ގްރޫޕް ސްޓޭޖްގެ ނިމުން: ފިރިހެން ޑިވިޜަނުގެ މިދިޔަ އަހަރުގެ ޗެމްޕިއަން ޓީމު ”އެފް.އީ“ މުބާރާތާއި އަލްވަދާޢު ކިޔައިފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން އިންތިޒާމުކޮށްގެން ބާއްވާ ”މެކްސްކޮމް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2018″ގެ ގްރޫޕްސްޓޭޖް މެޗުތައް ކުޅެ ނިމިއްޖެއެވެ. ބުރާސްފަތި ދުވަހުގެރޭ ފެށުނު މުބާރާތުގައި އެރޭ 2 މެޗު ކުޅެފައިވާއިރު، ހުކުރުދުވަހު ހެނދުނު އިތުރު 2 މެޗު ކުޅެވުނެވެ. ހުކުރުދުވަހުގެ (23 ފެބުރުވަރީ 2018) މެންދުރުފަހު 02:30ގައި މުބާރާތުގެ 5 ވަނަ މެޗުގައި ފިރިހެން ޑިވިޜަނުގެ މިދިޔަ އަހަރު ރިހި މެޑަލް ހޯދި ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް) އާއި މިދިޔަ އަހަރު ރަން މެޑަލް ހޯދި ފެކަލްޓީ އޮފް އެޑިއުކޭޝަން (އެފް.އީ) ބައްދަލުކުރި މެޗު ނިމުނީ ފޯރިގަދަކުޅުމަކަށްފަހު ”އެފް.އެލް.އައި.އެސް“ މޮޅުވެގެންނެވެ. މި މެޗުގެ ފުރަތަމަ ސެޓު އެފް.އެލް.އައި.އެސް އިން 25-20ގެ ނަތީޖާއަކުން ގެންގޮސްފައިވަނިކޮށް ދެވަނަ ސެޓު އެފް.އީ އިން ކާމިޔާބުކުރީ 25-19ގެ ނަތީޖާއަކުންނެވެ. ނަތީޖާ ނެރުމަށް ކުޅެވުނު 3 ވަނަ ސެޓު އެފް.އެލް.އައި.އެސް އިން ކާމިޔާބު ކުރީ 15-12ގެ ނަތީޖާއަކުންނެވެ. މުބާރާތުގެ 6 ވަނަ މެޗުގައި ފެކަލްޓީ އޮފް ހެލްތް ސައިންސަސް (އެފް.އެޗް.އެސް) އާއި ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް) ބައްދަލުކުރިއިރު، މި މެޗު ސީދާ 2 ސެޓުން ކާމިޔާބުކުރީ ”ފެސްޓް“ އިންނެވެ. މި މެޗުގެ 2 ސެޓުވެސް ނިމުނީ 25-20ގެ ނަތީޖާއަކުންނެވެ. މި ނަތީޖާއާއި އެކު އެފް.އެޗް.އެސް މުބާރާތާއި އަލްވަދާޢުކިޔަން ޖެހުނުއިރު އެ ގްރޫޕްގައި ދެން ހިމެނޭ 2 ޓީމު ކަމަށްވާ ފެސްޓް އަދި އެފް.އެޗް.ޓީ.އެސް މުބާރާތުގެ ސެމީ ފައިނަލަށް ދަތުރުކުރިއެވެ. މުބާރާތުގެ 7 ވަނަ މެޗު އަދި ފިރިހެން ޑިވިޜަނުގެ 4 ވަނަ މެޗުގައި ބައްދަލުކުރީ އެފް.އެލް.އައި.އެސް އާއި މޯލްޑިވްސް ނޭޝަނަލް ޔުނިވަރސިޓީ ބިޒްނަސް ސްކޫލް (އެމް.އެން.ޔޫ.ބީ.އެސް)އެވެ. މި މެޗު 2 ސެޓު 1 ސެޓުން އެފް.އެލް.އައި.އެސްއިން ކާމިޔާބުކޮށް ސެމީގެ ޖާގައެއް ގުރޫޕްގެ އެއްވަނައިގެ ގޮތުގައި ކަށަވަރުކުރިއެވެ. މި މެޗުގެ ފުރަތަމަ ސެޓު 25-15ގެ ނަތީޖާއަކުން އެފް.އެލް.އައި.އެސް އިން ކާމިޔާބުކޮށްފައިވަނިކޮށް، އެމް.އެން.ޔޫ.ބީ.އެސް އިން ވަނީ މެޗުގެ 2 ވަނަ ސެޓު 25-22ގެ ނަތީޖާއަކުން ކާމިޔާބުކޮށްފައެވެ. ނަތީޖާނެރުމަށް ކުޅެވުނު 3 ވަނަ ސެޓު 15-13ގެ ނަތީޖާއަކުން ކާމިޔާބުކޮށް އެފް.އެލް.އައި.އެސް އިން މެޗު ކާމިޔާބުކުރިއެވެ.

