ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންއިން އިންތިޒާމުކޮށްގެން ބާއްވާ ”މެކްސްކޮމް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2018“ ފަށައިފިއެވެ. މި މުބާރާތުގެ ފެށުމުގެ ރަސްމިއްޔާތު ކުރިއަށްދިޔައީ 22 ފެބުރުވަރީ 2018ވީ ބުރާސްފަތިދުވަހުގެރޭ 08:00ގައި ފެކަލްޓީ އޮފް އެޑިއުކޭޝަންގެ ޕީ.އީ ހޯލުގައެވެ. މި ރަސްމިއްޔާތު ޝަރަފުވެރިކޮށްދެއްވީ ވީ.އޭ.އެމްގެ ޖެނެރަލް ސެކްރެޓަރީ އަހްމަދު އަދީލް އެވެ. އަދި ހަމަ އެހެންމެ މި ރަސްމިއްޔާތުގައި އެމް.އެން.ޔޫގެ ޑެޕިއުޓީ ވައިސް ޗާންސެލަރ އަލްފާޟިލާ އައިޝަތު ޝާހީން އާއި ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢުގެ އިތުރުން އެފް.އެޗް.އެސްގެ ޑީން އަލްފާޟިލާ އައިޝަތު ޝާހީން އިސްމާޢީލް، ކުރީގެ ހެޑް އޮފް ސްޓޫޑެންޓް ސަޕޯޓް އަލްފާޟިލާ އައިޝަތު ސުވާދު އަދި އެފް.އެޗް.އެސްގެ ލެކްޗަރަރ އަލްފާޟިލް މުޙައްމަދު ޒައިދު ބައިވެރިވެވަޑައިގެންނެވިއެވެ. މުބާރާތުގައި ބައިވެރިވި ހުރިހާ ޓީމެއް ބައިވެރިވި މި ރަސްމިއްޔާތުގައި ޝަރަފްވެރި މެހްމާންގެ އިތުރުން، ޑެޕިއުޓީ ވައިސް ޗާންސެލަރ އަލްފާޟިލާ އާއިޝަތު ޝާހީން، މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު، އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް އަދި އެމް.އެން.ޔޫ.އެސް.ޔޫގެ ނައިބު ރައީސް (ޢަމަލީ) ޙަސަން ޝާހު ވާހަކަފުޅު ދައްކަވާފައިވެއެވެ.
މުބާރާތުގައި ބުރާސްފަތިދުވަހުގެރޭ ކުޅެވުނީ 2 މެޗެކެވެ. އެއީ ފިރިހެން ޑިވިޜަންގެ މެޗަކާއި އަންހެން ޑިވިޜަންގެ މެޗެކެވެ. މިގޮތުން މުޅި މުބާރާތުގެވެސް ފުރަތަމަ މެޗުގައި ވާދަކުރީ ”އެފް.އެޗް.އެސް“ އާއި ”އެފް.އެޗް.ޓީ.އެސް“ އެވެ. ވާދަވެރި ކުޅުމަކަށްފަހު މި މެޗު 25-17 އަދި 29-27ގެ ނަތީޖާއަކުން ސީދާ 2 ސެޓުން ކާމިޔާބުކުރީ ”އެފް.އެޗް.ޓީ.އެސް“ އެވެ.
މުބާރާތުގެ ދެވަނަ މެޗު އަދި އަންހެން ޑިވިޜަނުގެ ފުރަތަމަ މެޗުގައި ވާދަކުރީ ”އެފް.އެލް.އައި.އެސް“ އަދި ”ބީ.އެސް“އެވެ. މި މެޗު 25-18 އަދި 25-13ގެ ނަތީޖާއަކުން ސީދާ 2 ސެޓުން ކާމިޔާބުކުރީ ”ބީ.އެސް“އެވެ.
މުބާރާތުގެ މެޗުތައް މާދަމާ ހެނދުނު އަދި މާދަމާ ހަވީރުވެސް ކުރިއަށްދާނެއެވެ. މާދަމާ ހެނދުނު ކުޅޭނީ 2 މެޗެކެވެ. އެއީ އަންހެން ޑިވިޜަނުން ”އެފް.އީ“ އަދި ”އެސް.އެން“ ވާދަކުރާ މެޗާއި، ”އެފް.އެލް.އައި.އެސް“ އަދި ”އެފް.އެޗް.އެސް“ އާއި ވާދަކުރާ މެޗެވެ.
މުބާރާތުގެ ޓައިޓްލް ސްޕޮންސަރ އަކީ ”މެކްސްކޮމް ޓެކްނޮލޮޖީސް“އެވެ. ކޯ-ސްޕޮންސަރުންނަކީ ”ދިރާގު“ އަދި ”ފިއުލް އެކްސްޕްރެސް މޯލްޑިވްސް“ އެވެ. މީޑިއާ ޕާރޓްނަރަކީ ”ސަން މީޑިއާ ގްރޫޕް“ އެވެ.
