1439 ވަނަ އަހަރުގެ ރަމަޟާން މަހަށް ޚާއްޞަކޮށްގެން ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން ދީނީ ސުވާލު މުބާރާތެއް ބޭއްވުމަށް ހަމަޖައްސައިފިއެވެ. ”އެމް.އެން.ޔޫ.އެސް.ޔޫ ދީނީ ސުވާލު މުބާރާތް 2018″ގެ ނަމުގައި ބޭއްވުމަށް ހަމަޖެހިފައިވާ މި މުބާރާތް ކުރިއަށްދާނީ އެމް.އެން.ޔޫ.އެސް.ޔޫގެ ފޭސްބުކް ޕޭޖު މެދުވެރިކޮށެވެ.
މި މުބާރާތުގައި ރަމަޟާންމަހުގެ ކޮންމެ ދުވަހަކުވެސް އެމް.އެން.ޔޫ.އެސް.ޔޫގެ ފޭސްބުކް ޕޭޖަށް ސުވާލެއް ޕޯސްޓު ކުރެވޭނެއެވެ. އަދި ސުވާލުގެ ޖަވާބު ދިނުމަށް ގޫގުލް ފޯމްސްގެ ލިންކެއް ސުވާލާއެކު ޕޯސްޓުކުރެވޭނެއެވެ. މި ސުވާލު މުބާރާތަކީ ހަމައެކަނި އެމް.އެން.ޔޫ ދަރިވަރުންނަށް ހުޅުވާލެވިފައިވާ މުބާރާތެއް ނޫންކަމަށާއި، ހުރިހާ ދިވެހިރައްޔިތުންނަށް ހުޅުވާލެވިފައިވާ ސުވާލު މުބާރާތެއްކަމަށް އެމް.އެން.ޔޫ.އެސް.ޔޫގެ ނައިބު ރައީސް (ޢިލްމީ) އާދަމް ރުޝްދީ މަޢުލޫމާތުދެއްވިއެވެ.
މުބާރާތުގައި ރަމަޟާން މަހުގެ ކޮންމެ 10 ދުވަހަކުން އެންމެ ގިނަ ޖަވާބު ދިމާކުރާ ފަރާތްތަކުގެ މެދުގައި ނެގޭ ގުރުއަތަކުން ހޮވޭ ފަރާތްތަކަށް އިނާމުދިނުމަށް ނިންމާފައިވާއިރު، މުޅި މުބާރާތުގައި އެންމެ ގިނަ ރަނގަޅު ޖަވާބުދޭ ފަރާތްތަކުގެ މެދުގައި ގުރުއަތުނަގައިގެން ބޮޑު އިނާމެއްދިނުމަށްވެސް ވަނީ ހަމަޖެހިފައެވެ.
މި މުބާރާތް ރަމަޟާންމަހުގެ ފުރަތަމަދުވަހު ފެށޭނެއެވެ.