ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބޭއްވި ހަޔަރ އެޑިއުކޭޝަން ވޮލީބޯލް ޗެމްޕިއަންޝިޕުގެ ފިރިހެން ޑިވިޝަނުގެ އެންމެ މޮޅު ކުޅުންތެރިޔާގެ މަގާމު ދިވެހިރާއްޖޭގެ ޤައުމީ ޔުނިވަރސިޓީގެ އަބްދުﷲ ޒަޔާން މުފީދު ހޯދައިފިއެވެ.
މި މުބާރާތުގެ ފިރިހެން ޑިވިޝަނުގެ ޗެމްޕިއަންކަން އެމް.އެން.ޔޫއިން ހޯދާފައިވަނީ ކުޅުނު ހުރިހާ މެޗެއް ކާމިޔާބުކޮށްގެންނެވެ.
މި މެޗުތަކުގައި ޒަޔާންގެ ފަރާތުން މޮޅު ކުޅުމެއް ފެނިގެންދިޔައިރު، ފައިނަލް މެޗުގައިވެސް ޒަޔާން ވަނީ ތަފާތު ދައްކައިފައެވެ.
މި މުބާރާތުގެ އެންމެ މޮޅު ކުޅުންތެރިޔާއަށް ޓްރޮފީ ހަވާލުކޮށްދެއްވީ، ސިޓީ އިންވެސްޓްމަންޓްގެ ޑިރެކްޓަރ މުޙައްމަދު ލަތީފްއެވެ.
ފިރިހެން ޑިވިޝަނުގެ އެންމެ މޮޅު ހަ ކުޅުންތެރިންނަކީ، އެމް.އެން.ޔޫގެ އުމަރު ފާރޫގާއި، އަލީ ނާއިފާއި، އަޙްމަދު އިޝާނާއި، އެވިޑް ކޮލެޖުގެ ޝިރާން އަބްދުލް ސައްތާރާއި، އައި.ޔޫ.އެމްގެ ޔޫޝައު ހަސަންގެ އިތުރުން މައުޒޫން ނިޔާޒްއެވެ.
މި މުބާރާތުގެ އެންމެ މޮޅު ހަ ކުޅުންތެރިންނަށް ޓްރޮފީ ހަވާލުކޮށްދެއްވީ ކުޅިވަރާ ބެހޭ ވަޒީރު އަޙްމަދު މަޚްލޫފްއެވެ.
މި މުބާރާތް ކުރިއަށް ގޮސްފައިވަނީ ސިޓީ އިންވެސްޓްމަންޓާއި، ޕިއްޒާ ބައި އާރްބީގެ އިތުރުން ހާޓު ސީން ޓުއަރިޒަމް އެންޑް ޓްރޭޑް ފެސްޓިވަލްގެ އެހީތެރިކަމާއެކުގައެވެ.
