އެމް.އެން.ޔޫ.އެސް.ޔޫ މީޑިއާގައި 2025 ވަނަ އަހަރު މަސައްކަތްކުރި މެންބަރުންގެ ތެރެއިން އެންމެ ހަރަކާތްތެރި މެންބަރަކަށް ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގެ ދަރިވަރު މުޙައްމަދު އަހުޒަމް އަޒްހާން ހޮވިއްޖެއެވެ.
އެމް.އެން.ޔޫ.އެސް.ޔޫ މީޑިއާ މެންބަރުންނަށްދޭ އިނާމުތައް ދީފައިވަނީ ޑިސެންބަރު 4 ވީ ބުރާސްފަތި ދުވަހުގެރޭ އެމް.އެން.ޔޫ ސީ.އޭ އޮޑިޓޯރިއަމްގައި ކުރިއަށްދިޔަ އެމް.އެން.ޔޫ.އެސް.ޔޫ އެވޯޑު ނައިޓުގައެވެ. މި ހަފްލާގައި މީޑިއާ ޓީމުގެ އިނާމުތަކުގެ އިތުރުން ލީޑަރުންނަށްދޭ އިނާމުތައްވެސް ވަނީ ދީފައެވެ. އަދި ހަމަ އެހެންމެ، އެމް.އެން.ޔޫ.އެސް.ޔޫގެ 14 ވަނަ ހިންގާ ކޮމިޓީ އިފްތިތާހުކުރުންވެސް މި ރަސްމިއްޔާތުގައި ވަނީ ކުރިއަށް ގެންގޮސްފައެވެ.
އެމް.އެން.ޔޫ.އެސް.ޔޫ މީޑިއާގެ ދެވަނަ އަށް އެންމެ ހަރަކާތްތެރި މެންބަރުންގެ ގޮތުގައި ދެ މެންބަރަކުވަނީ ހޮވިފައެވެ. އެއީ ސްކޫލް އޮފް ނާރސިންގެ ދެ ދަރިވަރުންކަމަށްވާ ޢާއިޝަތު އަހްނާ ފާއިޤު އަދި ފާޠިމަތު ރާނިޔާ ޢަލީ އެވެ. މީގެ އިތުރުން ތިންވަނަ އަށް އެންމެ ހަރަކާތްތެރި މެންބަރުންގެ ގޮތުގައި ހޮވިފައިވަނީ އެމް.އެން.ޔޫ ބިޒްނަސް ސްކޫލްގެ އަޔާން މުޙައްމަދު ޒާހިރެވެ.
އެމް.އެން.ޔޫ.އެސް.ޔޫ މީޑިއާ އަކީ 2018 ވަނަ އަހަރު އުފައްދާފައިވާ ޓީމެކެވެ. މި ޓީމު އުފައްދާފައިވަނީ ދަރިވަރުންގެ ޔޫނިއަންގެ ހަރަކާތްތަކުގެ މައުލޫމާތު ފޯރުކޮށްދިނުމުގައި ޔޫނިއަންގެ މީޑިއާ ކޯޑިނޭޓަރާއިއެކު މަސައްކަތް ކުރުމަށާއި ޔޫނިއަންގެ މެންބަރުންނަށް މީޑިއާގެ އެކިއެކި ހުނަރު ދަސްކޮށްދިނުމުގެ މަޤްޞަދުގައެވެ.
