އެމްޑަބްލިއުއެސްސީ އެމްއެންޔޫއެސްޔޫ ފުޓްސެލް ފިއެސްޓާގައި ވަރުގަދަ ކްލިކް ކޮލެޖް ބަލިކޮށް ސައިރެކްސް ކޮލެޖުން މުބާރާތުގެ ފައިނަލަށް ދަތުރުކޮށްފިއެވެ.
މި މެޗު ސައިރެކްސް އިން ކާމިޔާބުކުރީ ޕެނަލްޓީގައި 7-6 ގެ ނަތީޖާ އަކުންނެވެ.
ވާދަވެރިކުޅުމެއް ފެނިގެންދިޔަ މި މެޗުބެލުމަށް ސައިރެކްސް ކޮލެޖުގެ ގިނަ އަދަދެއްގެ ސަޕޯޓަރުން ވަނީ ދަނޑަށް ގޮސްފައެވެ.
މެޗު ފަށައިގެން ކްލިކުން ދެ ލަނޑުގެ ލީޑެއް ނެގި ނަމަވެސް ސައިރެކްސް އިން ވަނީ މޮޅު ކުޅުމެއް ކުޅެ ފަހަތުން އަރައި ދެ ލަނޑު ޖަހާ މެޗުގެ ނަތީޖާ ހަމަހަމަ ކޮށްފައެވެ. ސައިރެކްސް އިން މެޗުގައި ކާމިޔާބުކުރި ދެ ލަނޑު ސައިރެކްސް އަށް ކާމިޔާބުކޮށްދިނީ ޖާޒީ ނަމްބަރު 6 އަހްމަދު މަޙްތޫމްއެވެ.
މެޗުގެ ފުރިހަމަ ވަގުތު ހަމަވިއިރު ދެ ޓީމުން 2-2 ގެ ނަތީޖާއަކުން އެއްވަރުވެފައި ވުމުން ޖެހި ޕެނަލްޓީ ސައިރެކްސް އިން ވަނީ ކާމިޔާބުކޮށްފައެވެ.
މި މުބާރާތުގެ ފައިނަލަށް ސައިރެކްސް އަކީ އާ ޓީމެއް ނޫނެވެ. އެގޮތުން މި މުބާރާތުގެ ފައިނަލް ސައިރެކްސް އިން ވަނީ ދެފަހަރު ކުޅެފައެވެ.
ސައިރެކްސް ޓީމުގެ ކެޕްޓަން އަބްދުﷲ ޝާނީޒް ބުނީ މި މުބާރާތުގެ ފައިނަލަށް ދިޔުމަކީ ޓީމަށް ލިބުނު ބޮޑު ކާމިޔާބީ އެއް ކަމަށާއި ޓީމުގެ އަމާޒަކީ މުބާރާތުގެ ތަށި ސައިރެކްސް އަށް ފުރަތަމަ ފަހަރަށް ގެންދިޔުން ކަމަށެވެ. ޝާނީޒް އިތުރަށް ބުނީ ފައިނަލާއި ހިސާބަށް އައި އިރު ހުރިހާ މެޗެއް ކާމިޔާބުކޮށްގެން އާދެވުމަކީ ވެސް ލިބުނު ކާމިޔާބީއެއް ކަމަށާއި ޓީމު އޮތީ ފައިނަލަށް ވަރަށް ބޮޑަށް ތައްޔާރުވެފައި ކަމަށެވެ.
ފައިނަލުގައި ސައިރެކްސް އިން ވާދަކުރަން ޖެހޭނީ އެވިޑް ކޮލެޖާއެވެ.
ލިޔުނީ: މަރިޔަމް އަވީނާ,
ސައިރެކްސް ކޮލެޖް
