ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން އިންތިޒާމުކޮށްގެން ބާއްވާ ”މެކްސްކޮމް އެމް.އެން.ޔޫ.އެސް.ޔޫ އިންޓަރފެކަލްޓީ ވޮލީބޯޅަ މުބާރާތް 2018″ގެ ގުރުއަތުލުމުގެ ރަސްމިއްޔާތު ބާއްވައިފިއެވެ. ފެކަލްޓީ އޮފް އެޑިއުކޭޝަންގެ ”ބީ-12“ ކްލާސްރޫމުގައި ކުރިއަށްދިޔަ މި ރަސްމިއްޔާތުގައި މުބާރާތުގެ ހިންގާ ކޮމިޓީގެ މެންބަރުންނާއި، ޓީމުތަކުގެ މެނޭޖަރުންނާއި ބައެއް ކުޅުންތެރިން ބައިވެރިވެވަޑައިގެންނެވިއެވެ. މި ރަސްމިއްޔާތުވަނީ ޔޫނިއަންގެ ފޭސްބުކް ޕޭޖުން ވަގުތުން ދުރަށް ދައްކާފައެވެ.
މި މުބާރާތުގައި ފިރިހެން އަދި އަންހެން ޑިވިޜަނުން ކޮންމެ ޑިވިޜަނަކުންވެސް 6 ޓީމު ބައިވެރިވެފައިވާއިރު، މުބާރާތުގެ 2 ޑިވިޜަންވެސް ކުރިއަށްދާނީ އެއްގޮތަށެވެ. މިގޮތުން، 6 ޓީމު 2 ގުރޫޕަކަށް ބަހާލެވި، ކޮންމެ ގުރޫޕެއްގެ ޓީމުތައްވެސް އެ ގުރޫޕެއްގެ އެއްޓީމު އަނެއް ޓީމާއި ކުޅޭނެއެވެ. ސެމީ ފައިނަލުގައި 3 މެޗު ކުޅުމަށް ހަމަޖެހިފައިވާއިރު، ފުރަތަމަ ސެމީގައި ވާދަކުރާނީ 2 ގުރޫޕުން އެއްވަނައަށްދާ 2 ޓީމެވެ. ދެވަނަ ސެމީގައި 2 ގުރޫޕުން ދެވަނައަށްދިޔަ 2 ޓީމު ވާދަކޮށް، 3 ވަނަ ސެމީގައި ވާދަކުރާނީ ފުރަތަމަ ސެމީއިން ބަލިވާ ޓީމާއި ދެވަނަ ސެމީއިން މޮޅުވާ ޓީމެވެ. އަދި ފައިނަލު މެޗުގައި ވާދަކުރާނީ ފުރަތަމަ ސެމީ އަދި ތިންވަނަ ސެމީއިން މޮޅުވާ 2 ޓީމެވެ.
މުބާރާތުގެ އަންހެން ޑިވިޜަންގެ ގުރޫޕްތައް ބަހާލެވިފައިވާ ގޮތަކީ:
ގުރޫޕް 1: ފެކަލްޓީ އޮފް ލޯ އެންޑް އިސްލާމިކް ސްޓަޑީޒް، ބިޒްނަސް ސްކޫލް އަދި ފެކަލްޓީ އޮފް ހެލްތް ސައިންސަސް.
ގުރޫޕް 2: ފެކަލްޓީ އޮފް އެޑިއުކޭޝަން، ސްކޫލް އޮފް ނާރސިންގ އަދި ސެންޓަރ ފޯ ފައުންޑޭޝަން ސްޓަޑީޒް.
މުބާރާތުގެ ފިރިހެން ޑިވިޜަންގެ ގުރޫޕްތައް ބަހާލެވިފައިވާ ގޮތަކީ:
ގުރޫޕް 1: ފެކަލްޓީ އޮފް ހެލްތް ސައިންސަސް، ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް، ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ
ގުރޫޕް 2: ފެކަލްޓީ އޮފް ލޯ އެންޑް އިސްލާމިކް ސްޓަޑީޒް، ފެކަލްޓީ އޮފް އެޑިއުކޭޝަން، ބިޒްނަސް ސްކޫލް.
މި މުބާރާތް ފެށުމަށް ހަމަޖެހިފައިވަނީ 22 ފެބުރުވަރީ 2018ވާ ބުރާސްފަތިދުވަހުގެރޭ 08:30ގައެވެ. މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ އެމް.އެން.ޔޫގެ ފެކަލްޓީ އޮފް އެޑިއުކޭޝަންގެ ޕީ.އީ ހޯލުގައެވެ. މި މުބާރާތް ކުރިއަށްދާނީ ފެބުރުވަރީ މަހުގެ 22ން 24ގެ ނިޔަލަށެވެ. މުބާރާތުގެ މެޗު ތާވަލު މި ސައިޓުގެ ޑައުންލޯޑްސް ޕޭޖުން ލިބިވަޑައިގަންނަވާނެއެވެ.
މުބާރާތުގެ ޓައިޓްލް ސްޕޮންސަރ އަކީ ”މެކްސްކޮމް ޓެކްނޮލޮޖީސް“އެވެ. އަދި ކޯ-ސްޕޮންސަރ އަކީ ”ފިއުލް އެކްސްޕްރެސް މޯލްޑިވްސް“އެވެ.
