ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އިން އިންތިޒާމުކޮށްގެން ބާއްވާ ”މެކްސްކޮމް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2018″ގެ ފިރިހެން ޑިވިޜަނުގެ ފައިނަލަށް ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އަދި ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް) ދަތުރުކޮށްފިއެވެ. އެފް.އެޗް.ޓީ.އެސް ފައިނަލަށް ދަތުރުކުރީ ހޮނިހިރުދުވަހުގެ (24 ފެބުރުވަރީ 2018) ހެނދުނު އެފް.އެލް.އައި.އެސް އާއި ވާދަކޮށް 3 ސެޓު 1 ސެޓުން މެޗު ކާމިޔާބުކޮށްގެންނެވެ. (25-21، 25-22، 25-18، 22-25 ) މެޗުގެ އެންމެ މޮޅު ކުޅުންތެރިއަކަށް ހޮވުނީ އެފް.އެޗް.ޓީ.އެސްގެ ޖާރޒީ ނަންބަރ 3 ސަނީހް އާދަމެވެ.
މި ޑިވިޜަނުގެ 2 ވަނަ ސެމީގައި ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް) އާއި އެމް.އެން.ޔޫ ބިޒްނަސް ސްކޫލް ބައްދަލުކުރިއިރު، މި މެޗު ސީދާ 3 ސެޓުން ކާމިޔާބުކުރީ ފެސްޓް އެވެ. މި މެޗުގެ ނަތީޖާތައް ހުރީ 25-20، 25-23 އަދި 25-21 ކަމަށް ވާއިރު، މެޗުގެ އެންމެ މޮޅު ކުޅުންތެރިއަކަށް ހޮވުނީ ފެސްޓްގެ ޖާރޒީ ނަންބަރ 5 އަފާޒް ޒާހިދެވެ.
ސެމީ ފައިނަލް ޕްލޭ އޮފްގައި ފުރަތަމަ ސެމީއިން ބަލިވި އެފް.އެލް.އައި.އެސް ޓީމާއި ދެވަނަ ސެމީއިން މޮޅުވި ފެސްޓް ބައްދަލުކުރިއިރު، ފައިނަލުގެ ފަހު ޖާގަ އެފް.އެލް.އައި.އެސް އިން ކަށަވަރުކުރީ ފޯރިގަދަ މެޗަކަށްފަހު 3 ސެޓު 2 ސެޓުން މެޗު ކާމިޔާބު ކޮށްގެންނެވެ. ފުރަތަމަ ސެޓު 26-24ން ފެސްޓް ގެންދިޔައިރު، ދެވަނަ ސެޓު 25-17ން ގެންދިޔައީ އެފް.އެލް.އައި.އެސް އެވެ. ތިންވަނަ ސެޓު 26-24ން ފެސްޓް އަނެއްކާވެސް ގެންދިޔައިރު، 25-14ން ހަތަރުވަނަ ސެޓު ކާމިޔާބުކުރީ އެފް.އެލް.އައި.އެސް އެވެ. ނަތީޖާ ނެރުމަށް ކުޅެވުނު 5 ވަނަ ސެޓު 15-09ން ކާމިޔާބުކުރީ އެފް.އެލް.އައި.އެސް އެވެ. މެޗުގެ މޮޅު ކުޅުންތެރިއަކަށް ހޮވުނީ އެފް.އެލް.އައި.އެސްގެ ޖާރޒީ ނަންބަރު 4 އަޙްމަދު އާދަމް އެވެ.
މުބާރާތުގެ ފިރިހެން ޑިވިޜަނުގެ ފައިނަލް މެޗު އޮންނާނީ ހޮނިހިރުދުވަހުގެރޭ (24 ފެބުރުވަރީ 2018) 10:00ގައި އެފް.އީ ޕީ.އީ ހޯލުގައެވެ.
މުބާރާތުގެ ޓައިޓްލް ސްޕޮންސަރ އަކީ ”މެކްސްކޮމް ޓެކްނޮލޮޖީސް“އެވެ. ކޯ-ސްޕޮންސަރުންނަކީ ”ދިރާގު“ އަދި ”ފިއުލް އެކްސްޕްރެސް މޯލްޑިވްސް“ އެވެ. މީޑިއާ ޕާރޓްނަރަކީ ”ސަން މީޑިއާ ގްރޫޕް“ އެވެ.
