ސްކޫލް އޮފް ނާރސިންގގެ ދަރިވަރުންނަށް ހާއްސަކޮށްގެން ނިއަރެސްއިން މާހެފުމެއް ބާއްވައިފިއެވެ. މިއީ ނިއަރެސްގެ ހިންގާ ކޮމެޓީގެ އިސްނެގުމާއެކު، ކުލާސްތަކުގެ ”ރެޕްރެޒެންޓޭޓިވްސް“ އަދި ބައެއް އިސްވާރުންގެ އެހީތެރިކަމާއެކު އިންތިޒާމުކޮށްގެން ކުރިޔަށް ގެންދިޔަ މާހެފުމެކެވެ.
ނިއަރެސް މާހެފުން 1444 ކުރިޔަށް ގެންގޮސްފައިވަނީ 18 މާރިޗް 2023 ވީ ހޮނިހިރު ދުވަހު އެސްއެން ކޮންފަރެންސް ހޯލުގައެވެ. މި މާހެފުމުގައި ސުކޫލް އޮފް ނާރސިންގގެ ޑީން އާސިޔާ އިބްރާހީމްގެ އިތުރުން، ބައެއް ލެކްޗަރާސް އަދި ކުރީގެ ބައެއް ހިންގާކޮމެޓީތަކުގެ މެންބަރުން ބައިވެރިވެފައިވެއެވެ.
މާހެފުން ފެށުމުގެ ކުރިން ސުކޫލް އޮފް ނާރސިނގްގެ ޑީން އާސިޔާ މިސް އެންމެހާ ދަރިވަރުންނާ މުޚާތަބުކޮށް ވާހަކަ ދައްކާފައިވެއެވެ.
މި މާހެފުމުގެ މައިގަނޑު މަޤްސަދަކީ ދަރިވަރުންނާއި ލެކްޗަރާއިންގެ މެދުގައި ގުޅުންބަދަހިކުރުމާއެކު، އެކުވެރި މާހައުލެއް ބިނާކުރުމެވެ.
ނިއަރެސްއިން އަންނަނީ މިއަހަރު ދަރިވަރުންނަށް ޚާއްސަކޮށްގެން ތަފާތު ގިނަ ހަރަކާތްތަކެއް ރާވާ ހިންގަމުންނެވެ. އެގޮތުން 28 މާރިޗް ވާ އަންގާރަ ދުވަހު މުޅިންއަލަށް ސްކޫލް އޮފް ނާރސިންގގައި ކިޔަވާ ދަރިވަރުންނަށް ހާއްސަކޮށްގެން ތަރާވީހެއް ބޭއްވުމަށްވަނީ ނިންމާފައެވެ. ނިއަރެސްގެ އުންމީދަކީ މިއަހަރަކީ ވެސް ކާމިޔާބު އަހަރަކަށް ވުމެވެ.
