ެމްޑަބުލިޔުއެސްސީ އެމްއެންޔޫއެސްޔޫ ފުޓްސަލް ފިއެސްޓާގެ ގްރޫޕް ސްޓޭޖުގައި މިއަދު އެފް.އެޗް.އެސް އަދި އެމްއެންޔޫ ބިޒްނަސް ސްކޫލް ބައްދަލު ކުރި މެޗު، 7 ލަނޑުގެ މޮޅަކާއެކު އެމްއެންޔޫ ބިޒްނަސް ސްކޫލްގެ ފިރިހެން ޓީމުން ތަފާތު ދައްކައިފިއެވެ.
މިއަދު ހަވީރު 16:50 ގައި ވެލިދަނޑުގައި ކުޅުނު މިމެޗުގެ ފުރަތަމަ ހާފުގައި އެމްއެންޔޫ ބިޒްނަސް ސްކޫލް އިން ވަނީ 3 ލަނޑު ޖަހާ ކުރި ހޯދާފައެވެ. އެގޮތުން ފުރަތަމަ 3 މިނެޓްތެރޭ އެމްއެންޔޫ ބިޒްނަސް ސްކޫލްގެ ޖާރޖީ ނަމްބަރު 02 މާޖިދު އަބްދުލް ޤަފޫރު އިދިކޮޅުގެ ގޯލު ހުލުވާލަދިނެވެ. އަދި 11 މިނެޓްގައި 2 ވަނަ ލަނޑު ޓީމަށް ކާމިޔާބުކޮށްދިނީ ޖާރޒީ ނަމްބަރު 04 މާލިކު އަބްދުލް ޤަފޫރެވެ. ފުރަތަމަ ހާފުގެ 3ވަނަ ލަނޑު ޖަހާ، ހާފު ނިމުމުގެ ކުރިން ލީޑު ފުޅާކޮށްދިނީ ޖާރޒީ ނަމްބަރު 07 އަލީ ނިހާދެވެ.
ފޯރިގަދަ ކުޅުމެއް ފެނުނު މިމެޗުގެ ދެވަނަ ހާފުގެ ފުރަތަމަ 2 މިނެޓްގެ ތެރޭގައި އެމްއެންޔޫބީއެސް ޓީމުގެ ކެޕްޓަން އަހުމަދު ރިޔުޝާން ވަނީ 4 ވަނަ ލަނޑު ޖަހާފައެވެ. އަދި މެޗުގެ އެންމެ ފަހު 10 މިނެޓްގައި ޖާރޖީ ނަމްބަރު 10 އިޔާން ޖާދުﷲ ރަޝީދު، ޖާރޖީ ނަމްބަރ 11 އައްޒާމް އަލީ ދީދީ އަދި ޖާރޒީ ނަމްބަރު 09 ހިޝާމް ހަސަން ވަހީދު ވަނީ މެޗުގެ އެންމެ ފަހު 3 ލަނޑުޖަހާ އެމްއެންޔޫބީއެސްގެ ޖުމްލަ 7 ލަނޑު ހަމަކޮށްފައެވެ.
މިމެޗުގެ އެންމެ މޮޅު ކުޅުންތެރިޔާއަށް ހޮވިފައިވަނީ އެމްއެންޔޫބީއެސްގެ ކެޕްޓަން އަހުމަދު ރިޔުޝާންއެވެ.
މުބާރާތް ހުޅުވި މެޗުން މާއެދެވޭ ނަތީޖާއެއް ނެރެވިފައި ނުވިޔަސް، މިއަދުގެ މެޗުން ވަކި ވަކި ކުޅުންތެރިންނާއި މުޅި ޓީމުންވެސް ވަނީ މޮޅު ކުޅުމެއް ދައްކާފައެވެ. ވުމާއެކު، ފިރިހެން ޑިވިޝަނުގެ ޗެމްޕިއަންކަން ހޯދުމަށް އެމްއެންޔޫ ބިޒްނަސް ސްކޫލުން ކުރާ އުންމީދަށް މިވަނީ އާދިރުމެއް ލިބިފައެވެ.
ލިޔުނީ : ފާތިމަތު ޒަހްރާ މީޑިއާ ކޯޑިނޭޓަރ،
ބީއެސްއެސްއޭ، އެމް.އެން.ޔޫ.އެސް.ޔޫ
