ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން، އެމްއެންޔޫއެސްޔޫއިން ރާއްޖޭގެ ކޮލެޖު، ޔުނިވަރސިޓީތަކަށް އަމާޒުކޮށްގެން ބާއްވާ އެންމެ ބޮޑު ފުޓްސަލް މުބާރާތް، އެމްޑަބްލިއުއެސްއީ އެމްއެންޔޫއެސްޔޫ ފުޓްސަލް ފިއެސްޓާގެ ފައިނަލަށް ޓީމު ތައްޔާރު ކަމަށާއި އިރާދަކުރެއްވިއްޔާ މިފަހަރު އަންހެން ޑިވިޝަނުގެ ތަށި ނަގާނެ ކަމަށް ފެކަލްޓީ އޮފް އެޑިއުކޭޝަންގެ ޓީމުގެ ކެޕްޓަން ޚާތިމާ ޔޫސުފް ވިދާޅުވެއްޖެއެވެ.
ފުޓްސަލް ފިއެސްޓާގެ ފައިނަލް މެޗު މިއަދު ކުޅޭއިރު ޓީމު އޮތީ މެޗަށް ތައްޔާރަށް ކަމަށާއި ޓީމުން އެއްވެސް ދުލެއް އިދިކޮޅަށް ނުދޭނެ ކަމަށް ޚާތިމާ ވިދާޅުވިއެވެ. ފައިނަލްގައި ޓީމު ނިކުންނާނީ އެމްއައި ކޮލެޖާއި ދެކޮޅަށެވެ.
”ޓީމުގައި މޮޅުވާނެ ހިތްވަރު އެބަހުރި. ފެންވަރުވެސް އެބަހުރި. އިރާދަކުރެއްވިއްޔާ ތަށި ނަގާނީ އަޅުގަނޑުމެން،“ ޚާތިމާ ވިދާޅުވިއެވެ.
އެމްއެންޔޫއެސްޔޫ އިންތިޒާމްކޮށްގެން ބާއްވާ ފުޓްސަލް ފިއެސްޓާގެ ދެ ޑިވިޝަނުގައިވެސް އެމްއެންޔޫގެ ޓީމަކަށް ބާކީ އޮތީ އެމްއެންޔޫ ފެކަލްޓީ އޮފް އެޑިއުކޭޝަނެވެ. މެޗު ކުޅޭނީ އެމްއެންޔޫއަށް ތަށި ގެނައުމުގެ ހިތްވަރާއި އަޒުމުގައި ކަމަށްވެސް ޚާތިމާ ވިދާޅުވިއެވެ.
ފުޓްސަލް ފިއެސްޓާގެ އަންހެން ޑިވިޝަންގެ ފައިނަލް މެޗު އޮންނާނީ މިއަދު ހަވީރު 3:45ގައެވެ. އެމްއައި ކޮލެޖާ ދެކޮޅަށް ނުކުންނަ މި މެޗު ކުޅޭނީ އެކުވެނި ވެލިދަނޑުގައެވެ.
ލިޔުނީ:
އިބްރާހިމް އުމަރު
މީޑިއާ ކޯރޑިނޭޓަރ، ފެސާ
