ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ތިންވަނައަށް އެންމެ މަތީ ޝަރަފު، އެމް.އެން.ޔޫ.އެސް.ޔޫ އިޖުތިމާޢީ ޚިދުމަތުގެ އިނާމު 27 ފަރާތަކަށް އަރުވައިފިއެވެ.
މި އިނާމު އަރުވާފައިވަނީ އެމް.އެން.ޔޫ.އެސް.ޔޫގެ 14 ވަނަ ދައުރުގެ ހިންގާ ކޮމިޓީ އިފްތިތާހުކުރުމަށް ބުރާސްފަތި ދުވަހުގެރޭ ބޭއްވި ހަފްލާއެއްގައެވެ. މީގެ އިތުރުން މަރްޙޫމް އަޙްމަދު މުޙައްމަދުގެ ހަނދާނުގައިދެވޭ އެމް.އެން.ޔޫ.އެސް.ޔޫ ދަރުމަވެރިކަމުގެ އިނާމު 38 ފަރާތަކަށްދީފައިވާއިރު، އެމް.އެން.ޔޫ.އެސް.ޔޫ އިސްވާރުންގެ އިނާމު 113 ފަރާތަކަށްވަނީ ދީފައެވެ.
އެމް.އެން.ޔޫ.އެސް.ޔޫ އިޖުތިމާޢީ ޚިދުމަތުގެ އިނާމަކީ އެމް.އެން.ޔޫ ދަރިވަރުންގެ ޔޫނިއަންއަށް ދެމެހެއްޓެނިވި ގޮތުގައި އެކި ރޮނގުރޮނގުން މަސައްކަތްކޮށްދެއްވާ ޔޫނިއަންގެ މިހާރުގެ އަދި ކުރީގެ މެންބަރުންނަށް ޚާއްޞަކޮށްގެން ދެވޭ އިނާމެކެވެ. މީގެ އިތުރުން މަރްޙޫމް އަޙްމަދު މުޙައްމަދުގެ ހަނދާނުގައިދެވޭ އެމް.އެން.ޔޫ.އެސް.ޔޫ ދަރުމަވެރިކަމުގެ އިނާމަކީ ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ސައިންސްގައި ބެޗްލަރސް އޮފް ސައިންސް ކިޔަވަމުންދަނިކޮށް، ދިމާވި ހިތާމަވެރި ހާދިސާއެއްގައި 2017 ވަނަ އަހަރު މި ދުނިޔެއާ އަލްވަދާޢު ކިޔާފައިވާ، ހދ. ނޮޅިވަރަމް، ހިތަށްފިނިވާގޭ އަލް މަރްޙޫމް އަޙްމަދު މުޙައްމަދުގެ ހަނދާނުގައިދެވޭ އިނާމެކެވެ. އަދި އެމް.އެން.ޔޫ.އެސް.ޔޫ އިސްވާރުންގެ އިނާމަކީ އަހަރުގެ ތެރޭގައި އެމް.އެން.ޔޫ.އެސް.ޔޫ އިން ހިންގާ ހަރަކާތްތަކުގައި ބައިވެރިވެ ތަފާތު ހިތްވަރެއް ދައްކަމުންދާ ދަރިވަރުންނަށެވެ.
