ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންއިން އިންތިޒާމުކޮށްގެން ބާއްވާ 8 ވަނަ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތުގެ ދެވަނަ ދުވަހުގެ ފުރަތަމަ ތިން މެޗުން ބީ.އެސް، އެފް.އެސް.އެލް އަދި އެސް.އެން މޮޅުވެއްޖެއެވެ.
މިއަދުގެ ފުރަތަމަ މެޗުގައި ބައްދަލުކުރީ ގްރޫޕް ބީގެ ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އަދި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އެވެ. މި މެޗު ސީދާ 2 ސެޓުން ކާމިޔާބުކޮށްފައި ވަނީ އެފް.އެސް.އެލް އިންނެވެ. މި މެޗުގެ ސެޓުތައް އެފް.އެސް.އެލް އިން ގެންދިޔައީ 25-13 އަދި 10-25ގެ ނަތީޖާއަކުންނެވެ. މި މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ އެފް.އެސް.އެލްގެ ޖާރޒީ ނަންބަރު 4 މަރިޔަމް ޝަހާމާއެވެ.
މުބާރާތުގެ ދެވަނަ މެޗުގައި ގުރޫޕް އޭގެ ސްކޫލް އޮފް ނާރސިންގ (އެސް.އެން ) އަދި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ބައްދަލުކުރި މެޗުން ފުރަތަމަ ދެ ސެޓު ގެންގޮސްގެން ކުރި ހޯދީ އެސް.އެން ގެ ޓީމުންނެވެ. މި މެޗުގެ ސެޓުތައް އެސް.އެން އިން ގެންދިޔައީ 25-16 އަދި 25-09ގެ ނަތީޖާއަކުންނެވެ. މިމެޗުގެ އެންމެ މޮޅު ކުޅުންތެރިޔާގެ މަޤާމު ހާޞިލްކުރީ، އެސް.އެން ގެ ޖާރޒީ ނަންބަރު 11، އާމިނަތު ފިރުޝާއެވެ.
އަންހެން ޑިވިޝަނުގެ ގްރޫޕް ބީގެ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް)އާއި ވާދަކޮށް އެމް.އެން.ޔޫ ބިޒްނަސް ސްކޫލް މޮޅުވީ ސީދާ 2 ސެޓުންނެވެ. ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ސެޓު ބީ.އެސް އިން ކާމިޔާބުކުރީ 25-22ގެ ނަތީޖާއަކުންނެވެ. އަދި ދެވަނަ ސެޓު ކާމިޔާބުކުރީ 25-18ގެ ނަތީޖާއަކުންނެވެ. މިމެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ ބީ.އެސް ޓީމުގެ ޖާރޒީ ނަންބަރު 9، އައިޝަތު ވިޝާމާއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
