ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ (އެމް.އެން.ޔޫ.އެސް.ޔޫ) މާލޭ ކެމްޕަހުގެ ގޮފިތަކުގެ ހިންގާކޮމިޓީގެ މެންބަރުންނަށް މަޤާމު ޙަވާލުކޮށްފިއެވެ. 16 ފެބުރުވަރީ 2018ވީ ހުކުރުދުވަހުގެރޭ އެމް.އެން.ޔޫގެ ”އެފް.އީ“ އޮޑިޓޯރިއަމްގައި ކުރިއަށްދިޔަ ޚާއްޞަ ރަސްމިއްޔާތެއްގައި މި މަޤާމުތައް ޙަވާލުކުރެވިގެންދިޔައިރު، މި ރަސްމިއްޔާތުގައި ތަފާތު އެތައް ކަމެއް ކުރިއަށްގެންދެވިފައިވެއެވެ. ހުކުރުދުވަހުގެރޭ 08:45ގައި ފެށުނު މި ރަސްމިއްޔާތު ޝަރަފުވެރިކޮށްދެއްވީ ޣިޔާޘުއްދީން އިންޓަރނޭޝަނަލް ސްކޫލުގެ ޕްރިންސިޕަލް އަދި އެމް.އެން.ޔޫ ފެކަލްޓީ އޮފް އެޑިއެކޫޝަންގެ އެޑްވައިޒަރީ ބޯޑުގެ މެންބަރު އަލްފާޟިލް ޠާހާ ސަލީމެވެ. މި ރަސްމިއްޔާތުގައި އެމް.އެން.ޔޫގެ ޗާންސެލަރ ޑރ. މުޙައްމަދު ލަޠީފް، ވައިސް ޗާންސެލަރ ޑރ. ޢަލީ ފަވާޒް ޝަރީފް، ޑެޕިއުޓީ ވައިސް ޗާންސެލަރ ޑރ. މުޢާވިޔަތު މުޙައްމަދު، ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދުގެ އިތުރުން ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު ބައިވެރިވެވަޑައިގެންނެވިއެވެ.
މި ރަސްމިއްޔާތުގައި އެމް.އެން.ޔޫ މާލޭ ކެމްޕަހަށް ނިޞްބަތްވާ އެމް.އެން.ޔޫ.އެސް.ޔޫގެ 9 ގޮތްޕެއްގެ ހިންގާ ކޮމިޓީތައް ވަނީ އިފްތިތާޙުކޮށްފައެވެ. މީގެ ތެރޭގައި އެމް.އެން.ޔޫގެ ފެކަލްޓީ އޮފް އެންޖިނިއަރިންގ ޓެކްނޮލޮޖީ އަދި ފެކަލްޓީ އޮފް ސައިންސް އެއްކޮށްލުމަށްފަހު ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ އުފެއްދުމުން އެ ފެކަލްޓީގައި އަލަށް ޤާއިމު ކުރެވުނު ގޮތްޕާއި، ފެކަލްޓީ އޮފް ޝަރީޢާ އެންޑް ލޯ އަދި ފެކަލްޓީ އޮފް އިސްލާމިކް ސްޓަޑީޒް އެއްކޮށްލުމަށްފަހު ފެކަލްޓީ އޮފް ލޯ އެންޑް އިސްލާމިކް ސްޓަޑީޒް އުފެއްދުމުން އެ ފެކަލްޓީގައި ޤާއިމު ކުރެވުނު ގޮތްޕާއި، އެމް.އެން.ޔޫގައި މުޅީން އަލަށް ޤާއިމު ކުރެވުނު ސްކޫލް އޮފް ނާރސިންގ އަށް ނިޞްބަތްވާ ގޮފީގެ އިތުރުން ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ)، ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ)، ސިއާ، ހީލާރސް، ސޮސައިޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް) އަދި ތަރަޙަ ހިމެނެއެވެ.
