުމީ ޓީމަށް އެސިސްޓަންޓް ކޯޗެއްގެ ގޮތުގައި ކުރިން މަސައްކަތްކޮށްފައިވާ ޝުއައިބް ވިދާޅުވެފައިވެއެވެ.
ޝުޢައިބް ކޯޗް އެސް.އެން ޓީމާއި އެންމެ ފުރަތަމަ ޙަވާލުވީ 2019 ވަނަ އަހަރެވެ. އެ އަހަރު މުބާރާތުގެ ފިރިހެން އަދި އަންހެން ބައިން އެސް.އެން ޓީމް ވަނީ ސެމީ ފައިނަލްގައި ކުޅެފައެވެ. ޖެހިގެން އައި 2020 ވަނަ އަހަރު އެސް.އެންގެ އަންހެން ޓީމް ވަނީ ވޮލީ މުބާރާތުގެ ޗެމްޕިއަންކަން ހޯދާފައެވެ. މިއީ ކޯޗް ޓީމާއި ޙަވާލުވާ 3 ވަނަ އަހަރުކަމަށާއި މުބާރާތަށް ނުކުންނަނީ ތަށި ދިފާއުކުރުމުގެ އުއްމީދުގައިކަމަށް ކޯޗް ބުނެފައިވެއެވެ. ”މިއީ މިހާރު 3 ވަނަ އަހަރު މި ޓީމު ބައްޓަން ކުރަމުން އަންނަތާ. އެހެންވީމަ ވަރަށް އުންމީދު އެބައޮތް މިފަހަރު މުބާރާތުގެ ތަށި ނެގޭނެ ކަމަށް.“ ޝުޢައިބް ކޯޗް ބުނެފައިވެއެވެ.
ޝުޢައިބް ކޯޗް ފާހަގަކުރެވެނީ ކުޅުންތެރިންނާއި ގުޅޭ މަޑުމައިތިރި ކޯޗެއްގެ ގޮތުގައެވެ. ހިތްހެޔޮ އެކުވެރިއެއްގެ ގޮތުގައެވެ. މީގެ ކުރިން އެމް.އެން.ޔޫ ގެ ފެކަލްޓީއަކާއި އެކު މަސައްކަތްކުރިކަމުގައި ނުވިނަމަވެސް އެސް.އެން ޓީމަށް ކޮށްދެއްވާ މަސައްކަތް ނިއަރެސް އިން ޝުކުރުވެރިކަމާއިއެކު ފާހަގަކުރަމެވެ.
