ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ކުރިއަށް ގެންދާ ހަޔަރ އެޑިއުކޭޝަން ވޮލީބޯލް ޗެމްޕިއަންޝިޕުގެ ފިރިހެން ޑިވިޝަނުގައި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) ބަލިކޮށް އެވިޑް ކޮލެޖުން ފުރަތަމަ މޮޅު ހޯދައިފިއެވެ.
މި މުބާރާތުގައި މި ދެ ޓީމުން ފުރަތަމަ ބައްދަލުކޮށްފައިވަނީ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އާއެވެ. އެމް.އެން.ޔޫ އާއި ވާދަކޮށް ވާދަވެރި ކުޅުމަކަށްފަހު އެވިޑުން ބަލިވީ 3-2 ސެޓުންނެވެ. އަދި އެމް.އެން.ޔޫ އާއި ވާދަކޮށް އައި.ޔޫ.އެމް ބަލިވީ 3-1 ސެޓުންނެވެ.
އާދީއްތަ ދުވަހުގެރޭ އެމް.އެން.ޔޫ ޕީއީ ހޯލުގައި ކުރިއަށްދިޔަ މެޗު އެވިޑުން ކާމިޔާބުކުރީ 3-1 ސެޓުންނެވެ.
މުޅި މެޗުގައިވެސް ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގެ ފުރަތަމަ ދެ ސެޓު އެވިޑުން ވަނީ ކާމިޔާބު ކޮށްފައެވެ. މި ދެ ސެޓު އެވިޑުން ގެންދިޔައީ، 25-21 އަދި 25-21 އިންނެވެ.
އެކަމަކު މެޗުގެ ތިންވަނަ ސެޓު ތަފާތު ރޫހެއްގައި ކުޅެ އައި.ޔޫ.އެމް އިން ވަނީ 20-25 އިން ކާމިޔާބު ކޮށްފައެވެ.
މެޗުގެ ހަތަރުވަނަ ސެޓަކީ މުޅި މެޗުގައިވެސް އެންމެ ވާދަވެރިވި ސެޓެވެ. މި ސެޓުގައި ދެ ޓީމަށްވެސް މާކަ ބޮޑު ލީޑަކާއެކު ކުޅެވިފައިނުވާއިރު، ސެޓުގެ ފަހު ވަގުތު އެވިޑުން ވަނީ 25-22 އިން މި ސެޓު ކާމިޔާބު ކޮށްފައެވެ.
މި މުބާރާތުގެ ފިރިހެން ޑިވިޝަނުގެ ސެމީ ފައިނަލުގައި މި ދެ ޓީމު ވާދަކުރާނެއެވެ. ސެމީ ފައިނަލު މެޗު ކުޅޭނީ އަންނަ އަންގާރަ ދުވަހުގެރޭ އެމް.އެން.ޔޫ ޕީއީ ހޯލުގައެވެ.
އެމް.އެން.ޔޫ އިން ވަނީ މީގެ ކުރިން ވޮލީބޯލް އެސޯސިއޭޝަން އޮފް މޯލްޑިވްސް (ވީ.އޭ.އެމް) އިން ކުރިއަށް ގެންދިޔަ އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތުގެ އަންހެން އަދި ފިރިހެން ޑިވިޝަނުގެ މުބާރާތް މިލްކުކޮށްފައެވެ. އަދި މި މުބާރާތުގެ އެންމެ ކާމިޔާބު ޓީމަކީވެސް އެމް.އެން.ޔޫ އެވެ. އެގޮތުން އެމް.އެން.ޔޫ އިން ވަނީ ޖުމްލަ ފަސް ފަހަރު އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތް ކާމިޔާބުކޮށްފައެވެ.
