ޓީމުގެ އަމާޒަކީ ފައިނަލްގައި ކުޅުން: ކެޕްޓަން

އެމްޑަބްލިއުއެސްސީ އެމްއެންޔޫއެސްޔޫ ފުޓްސަލް ފިއެސްޓާގެ އަންހެން ޑިވިޝަނުގައި ވާދަކުރާ ފެކަލްޓީ އޮފް އެޑިއުކޭޝަންގެ ޓީމުގެ އަމާޒަކީ ފައިނަލްހައި ވާދަކުރުން ކަމަށް ޓީމުގެ ކެޕްޓަން ޚާތިމާ ޔޫސުފް ވިދާޅުވެއްޖެއެވެ.

ޓީމަށް ޖާރޒީ ހަވާލު ކުރުމަށް ބޭއްވި ރަސްމިއްޔާތުގައި ޚާތިމާ ވިދާޅުވީ ޓީމުގެ ހުރިހާ ކުޅުންތެރިންނާއި ކޯޗުގެ ވެސް އަމާޒަކީ ފައިނަލްގައި ކުޅުން ކަމަށެވެ. އެގޮތުން ފަރިތަކުރުން ގިނަކޮށް ކޯޗުގެ އިރުޝާދުތައް ރަނގަޅަށް އަޑުއަހައި ރަނގަޅަށް މަސައްކަތް ކުރާނެ ކަމަށްވެސް ވިދާޅުވިއެވެ.

”އަޅުގަނޑުމެންގެ ޓީމުގެ އަމާޒަކީ ފައިނަލްގައި ވާދަކުރުން. އިރާދަކުރެއްވިއްޔާ ކޯޗުގެ އިރުޝާދާއި ކުޅުންތެރިންގެ ހިތްވަރުން އެއަމާޒު އަޅުގަނޑުމެންނަށް ހާސިލްވާނެ،“

ޚާތިމާ ޔޫސުފް

ސެޕްޓެމްބަރު 12 ގައި ފެށި ފުޓްސަލް ފިއެސްޓާގައި ފެކަލްޓީ އޮފް އެޑިއުކޭޝަނުން މިހާތަނަށް ދެ މެޗު ކުޅެފައިވާއިރު އެއް މެޗުން މޮޅުވެ އަނެއް މެޗުން ވަނީ ބަލިވެފައެވެ. ކުއާޓަރގައި ޓީމު ވާދަކުރާނެކަން ކަށަވަރު ކުރެވޭނީ ގްރޫޕް ސްޓޭޖްގައި ބާކީހުރި މެޗުތައް ކުޅެ ނިމުމުންނެވެ.

އެފްއީ ޓީމު ހިމެނެނީ އަންހެން ޑިވިޝަނުގެ ގްރޫޕް ޑީގައެވެ. އެ ގްރޫޕްގައި ދެން ހިމެނެނީ ވިލާ ކޮލެޖްގެ ޓީމާއި ފެކަލްޓީ އޮފް އާރޓްސްގެ ޓީމެވެ.

ލިޔުނީ: އިބްރާހީމް އުމަރު،
މީޑިއާ ކޯޑިނޭޓަރ، ފެސާ، އެމް.އެން.ޔޫ.އެސް.ޔޫ