ސޮސައިޓީ ފޯރ ޝަރީއާ އެންޑް ލޯ (އެސް އެސް އެލް) އަދި ނިއަރެސް ގުޅިގެން 2023 ވަނަ އަހަރުގެ ދެވަނަ ޓާމަށް ފެކަލްޓީ އޮފް ޝަރީއާ އެންޑް ލޯ (އެފް އެސް އެލް) އަދި ސުކޫލް އޮފް ނާރސިންއަށް އަލަށް ގުޅުނު ދަރިވަރުންނަށް ހާއްސަ ކޮށް ވޮންޑާރ ނައިޓް ކުރިއަށް ގެންގޮސްފިއެވެ.
20 އޯގަސްޓް 2023، އާދިއްތަ ދުވަހުގެރޭ ސުކޫލް އޮފް ނާރސިންގެ ކޮންފަރެންސް ހޯލްގައި ކުރިޔަށް ގެންދުވުނު މި ހަރަކާތުގައި ދެ ފެކަލްޓީގެ ކޯސްތަކަށް އަލަށް ގުޅުނު 40 ށްވުރެ ގިނަ ދަރިވަރުން ވަނީ ބައިވެރިވެފައެވެ.
ދެ ގޮފީގެ ހިންގާ ކޮމެޓީއިން އިސްނަގައިގެން، ދެ ގޮފީގެ އިސްވާރުންގެ އެހީތެރިކަމާއެކު ކުރިޔަށް ގެންދެވުނު މި ހަރަކާތަކީ ދެ ފެކަލްޓީގެ ކޯސްތަކަށް އަލަށް ގުޅުނު ދަރިވަރުންނަށް މަރުހަބާ ކިޔުމުގެ އިތުރަށް އެސް އެސް އެލް އަދި ނިއަރެސްގެ ހަރަކާތްތަކުގައި ބައިވެރިވާން ބޭނުންވާ އިސްވާރުންނަށް އެ ފުރުސަތު ތަނަވަސް ކޮށްދިނުމަށް ކުރިއަށް ގެންދެވުނު ހަރަކާތެކެވެ.
މި ހަރަކާތުގައި ސުކޫލް އޮފް ނާރސިންގެ އެކްޓިން ޑީން މަރިޔަމް ރަޝީދާ ވަނީ ބައިވެރިވެލައްވާފައެވެ. މީގެ އިތުރުން އެމް.އެން.ޔޫ.އެސްޔޫ ގެ 9 ވަނަ ދައުރުގެ ރައީސް އަބްދުﷲ ޝަހުނީޒްގެ އިތުރުން މި ދައުރުގެ ހިންގާ ކޮމެޓީގެ ބައެއް މެންބަރުން ވަނީ ބައިވެރިވެލައްވާފައެވެ.
އެކުވެރި މާހައުލެއްގައި ކުރިޔަށް ގެންދެވުނު މި ހަރަކާތުގައި، އަލަށް ގުޅުނު ދަރިވަރުންނަށް، ދެ ގޮފީގެ ހިންގާ ކޮމެޓީ ތައާރަފު ވުމުގެ އިތުރަށް ސުކޫލު އޮފް ނާރސިންގެ އެކްޓިން ޑީން މަރިޔަމް ރަޝީދާ އަދި އެމް.އެން.ޔޫ.އެސްޔޫ ގެ 9 ވަނަ ދައުރުގެ ރައީސް އަބްދުﷲ ޝަހުނީޒް ވަނީ ދަރިވަރުންނާ މުހާތަބު ކޮށް ވާހަކަ ދައްކަވާފައެވެ. ގިނަ ގޭމްތަކަކާއެކު ކުރިޔަށްގެންދެވުނު މި ހަރަކާތަށް ހުރިހާ ބައިވެރިންގެ ފަރާތުން ވަނީ ހޫނު ތަރުހީބެއް ލިބިގެން ގޮސްފައެވެ. އަދި އެސް އެސް އެލްގެ ދެ ދަރިވަރެއްގެ ފަރާތުން މުނިފޫހި ފިލުވުމުގެ އައިޓަމެއްވެސް ވަނީ ހުށަހަޅައިދީފައެވެ.
ވެލްކަމް ނައިޓާއެކު ދެ ގޮފީގެވެސް މި ޓާމުގެ ހަރަކާތްތައް ފެށިގެން ދިޔައިރު ދެ ގޮފީގެ ފަރާތުންވެސް މި ޓާރމުގައި ގިނަ ހަރަކާތްތަކެއް ކުރިޔަށް ގެންދިއުމަށް ނިންމާފައިވާކަމަށް ދެ ގޮފީގެ ހިންގާކޮމެޓީން މައުލޫމާތު ދެއެވެ.
