ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ކުރިއަށް ގެންދާ އެމް.އެން.ޔޫ.އެސް.ޔޫ ހަޔަރ އެޑިއުކޭޝަން ވޮލީބޯލް ޗެމްޕިއަންޝިޕް 2022 ފަށައިފިއެވެ.
ޖުމްލަ ހަތަރު ކޮލެޖު/ޔުނިވަރސިޓީއިން ބައިވެރިވާ މި މުބާރާތް ފައްޓަވައިދެއްވީ ދިވެހިރާއްޖޭގެ ގައުމީ ޔުނިވަރސިޓީގެ ވައިސް ޗާންސެލަރ، ޑރ. މުޙައްމަދު ޝަރީފްއެވެ.
ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ ރައީސް ޙުސައިން ޒައިދު ވިދާޅުވީ މި މުބާރާތް ފެށީ ދިމާވި ގިނަ ގޮންޖެހުންތަކެއް ގިރާކުރުމަށްފަހު ކަމަށާއި، މި މުބާރާތަކީ ކޮންމެ އަހަރަކުވެސް ބޭއްވުމަށް ކަނޑައަޅާފައިވާ މުބާރާތެއް ކަމަށެވެ.
މި ރަސްމިއްޔާތުގައި އެމް.އެން.ޔޫ.އެސް.ޔޫގެ ކުރީގެ ރައީސް އަލްއުސްތާޛް ޢަލީ ރަޝީދު ވިދާޅުވެފައިވަނީ ކޮލެޖް ޔުނިވަރސިޓީތަކުގެ ދަރިވަރުންގެ ހުނަރު ދައްކާލުމަށް މިފަދަ ޕްލެޓްފޯމްތައް ލިބުމަކީ ވަރަށް މުހިއްމުކަމެއް ކަމަށެވެ. އަދި މިފަދަ މުބާރާތްތަކުގެ ބޭނުންހިފާ މުބާރާތުގެ އެއް މަޤްޞަދުކަމަށްވާ ކޮލެޖް ޔުނިވަރސިޓީތަކުގެ ދަރިވަރުންގެ މެދުގައި ގުޅުން ގާއިމު ކުރުމަކީ ވަރަށް މުހިއްމުކަމެއް ކަމަށް އެބޭފުޅާ ވިދާޅުވިއެވެ.
ހުކުރު ދުވަހުގެރޭ އެމް.އެން.ޔޫ ޕީއީ ހޯލުގައި ކުރިއަށްދިޔަ މި މެޗު، އެމް.އެން.ޔޫ އިން ކާމިޔާބުކުރީ 3-2 ސެޓުންނެވެ.
މެޗުގެ ފުރަތަމަ ދެ ސެޓު އެމް.އެން.ޔޫ އިން ވަނީ ފަސޭހަކަމާއެކު ކާމިޔާބުކޮށްފައެވެ. މި ދެ ސެޓު އެމް.އެން.ޔޫ އިން ގެންދިޔައީ، 25-16 އަދި 25-19 އިންނެވެ.
އެކަމަކު ޖެހިގެން އައި ސެޓު އެވިޑް ކޮލެޖުން ވަނީ 25-23 އިން ކާމިޔާބުކޮށް މެޗުގެ ތެރެއަށް ވަދެފައެވެ. އެއާއެކު ހަތަރުވަނަ ސެޓުވެސް އެވިޑުން ވަނީ ގެންގޮސްފައެވެ. މި ސެޓު އެވިޑުން ގެންދިޔައީ 25-20 އިންނެވެ.
މެޗުގެ ފަހު ސެޓުގެ ކުރީކޮޅު އެވިޑުން ލީޑުކޮށްގެން ކުޅުނުއިރު، މެޗުގެ ފުރަތަމަ އަށް ޕޮއިންޓް ހޯދާފައިވެސް ވަނީ އެވިޑުންނެވެ. އެކަމަކު ސެޓުގެ ފަހުކޮޅު އެމް.އެން.ޔޫއިން ވަނީ ކުޅުން ރަނގަޅުކޮށް 16-14 ސެޓު ކާމިޔާބުކޮށްފައެވެ.
އެމް.އެން.ޔޫ އިން ވަނީ މީގެ ކުރިން ވޮލީބޯލް އެސޯސިއޭޝަން އޮފް މޯލްޑިވްސް (ވީ.އޭ.އެމް) އިން ކުރިއަށް ގެންދިޔަ އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތުގެ އަންހެން އަދި ފިރިހެން ޑިވިޝަނުގެ މުބާރާތް މިލްކުކޮށްފައެވެ. އަދި މި މުބާރާތުގެ އެންމެ ކާމިޔާބު ޓީމަކީވެސް އެމް.އެން.ޔޫ އެވެ. އެގޮތުން އެމް.އެން.ޔޫ އިން ވަނީ ޖުމްލަ ފަސް ފަހަރު އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތް ކާމިޔާބުކޮށްފައެވެ.
