އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ 6 ވަނަ ދުވަހު ކުޅުނު ފިރިހެން ޑިވިޝަންގެ މެޗުތަކުން ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އާއި ސްކޫލް އޮފް ނާރސިންގ (އެސް.އެން) މޮޅުވެއްޖެއެވެ.
ސެންޓަރ ފޯ މެރިޓައިމް ސްޓަޑީޒް (ސީ.އެމް.އެސް)އާ ވާދަކޮށް އެފް.އެޗް.ޓީ.އެސް މޮޅުވީ ސީދާ 2 ސެޓުންނެވެ. މެޗުގެ ސެޓުތައް އެފް.އެޗް.ޓީ.އެސް އިން ގެންދިޔައީ 25-11 އަދި 25-20 ންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެފް.އެޗް.ޓީ.އެސްގެ ޖާރޒީ ނަންބަރ 08 އަރުޝަދު އަޝްރަފެވެ.
ސްކޫލް އޮފް ނާރސިންގ އާއި އެމް.އެން.ޔޫ.ބީ.އެސް ބައްދަލުކުރި މެޗުވެސް ނިމުނީ 2-0 ސެޓުންނެވެ. ފޯރިގަދަ މި މެޗުގެ ސެޓުތައް އެސް.އެން އިން ގެންދިޔައީ 25-20 އަދި 25-21 ންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެސް.އެންގެ ޖާރޒީ ނަންބަރ 09 މުޙައްމަދު ހައްމާދެވެ.
މި މެޗުތަކުގެ ނަތީޖާއާއެކު، ފިރިހެން ޑިވިޝަންގެ ދެވަނަ ސެމީފައިނަލް ވަނީ ޔަގީންވެފައެވެ. މި މެޗުގައި ބައްދަލުކުރާނީ ގްރޫޕް ބީގެ އެއްވަނަ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާއި އެފް.އެޗް.ޓީ.އެސް އެވެ. އަދި ދެން އޮތް ސެމީ ފައިނަލް ޔަގީން ވާނީ ބުރާސްފަތި ދުވަހުގެރޭ އެފް.އެޗް.އެސް އާއި އެމް.އެން.ޔޫ.ބީ.އެސް ބައްދަލުކުރާ މެޗަށްފަހު އެވެ. ކުރިން ކުޅުނު މި މެޗު އަލުން ކުޅެން ހިންގާ ކޮމިޓީން ނިންމާފައިވަނީ ކުރިން ކުޅުނު މެޗުގައި ޓީމުގައި ހިމެނުމަށް ޝަރުޠު ހަމަނުވާ ކުޅުންތެރިޔަކު އަރުވައިގެން އެމް.އެން.ޔޫ.ބީ.އެސް އިން ކުޅެފައިވާތީއެވެ. އެ ގްރޫޕްގެ ދެވަނަ ޓީމު ވާދަކުރަން ޖެހޭނީ ގްރޫޕް އޭގެ އެއްވަނަ ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް)އާއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