ގޮފިތަކުގެ ސެކްރެޓަރީންނަށް މަޤާމު ޙަވާލުކުރެވުނުކަމުގެ ލިޔުން ޙަވާލުކޮށްދެއްވީ ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު އެވެ. މީޑިއާ ކޯޑިނޭޓަރުންނަށް، އެމް.އެން.ޔޫގެ ކުރީގެ ޑައިރެކްޓަރ އޮފް ސްޓޫޑެންޓްސް އަލްފާޟިލް މުޙައްމަދު މުޞްޠަފާ ޙުސައިން މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވިއިރު، ގޮފިތަކުގެ ޚަޒާންދާރުންނަށް މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވީ އެމް.އެން.ޔޫގެ ޑެޕިއުޓީ ވައިސް ޗާންސެލަރ ޑރ. މުޢާވިޔަތު މުޙައްމަދެވެ. ގޮފިތަކުގެ ނައިބު ރައީސް (ޢަމަލީ) އަށް މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވީ އެމް.އެން.ޔޫގެ ވައިސް ޗާންސެލަރ ޑރ. އަލީ ފަވާޒް ޝަރީފް ކަމަށް ވާއިރު، ނައިބު ރައީސް (ޢިލްމީ)އަށް މަޤާމު ޙަވާލުކުރެވުނުކަމުގެ ލިޔުން ޙަވާލުކޮށްދެއްވީ އެމް.އެން.ޔޫގެ ޗާންސެލަރ ޑރ. މުޙައްމަދު ލަޠީފެވެ. އެމް.އެން.ޔޫ.އެސް.ޔޫގެ މާލޭ ކެމްޕަހުގެ ގޮފިތަކުގެ ރައީސުންނަށް މަޤާމު ޙަވާލުކުރެވުނު ކަމުގެ ލިޔުން ޙަވާލުކޮށްދެއްވީ ރަސްމިއްޔާތުގެ ޝަރަފުވެރި މެޙްމާން އަލްފާޟިލް ޠާހާ ސަލީމެވެ.
މި ރަސްމިއްޔާތުގައި އެމް.އެން.ޔޫ.އެސް.ޔޫގެ ރަސްމީ ޓީޝާޓާއި، ރަސްމީ ޔޫޓިއުބް ޗެނަލް އަދި އާ ރަސްމީ ވެބްސައިޓުވަނީ އިފްތިތާޙުކުރެވިފައެވެ. އަދި ހަމައެހެންމެ އެމް.އެން.ޔޫ.އެސް.ޔޫގެ ހިންގާ ކޮމިޓީއަށް ލަފާއަރުވާ ބޯޑުވެސް ވަނީ މި ރަސްމިއްޔާތުގައި އިފްތިތާޙުކުރެވިފައެވެ. މީގެ އިތުރުން ”އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ނިޝާން”ގެ ނަމުގައި ޔޫނިއަންއަށް ތަފާތު އެކި ރޮނގުން ގިނަ ދުވަސްތަކެއްވާންދެން ޚިދުމަތްކޮށްދެއްވާފައިވާ ފަރާތްތަކަށް ދިނުމަށް އެވޯޑެއްވެސް ތަޢާރަފުކުރެވިފައިވެއެވެ.
ރަސްމިއްޔާތުގެ އެންމެ ޚާއްޞަ ނަންބަރެއްގެ ގޮތުގައި ކުރިއަށްދިޔައީ މިދިޔަ 2017 ވަނަ އަހަރުގެ ޑިސެމްބަރ މަހު ހިތާމަވެރި ޙާދިސާއެއްގައި ނިޔާވި، އެމް.އެން.ޔޫގެ ފެކަލްޓީ އޮފް ސައިންސްގައި ބެޗްލަރސް އޮފް ސައިންސް ކިޔަވަމުންދިޔަ ދަރިވަރު، ހދ. ނޮޅިވަރަމް ހިތަށްފިނިވާގޭ އަޙުމަދު މުޙައްމަދުގެ ހަނދާނުގައި އެވޯޑެއް ތަޢާރަފުކުރެވިގެން ދިއުމެވެ. މީގެ އިތުރުން ރަސްމިއްޔާތު ޝަރަފުވެރިކޮށްދެއްވި ފަރާތަށް އެމް.އެން.ޔޫ.އެސް.ޔޫގެ ފަރާތުންވަނީ ޚާއްޞަ ފިލައެއްވެސް އަރުވާފައެވެ.
އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) އަލްފާޟިލް ޢަލީ ޝަމްޢޫން، އެމް.އެން.ޔޫ.އެސް.ޔޫގެ ރައީސް އަލްފާޟިލް އަރުޝަދު އަޝްރަފްގެ އިތުރުން އެމް.އެން.ޔޫގެ ވައިސް ޗާންސެލަރ ޑރ. އަލީ ފަވާޒް ޝަރީފުގެ އިތުރުން ރަސްމިއްޔާތުގެ ޝަރަފުވެރި މެހްމާން އަލްފާޟިލް ޠާހާ ސަލީމްވަނީ ރަސްމިއްޔާތުގައި ވާހަކަ ދައްކަވާފައެވެ.
އެމް.އެން.ޔޫ.އެސް.ޔޫގެ މާލޭ ކެމްޕަހުގެ ގޮފިތަކުގެ ހިންގާކޮމިޓީތައް އިފްތިތާހުކުރެވިގެންދިޔައިރު، އެމް.އެން.ޔޫ.އެސް.ޔޫގެ ހިންގާ ކޮމިޓީގެ އަމާޒަކީ ކައިރި މުސްތަޤްބަލެއްގައި އަތޮޅުތެރޭގެ ކެމްޕަސްތަކުގެ ގޮފިތައްވެސް އިފްތިތާހު ކުރުމުވެ.
