ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި މި ޖަމިއްޔާގެ ގޮތްޕެއްކަމަށްވާ ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް) އަދި ޖަމިއްޔަތުއްސަލަފް ގުޅިގެން ”ރަމަޟާންމަހަށް ތައްޔާރުތޯ؟“ގެ ނަމުގައި ދީނީ ދަރުހެއް ބާއްވައިފިއެވެ. 14 މެއި 2018ވީ ހޯމަދުވަހުގެރޭ 08:30ގައި އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި ބޭއްވުނު މި ދަރުސް ދެއްވާފައިވަނީ ޖަމިއްޔަތުއްސަލަފްގެ ޢިލްމުވެރިންގެ މަޖިލީހުގެ ރައީސް އައްޝައިޚް އަޙްމަދު ސަމީރެވެ.
މި ދަރުސް ޝައިޚް އަޙްމަދު ސަމީރުގެ ފޭސްބުކް ޕޭޖު މެދުވެރިކޮށްވަނީ ވަގުތުން ދުރަށް ދައްކާފައެވެ. ރަމަޟާންމަހުގެ މުޙިއްމުކަމާއި ރަމަޟާންމަހުން ޙަޔާތަށް ގެންނަންވީ ބަދަލުތަކާއިބެހޭގޮތުން ޝައިޚްވަނީ ވާހަކަދައްކަވާފައެވެ. ރަމަޟާންމަހުގައި ޢަމަލުކުރުމުގައި ކަންތައް ކުރަންވީގޮތާއި ހެޔޮ ޢަމަލުތައް ގިނަކޮށް ކުޅިވަރުކުޅުން މަދުކުރުމަށް ޝައިޚް ނަސޭޙަތްތެރިވިއެވެ. އަދި ރަމަޟާންމަހަށް ތައްޔާރުވާ މީހަކު ޢަމަލުކުރަންވީގޮތްވެސް ދަރުހުގައިވަނީ ކިޔައިދެއްވާފައެވެ.
މިފަދަ ދަރުހެއް ރަމަޟާންމަހުގެ ތެރޭގައިވެސް އިންތިޒާމުކުރުމުގެ މަސައްކަތް ކުރިއަށްދާކަމަށް އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފްވަނީ ވިދާޅުވެފައެވެ.
