އެމް.ޑަބްލިއު.އެސް.ސީ.އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި އެފް.އެޗް.ޓީ.އެސްގެ ފިރިހެން ޓީމު ކުޅުނު ފުރަތަމަ މެޗު ކާމިޔާބުކޮށް މުބާރާތުގެ ފެށުން ރަނގަޅުކޮށްފިއެވެ. ޕޮލިޓެކްނިކާއި ދެކޮޅަށް ކުޅުނު މި މެޗު އެފް.އެޗް.ޓީ.އެސް އިން ކާމިޔާބުކޮށްފައިވަނީ 2-3 ގެ ނަތީޖާއަކުންނެވެ.
އެކުވެނި ވެލިދަނޑުގައި ކުޅޭ މިމުބާރާތުގެ ގުރޫޕް ބީ ގެ ފުރަތަމަ މެޗުގައި ދެޓީމުންވެސް ވަނީ ވާދަވެރި ކުޅުމެއް ދައްކާފައެވެ. މި މެޗުގެ ނަތީޖާއަށްފަހު އެފް.އެޗް.ޓީ.އެސް އޮތީ ގުރޫޕްގެ އެއްވަނައިގައެވެ. އަދި ޕޮލިޓެކްނިކް އޮތީ 4 ވަނައިގައެވެ. މި ގުރޫޕުގައި ދެންއޮންނާނީ ފެކަލްޓީ އޮފް އިންޖިނޭރިންގ ސައިންސް އެންޑް ޓެކްނޮލޮޖީއާއި ކްލިކް ކޮލެޖެވެ.
ފޯރިގަދަކުޅުމެއް ފެނިގެންދިޔަ މިމެޗުގެ ފުރަތަމަ ލަނޑުކާމިޔާބުކޮށްފައިވަނީ ޕޮލިޓެކްނިކްގެ ޖާޒީ ނަންބަރު 12، އަބްދުﷲ ރިދާޝެވެ. ދެވަނަ ހާފު ފެށިތަނާ އެފް.އެޗް.ޓީ.އެސްއަށް ނަތީޖާ ހަމަހަމަ ކޮށްދިނީ ޖާޒީ ނަންބަރު 7، އިބްރާހިމް އިޚްލާސްއެވެ. އޭގެ ކުޑައިރުކޮޅެއް ފަހުން އެފް.އެޗް.ޓީ.އެސް ގެ ޖާޒީ ނަންބަރު 9، އަޙްމަދު ޙުނައިފުގެ ހިތްގައިމު ގޯލާއެކު އެފް.އެޗް.ޓީ.އެސް އިން ވަނީ ކުރިހޯދާފައެވެ. މާގިނައިރުތަކެއް ނުވަނީސް އިޚްލާސް ވަނީ އިތުރު ގޯލެއް ޖަހައި އެފް.އެޗް.ޓީ.އެސް އަށް ފަރަގުބޮޑުކޮށްދީފައެވެ. ޕޮލިޓެކްނިކްގެ ދެ ވަނަ ގޯލް، ކާމިޔާބުކުރީ ޖާޒީ ނަންބަރު 11، މުހައްމަދު ނާހީއެވެ.
އެފް.އެޗް.ޓީ.އެސް. އާއި ޕޮލިޓެކްނިކް ބައްދަލުކުރި މިމެޗުގެ މޮޅު ކުޅުންތެރިޔަކަށް ހޮވިފައިވަނީ އެފް.އެޗް.ޓީ.އެސް ގެ ޖާޒީ ނަންބަރު 9، އަޙްމަދު ޙުނައިފެވެ. ޙުނައިފަކީ މިދިޔަ އަހަރުގެ ފުޓްސަލް ފިއެސްޓާގައި މޮޅުކުޅުމެއްދައްކައި، ގަދަ ފަހެއްގައި ހިމެނިފައިވާ ކުޅުންތެރިޔެކެވެ.
އެފް.އެޗް.ޓީ.އެސްގެ ދެވަނަ މެޗު އޮންނާނީ މިރޭ 9:50 ގައެވެ. ބައްދަލު ކުރާނީ ފެކަލްޓީ އޮފް އިންޖިނޭރިންގ ސައިންސް އެންޑް ޓެކްނޮލޮޖީއާއެވެ.
ލިޔުނީ: އާއިޝަތު ޝަމްލާ
މީޑިއާ ކޯޑިނޭޓަރ، ޝެޓްސް