އެއަށްފަހު ދެން ކުޅެވުނީ އަންހެން ޑިވިޜަނުގެ 4 ވަނަ މެޗު އަދި މުބާރާތުގެ 8 ވަނަ މެޗެވެ. މި މެޗު ސެންޓަރ ފޯ ފައުންޑޭޝަން ސްޓަޑީޒް އާއި ވާދަކޮށް ފަސޭހަކަމާއެކު ސީދާ 2 ސެޓުން ކާމިޔާބުކުރީ އެފް.އީ އެވެ. މެޗުގެ ނަތީޖާތައް ދިޔައީ 25-11 އަދި 25-15ންނެވެ. މިއާއިއެކު، އެފް.އީ އިން ގްރޫޕްގެ 1 ވަނަ ޖާގަ ކަށަވަރުކޮށް ސެމީއަށް ދަތުރުކުރިއެވެ. ދެން ކުޅެވުނީ އަންހެން ޑިވިޜަނުގެ 5 ވަނަ މެޗު އަދި މުބާރާތުގެ 9 ވަނަ މެޗެވެ. މި މެޗު ފެކަލްޓީ އޮފް ހެލްތް ސައިންސަސް (އެފް.އެޗް.އެސް) އާއި ވާދަކޮށް ސީދާ 2 ސެޓުން ކާމިޔާބުކުރީ އެމް.އެން.ޔޫ.ބީ.އެސް އެވެ. މެޗުގެ ސެޓުތައް ނިމުނީ 25-18 އަދި 25-10ގެ ނަތީޖާތަކަކުންނެވެ. މިއާއިއެކު، އެމް.އެން.ޔޫ.ބީ.އެސް އަށް ގްރޫޕްގެ 1 ވަނަ އަދި އެފް.އެޗް.އެސް އަށް ގްރޫޕްގެ 2 ވަނަ ކަށަވަރުވެގެންދިޔައެވެ. އަންހެން ޑިވިޜަނުގެ ގްރޫޕް ސްޓޭޖްގެ ފަހު މެޗު އަދި މުބާރާތުގެ 10 ވަނަ މެޗުގައި ވާދަކުރީ ސްކޫލް އޮފް ނާރސިންގ އަދި ސެންޓަރ ފޯ ފައުންޑޭޝަން ސްޓަޑީޒް އެވެ. މި މެޗު ފަސޭހަކަމާއެކު ސީދާ 2 ސެޓުން ކާމިޔާބުކުރީ ސްކޫލް އޮފް ނާރސިންގ (އެސް.އެން)އެވެ. މެޗުގެ ސެޓުތައް ނިމުނީ 25-06 އަދި 25-16ގެ ނަތީޖާތަކަކުންނެވެ. މިއާއިއެކު ގްރޫޕްގެ 2 ވަނައިގެ ގޮތުގައި އެސް.އެން ސެމީއަށް ދަތުރުކުރިއެވެ.

