ނިއަރެސްގެ ފަރާތުން ސިލްސިލާކޮށް ބާއްވަމުން އަންނަ ”ނިއަރެސް ނައިޓް“ ތިން އަހަރުގެ މެދުކެނޑުމަކަށްފަހު ހުކުރު ދުވަހުގެރޭ ބޭއްވުމަށް ނިންމައިފިއެވެ.
ނިއަރެސްގެ ފަރާތުން އެންމެ ފަހުން މި ނައިޓް ބާއްވާފައިވަނީ 2019 ވަނަ އަހަރެވެ. އޭގެ ފަހުން ކޮވިޑްގެ އާލަމީވަބާއާ ގުޅިގެން ތިން އަހަރު ދުވަހުގެ މެދުކެނޑުމަކަށްފަހު މިމަހުގެ 27 ވާ ހުކުރު ދުވަހުގެ ރޭ މި ނައިޓް ބޭއްވުމަށް ހަމަޖެހިފައިވަނީ ސީ.އޭ އޮޑިޓޯރިއަމްގައެވެ.
ނިއަރެސް ނައިޓް ބޭއްވުމުގެ މައިގަނޑު މަގުސަދަކީ ދަރިވަރުންގެ ހުނަރުތައް ދައްކާލުމަށް ފުރުސަތު ދިނުމާއި އެކުވެރި މަޖާ މާހައުލެއްގެ ތެރެއިން ދަރިވަރުންގެ ގުޅުން ބަދަހިކުރުމެވެ. މިޝޯވގައި އެސް.އެންގެ ދަރިވަރުންގެ އިތުރުން އެހެން ފެކަލްޓީގެ ދަރިވަރުންނަށްވެސް ތަފާތު އައިޓަމްތައް ހުށަހެޅުމުގެ ފުރުސަތުވަނީ ހުޅުވާލެވިފައެވެ. ކޮންމެ އަހަރަކުވެސް މި ޝޯވ އަށް ތީމެއް ކަނޑައަޅައެވެ. އެގޮތުން މިއަހަރުގެ ތީމަކީ ”ނައިންޓީސް“ އެވެ.
މި ހާއްސަ ނައިޓް ބަލާލުމަށް ވަނުމުގެ ފުރުސަތު ޔުނިވަރސިޓީގެ ހުރިހާ ދަރިވަރުންނަށް ވަނީ ހުޅުވާލާފައެވެ. އަދި މިފަދަ ޝޯވތަކަށް އަބަދުވެސް ދަރިވަރުންގެ ތަރުހީބު ލިބެއެވެ.
ނިއަރެސް ނައިޓް އަކީ މުޅި އެސް.އެން ގައި ވެސް ބޭއްވޭ އެންމެ ފޯރިގަދަ އެއް ހަރަކާތެވެ.
