އަންހެން ޑިވިޝަނުގެ އެންމެ މޮޅު ކުޅުންތެރިޔަކަށް ނަރީމާ

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބޭއްވި އެމް.އެން.ޔޫ.އެސް.ޔޫ ހަޔަރ އެޑިއުކޭޝަން ވޮލީބޯލް ޗެމްޕިއަންޝިޕުގެ އަންހެން ޑިވިޝަނުގެ އެންމެ މޮޅު ކުޅުންތެރިޔަކަށް ދިވެހިރާއްޖޭގެ ޤައުމީ ޔުނިވަރސިޓީގެ ކެޕްޓަން ނަރީމާ އިދުރީސް ހޮވިއްޖެއެވެ.

އެމް.އެން.ޔޫ ޓީމާއެކު މޮޅު ކުޅުމެއް މި މުބާރާތުގައި ނަރީމާގެ ފަރާތުން ފެނިގެންދިޔައިރު، އަންހެން ޑިވިޝަނުގެ ފުރަތަމަ މެޗުގެ މޮޅު ކުޅުންތެރިޔާގެ މަގާމުވެސް ހޯދާފައިވަނީ ވެސް ނަރީމާއެވެ.

އަންހެން ޑިވިޝަނުގެ އެންމެ މޮޅު ކުޅުންތެރިޔާއަށް ޓްރޮފީ ހަވާލުކޮށްދެއްވީ އެމް.އެން.ޔޫގެ ޑެޕިއުޓީ ވައިސް ޗާންސެލަރ ޑރ. އައިޝަތު ޝެހެނާޒް އާދަމްއެވެ.

މި މުބާރާތުގެ އަންހެން ޑިވިޝަނުގެ އެންމެ މޮޅު ހަ ކުޅުންތެރިންނަކީ ނަރީމާގެ އިތުރުން އެމް.އެން.ޔޫގެ ޝަމްހާ ރިޔާޒާއި ފާތިމަތު ސަމްހާއާ، އެވިޑް ކޮލެޖުގެ އައިމިނަތު ރުދައިނާއާ، ޝާނިޔާ އަޙްމަދުގެ އިތުރުން މާޔާ ހުސައިންނެވެ.

އެންމެ މޮޅު ހަ ކުޅުންތެރިންނަށް ޓްރޮފީ ހަވާލުކޮށްދެއްވީ، އެމް.އެން.ޔޫގެ މާކެޓިންގ މެނޭޖަރު، ޝަހުދާ މޫސާއެވެ.

މި މުބާރާތުގެ އަންހެން ޑިވިޝަނުގެ ޗެމްޕިއަން ޓީމަކީ އެމް.އެން.ޔޫއެވެ. އަންހެން ޑިވިޝަނުގައި ވާދަކޮށްފައިވަނީ ދެ ޓީމެވެ. އެހެންކަމުން އަންހެން ޑިވިޝަނުގެ ޗެމްޕިއަން ޓީމު ހޮވައިފައިވަނީ ތިން މެޗުން ދެ މެޗު ކާމިޔާބުކުރާ ޓީމަކަށް ލިބޭ ގޮތަށެވެ. އެގޮތުން އެމް.އެން.ޔޫއިން ވަނީ މި މުބާރާތުގައި ކުޅުނު ދެ މެޗުވެސް ކާމިޔާބުކޮށްފައެވެ.