އެމް.އެން.ޔޫ.އެސް.ޔޫ – ނިއަރެސް އޮންލައިން ޤުރްޢާން އަދި މަދަހަ މުބާރާތް 1445 ގައި ބައިވެރިވުމުގެ ފުރުސަތު ހުޅުވާލައިފިއެވެ.
މި އަހަރުގެ މުބާރާތުގައި ބައިވެރިވުމުގެ ފުރުސަތު ދިވެހިރާއްޖޭގެ ޤައުމީ ޔުނިވަރސިޓީގެ އެންމެހާ ދަރިވަރުންގެ އިތުރުން، އެހެން ކޮލެޖް/ ޔުނިވަރސިޓީ/ހައި ސްކޫލް ތަކަށް ނިސްބަތް ވާ ދަރިވަރުންނަށް ވެސް ވާނީ ހުޅުވާލެވިފައެވެ.
މި މުބާރާތުގެ މަޤުސަދަކީ އެމް.އެން.ޔޫ އަދި އެހެން ކޮލެޖް/ޔުނިވަރސިޓީތަކުގައި މަތީ ތައުލީމު ހާސިލްކުރާ ދަރިވަރުންގެ މެދުގައި ރީތިކޮށް ތަޖުވީދުގެ ހަމަތަކުން ކީރިތ ޤުރްޢާން ކިޔެވުމުގެ ޝައުގުވެރިކަން އާލާކޮށް ދިރުވުމެވެ.
މުބާރަތުގައި ބައިވެރިވާން އެދޭ ދަރިވަރުންނަށް ނިއަރެސްގެ ފޭސްބުކް ޕޭޖުން ބައިވެރިވުމުގެ ގޫގުލް ފޯރމާއި އެކު މުބާރާތުގެ ގަވާއިދު ވެސް ލިބިގެންދާނެއެވެ.މި މުބާރާތަކީ އޮންލައިންކޮށް ކުރިއަށް ގެންދިއުމަށް ހަމަޖެހިފައިވާ މުބާރާތެކެވެ.
މުބާރާތުގައި ބައިވެރިވުމަށް ފޯމް ފުރުމުގެ ސުންގަޑި އަކީ 31 މާރޗް 2024 ވާ އާދިއްތަ ދުވަހުގެ ރޭ 23:59 ގެ ނިޔަލަށެވެ. މި އަހަރުގެ މުބާރާތުގައި ބައިވެރިވާ ބައިވެރީންގެ ވީޑިއޯތައް ފޮނުވާނީ ނިއަރެސް ގެ ފޭސްބުކް ޕޭޖްގައިވާ ނިއަރެސް ގެ ރަސްމީ މެއެއިލް އަދި ޓެލެގްރާމް ނަމްބަރު 941508 ށެވެ. ވީޑިއޯ ފޮނުވަން ކަނޑައެޅިފައިވާ ތާރީހަކީ 1 އޭޕްރިލް ވާ ހޯމަ ދުވަހުން ފެށިގެން 7 އޭޕްރިލް ވާ އާދިއްތަ ދުވަހުގެ ނިޔަލަށެވެ. ވީޑިއޯ މެއިލް ކުރާނީ އެކުއްޖެއްގެ ސްޓޫޑެންޓް މެއިލުންނެވެ. ހުށަހަޅާ ވީޑިއޯއާއެކު އެކުއްޖެއްގެ ނަމާއި، ސްޓޫޑެންޓް އައިޑީ ނަމްބަރާއި، ފެކަލްޓީ ގެ ނަން އަދި ފޯން ނަމްބަރު ލިޔަންވާނެއެވެ.
މި މުބާރާތުގައި ބައިވެރިން ހުށަހަޅާނީ ޤުރުއާންގެ 6 ފޮޅުވަތައް ވުރެ ދިގު ނުވާނެ މިންވަރަކަށް ކިޔެވުމަށް ފަހު ރެކޯޑް ކޮށްފައެވެ. 6 ފޮޅުވަތައް ވުރު ކުރު ވެގެން ވެސް ނުވާނެއެވެ. ވީޑިއޯ ވާންވާނީ 3 މިނަޓަށް ވުރެ ކުރު ނޫން، 5 މިނަޓަށް ވުރެ ދިގު ނޫޏް ވީޑިއޯއަކަށެވެ. މި ވީޑިއޯ ހުށާހަޅާނީ ”އެމްޕީ 4، މޫނު ފެންނަ ގޮތައް، ލޭންޑްސްކޭޕްކޮށެވެ.“
މި މުބާރާތް 2 ކެޓަގަރީއަކަށް ކުރިއަށް ގެންދެވޭނެއެވެ. އެއީ ތަރުތީލް ގެ މަގުން ކީރިތި ޤުރުއާން ކިޔެވުމުގެ ބަޔާއި މަދަހަ ހުށަހެޅުމުގެ ބައެވެ.
ޤުރުއާން އަދި މަދަހައިން ވެސް ހޮވިގެން ދާނީ 1 ވަނަ، 2 ވަނަ އަދި 3 ވަނަ އެވެ. މުބާރާތުގެ ގަދަ 5 ހޮވިގެންދާނީ ފަނޑިޔާރުންގެ ޕެނަލަކުން މާރކްސް ދެވިގެން އެންމެ މަތިން މާރކްސް ލިބޭ 5 ބައިވެރިންގެ ހުށަހެޅުން ނިއަރެސް ގެ ފޭސްބުކް ޕޭޖުގައި އާންމުކުރެވިގެންނެވެ. އަދި މި ހުށަހެޅުން ތަކުގެ ތެރެއިން އެންމެ ގިނަ ރިއެކްޓް ލިބޭ ހުށަހެޅުމެއް ތަރުތީބުން 1 ވަނަ، 2 ވަނަ، 3 ވަނަ ހޮވިގެންދާނެއެވެ. މި މުބާރާތުގައި ވަނަ ވަނައަށް ދާ ބައިވެރިންނަށް އަގު ހުރި ގިފްޓް ހެމްޕަރ އެއް ލިބިގެންދާނެއެވެ. އަދި މި މުބާރާތުގައި ބައިވެރިވާ ކޮންމެ ބައިވެރިއަކަށް މުބާރާތުގައި ބައިވެރިވިކަމުގެ ސްޓްފިކެޓެއް ލިބޭނެއެވެ.
މި މުބާރާތަކީ ނިއަރެސް އިން މުޅިން އަލަށް މި އަހަރު އިންތިޒާމު ކޮށްގެން ހިންގާ މުބާރާތެކެވެ.
