ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ދެވަނައަށް އެންމެ މަތީ ޝަރަފު، މަރްޙޫމް އަޙްމަދު ޢަބްދުﷲ ނަޞީރުގެ ހަނދާނުގައިދެވޭ އެމް.އެން.ޔޫ ދަރިވަރުންގެ ޔޫނިއަންގެ ޝަރަފުވެރިކަމުގެ އިނާމު ދެ ފަރާތަކަށް އަރުވައިފިއެވެ.
މި އިނާމު އަރުވާފައިވަނީ މާލެ ސިޓީ މއ. ޝެޑޯ މުޙައްމަދު އަޒްމީ ރަޝީދު އަދި އއ. އުކުޅަސް މަރިޔަންމާގޭ ޢަބްދުﷲ ޝަފީޢު ޙަސަން އަށެވެ. މި އިނާމުތައް އަރުވާފައިވަނީ އެމް.އެން.ޔޫ.އެސް.ޔޫގެ 14 ވަނަ ދައުރުގެ ހިންގާ ކޮމިޓީ އިފްތިތާހުކުރުމަށް ބުރާސްފަތި ދުވަހުގެރޭ ބޭއްވި ހަފްލާއެއްގައެވެ.
މި އިނާމަކީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންއަށް ތަފާތު އެކި ރޮނގުން ގިނަ ޚިދުމަތްތަކެއް ކުރައްވާފައިވާ ފަރާތްތަކަށް އެކަމުގެ އަގުވަޒަންކޮށް އެރުވޭ ޝަރަފުގެ އިނާމެކެވެ. މި އިނާމު ތަޢާރަފުކުރެވުނީ 2018ވަނަ އަހަރެވެ. މި އިނާމު ދެވިގެންދަނީ ދަރިވަރުންގެ ޔޫނިއަންގެ ލީޑަރސް ގްރޫޕްގައި މަސައްކަތްކުރި ދަރިވަރެއްކަމުގައިވާ ހދ. ކުޅުދުއްފުށީ އަރުޝީ އަލް މަރްޙޫމް އަޙްމަދު ޢަބްދުﷲ ނަޞީރުގެ ހަނދާނުގައިދެވޭ އިނާމެކެވެ.