މުބާރާތުގެ 11 ވަނަ މެޗު އަދި ފިރިހެން ޑިވިޜަނުގެ 5 ވަނަ މެޗުގައި ހުކުރުދުވަހުގެރޭ 09:30ގައި ވާދަކުރީ ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް) އަދި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް)އެވެ. މި މެޗު ފެށުނުއިރު 2 ޓީމުވެސް އޮތީ ސެމީއަށް ދަތުރުކޮށްފައެވެ. މި މެޗަކީ ގްރޫޕްގެ 1 ވަނަ ޖާގަ ކަށަވަރުވާނޭ މެޗެވެ. މި މެޗު ސީދާ 2 ސެޓުން (25-15 އަދި 25-21) ކާމިޔާބުކޮށް ގްރޫޕްގެ 1 ވަނަ ޖާގަ ކަށަވަރުކުރީ އެފް.އެޗް.ޓީ.އެސް އެވެ. މުބާރާތުގެ އަދި ފިރިހެން ޑިވިޜަނުގެ ގްރޫޕް ސްޓޭޖްގެ ފަހު މެޗުގައި އެފް.އީ އަދި އެމް.އެން.ޔޫ.ބީ.އެސް ވާދަކުރިއިރު، މި މެޗަކީ އެ 2 ޓީމަށްވެސް ވަރަށް މުޙިއްމު މެޗަކަށްއޮތީވެފައެވެ. އެއީ، މޮޅުވާ ޓީމަކަށް ގްރޫޕްގެ 2 ވަނައިގެ ގޮތުގައި ސެމީގެ ޖާގަ ކަށަވަރު ވާތީއެވެ. އަދި މެޗުން ދެރަވާ ޓީމު މުބާރާތާއި އަލްވަދާޢު ކިޔަންޖެހޭތީވެސްމެއެވެ. ފޯރިގަދަ ކުޅުމެއް ފެނިގެން ދިޔަ މި މެޗުގެ ފުރަތަމަ ސެޓު 25-19 އިން ކާމިޔާބުކުރީ އެފް.އީ އިންނެވެ. 2 ވަނަ ސެޓުވެސް ނިމުނީ 25-19ގެ ނަތީޖާއަކުން އެކަމަކު އެމް.އެން.ޔޫ.ބީ.އެސް ކާމިޔާބުކޮށްގެންނެވެ. ނަތީޖާނެރުމަށް ކުޅެވުނު 3 ވަނަ ސެޓު ކާމިޔާބުކުރީ 15-10ގެ ނަތީޖާއަކުން އެމް.އެން.ޔޫ.ބީ.އެސް އެވެ.

މުބާރާތުގެ ސެމީ ފައިނަލުގެ މެޗުތައް ހޮނިހިރު ދުވަހުގެ (24 ފެބުރުވަރީ 2018)ގެ ހެނދުނު 07:30ގައި ފެށޭނެއެވެ.

ސެމީ ފައިނަލު މެޗުތައް:

އަންހެން ޑިވިޜަން: 07:30ގައި އެމް.އެން.ޔޫ.ބީ.އެސް އާއި އެފް.އީ – މޮޅުވާ ޓީމު ސީދާ ފައިނަލަށް. ބަލިވާ ޓީމު ތިންވަނަ ސެމީއަށް.

އަންހެން ޑިވިޜަން: 09:00ގައި އެފް.އެޗް.އެސް އާއި އެސް.އެން – މޮޅުވާ ޓީމު ތިންވަނަ ސެމީއަށް.

ފިރިހެން ޑިވިޜަން: 10:30ގައި އެފް.އެޗް.ޓީ.އެސް އާއި ފްލިސް – މޮޅުވާ ޓީމު ސީދާ ފައިނަލަށް. ބަލިވާ ޓީމު ތިންވަނަ ސެމީއަށް.

ފިރިހެން ޑިވިޜަން: 12:00ގައި ފެސްޓް އާއި އެސް.އެން – މޮޅުވާ ޓީމު ތިންވަނަ ސެމީއަށް.

މުބާރާތުގެ ޓައިޓްލް ސްޕޮންސަރ އަކީ ”މެކްސްކޮމް ޓެކްނޮލޮޖީސް“އެވެ. ކޯ-ސްޕޮންސަރުންނަކީ ”ދިރާގު“ އަދި ”ފިއުލް އެކްސްޕްރެސް މޯލްޑިވްސް“ އެވެ. މީޑިއާ ޕާރޓްނަރަކީ ”ސަން މީޑިއާ ގްރޫޕް“ އެވެ.